1 Potpotgok un Teofilo,

Si ummulaʼn liblu un inggilik, imbyegak losan un killingwan Jesus ya intudtuchula inggan chi lanlugiyalaʼn lantudtuchuwan 2 inggala si eɏgew un lipangatuwalaʼd langit. Sakbyey un langulin ud langit, gapu si kilabyelin chi Ispiritun Apudyus, bililinla cha apostoles un chilutukala. 3 Latoy pun ot latagu kasin, lampaila kan cha apostolesla ot achu killingwala un mangipaloklok un ummuli siya latagu. Si opatpuɏuʼn eɏgew langampigan lampaila kan chicha ya lantudtuchu mipanggop si Mampangatan Apudyus.

4 Ha lamingsan un lachagupancha, bililin Jesus chicha, “Achiyu telan utla Jerusalem ngim uwayonyu Ispiritun Apudyus un maatod kan chikayu, ti siya imbyegbyegak kan chikayu si hachi un ingkarin Apudyus un Amak. 5 Bilunyagen John cha tagu si chelum ngim achipun mabyeyeg ked mabunyagen kayu si Ispiritun Apudyus.”

6 Lachagup ked kasin cha apostoles ya si Jesus, ilimuscha kan siya, “Apu, sala kamma timpu un mangkaalan kan cha iRome un manturay kan chitaku ta chitakun iyIsrael chi manturay?”

7 Summongbyat si Jesus kan chicha, “Lappun biyangyu un maligammu, ti abus si Amak chi alla kalobbongala un mangikodchong lu kam-amma makwaan chi piolaʼn makwa. 8 Ngim lu umali Ispiritun Apudyus kan chikayu, maidchen kayu si kilabyelin un mangibyegbyega kan cha tagu mipanggop kan sakon utla Jerusalem ya losan un ili ud Judea ya Samaria ya inggala si intilun chi lubung.”

9 Lagamput pun Jesus imbyega hachi, lipangatu siyad langit si langitutullongancha inggala laseilan si libuu.

10 Si lalatangngachencha kan siya si ummoyolalaʼd langit, lasaliked cha chuwaʼn anghel un lansisillup si mamputilak si cheegcha. 11 Ot kalan chi osa, “Chikayuʼn iGalilee, pakayuggey sumisiked utlaʼn mantatanged ud langit? Si Jesus un intullongyuʼn lipangatuʼd langit ked mangulin un isun chi intullongyuʼn ummoyolalaʼd langit.”

12 Lagamput pun, langulin cha apostoles ud Jerusalem un lampeɏpuchaʼd Bilig Olivo. Ha kaachayun chi Olivo un umoy ud Jerusalem ked sinkilometro. 13 Gummatongcha pun ud Jerusalem, ummoycha si langingngatu un kuwetun chi byeɏoy un inggewancha. Cha inggew ked cha Peter, John, James, Andres, Philip, Thomas, Bartolome, Matthew, James un alak Alphaeus, Simon un Mangipapakat si ilila ya Judas un alak James. 14 Lan-ossaaloncha langipapati un malluwalu, pati cha uchum un byebyai ya si Mary un ilan Jesus ya cha susuludla.

15 Si osaʼn eɏgew lauppun cha singgasut ya chuwampuɏuʼn mamati. Summiked si Peter ot kalala, 16 “Susulud, ha impadtun chi Ispiritun Apudyus kan Ari David un liigili si ugud Apudyus mipanggop si makwa kan Judas ked masapuɏʼn matungpeɏ. Si Judas chi langipuyut kan cha taguʼn lalokma kan Jesus, 17 ngim si lummaus un timpu kadwa taku si Judas, ti chilutukan Jesus siya un makakawachi kan chitakuʼn apostoles.”

18 Ha lakwa kan Judas. Ha pilak un ilawatla si lawwing un kingwala kan Jesus, siya lingila si pita ot udchi latoyala. Lan-uuslung un lan-odcheg ot bilumtak chi buwangla ot lummoswa cha chilaɏomla. 19 Laammuwan pun cha taguʼd Jerusalem chi lakwa kan Judas, lingachencha hachiʼn pita Akeldama, piolaʼn uguchon, Lachimok un Pita.* 1:19 Ha ibyegala si Greek ked Pita un Lachimok. Ha osaʼn piolaʼn uguchon, Pita un Lasuyatan si Chaɏa. Itullongyu Matthew 27:6-8

20 Intuɏuy Peter kalan, “Ha inggilin David si liblun chi Salmo ked allaya:

23 Ot ummibyegacha si chuwaʼn leɏaki un mampiliyancha, si Matthias ya si Jose Barsabbas un mangngachen bo Justus. 24 Oli pun lalluwalucha ot kalancha, “Apu, gapu ta ammum cha somsomok cha losan un tagu, ipakaammum kan chikami lu silu chilutukam kan cha allaʼn chuwa 25 un mipasalot man-apostoles kan Judas, ti lan-awichela lansimbiyalan apostoles ot ummoy si lugeɏʼn para kan siya.” 26 Ot lambibillulutcha ot labulut si Matthias, ot lichoga kan cha lasawaɏan un apostoles.