1-2 Sika Timothy un ay-ayatok ya ibilangkuʼn alakku, allaya suɏatku kan sika.

Sakon si Paul un chilutukan Apudyus un man-apostoles Jesu Kristu, ti siya pion Apudyus. Ked imbuulak un mangibyegbyega mipanggop si mallalayun un biyeg un ingkarin Apudyus kan cha losan un litimpuyug kan Jesu Kristu.

Iluwaluk kan Apudyus un Ama ya Jesu Kristu un Apu taku ta kacheguwancha sika ya palin-awaoncha bo somsomoklu.

3 Manyamalak kan Apudyus un mansimbiyak un mampeɏkas chi somsomokku, isun chi lansisimbin cha chachakkeɏk si awi. Manyamalak bo kan siya si mangikagasmokak mangiluwaluwan kan sika si ileɏgew ya lilabi. 4 Lu masmasmokku lantodtochen chi luwam si lansilaanta, patungedku pion un kasin itullong sika taplu gumalasak. 5 Laslasmokku langipapattiyam si pammatim kan Apudyus, un isun chi pammatin chi apum un Lois ya ilam un Eunice, ked ammuk un hachi bo awed kan sika si sala. 6 Ked siya ipasomsomokku kan sika ta useɏom cha kabyeeɏam un illidchon Apudyus si langipatayak si imak un langiluwalu kan sika. 7 Ti ha Ispiritun illidchon Apudyus kan chitaku, achipunla paogyaton chitaku, ngim siya langatod si ispiritun chi pallakabyelin ya ayat ya kilaalled taku.

8 Ked achika mabiin un malistigu mipanggop kan Apu takuʼn Jesu Kristu, ya achika bo mabiin kan sakon un libyaɏud gapu kan siya. Alusam cha ligat un mipachas taku si mangibyegbyeg-an taku si bibiɏuʼn chameg. Alusam, ti pakoscheɏon Apudyus sika. 9 Ya tilagula chitaku losan ya pililiyala chitaku un mantagula, chakampun un gapu si killingwa taku, ngim gapu si panggopla ya kachegula. Illidchola kan chitaku allaʼn kachegula mipagapu kan Jesu Kristu si chaampun chi lubung makwaan. 10 Ked sala langipain-ala kan chitaku si kachegula, ti ummali si Jesu Kristu un Malagu kan chitaku. Ked ilabyakla otoy ya imbyegbyegala bibiɏuʼn chameg un siya mangammuwan si biyeg un mallalayun.

11 Sakon chi chilutukan Apudyus un man-apostolesla ta ibyegbyegak ya itudtuchuk chi bibiɏuʼn chameg. 12 Ked siya gapun chi mapampaligatak si sala. Ngim achipulak mabiin, ti ammuk un Apudyus chi pilatik ya sigulachuwok un kabyeeɏala un ayyuwalan chi impiyeɏla kan sakon* 1:12 Ha uchum un piolaʼn uguchon si Greek ha impiyeɏk kan siya. inggala chumtong chi eɏgew un mangulilan Kristu kasin.

13 Ked masapuɏʼn popotpotam chi katuttuwaan un intudtuchuk kan sika ya ipapatim chi pammatim ya man-aayatlu si asintatagum ti lakatimpuyug taku kan Jesu Kristu. 14 Ked ha Ispiritun Apudyus un awed kan chitaku, tuɏungala sika un mangayyuwan kan cha lapotog un tudtuchu un impiyeɏla kan sika.

15 Tilagammum un tilelalak kan cha losan un illinggew ud probinsiyan chi Asia, ulay cha Phygelus kan Hermogenes.

16 Kacheguwan otyan Apudyus cha Onesiphorus un simbyeyan, ti inye-eɏgewla ummaliʼn lalegeg kan sakon. Achipun mabiin ulay lu labyaɏuchak, 17 ti ha gummatngala ud Rome, singsingngitla sakon inggala inchesalak. 18 Ya ammum bo losan chi in-ilolaʼn lansimbi kan sakon ud Ephesus. Ked kacheguwan otyan Apudyus siya si eɏgew un manguisala kan cha tagu.