1 Ammu taku un ulay matoy chi allaʼn long-eg taku un isun chi sigey, awed chi mallalayun un long-eg un bumɏoy ud langit un idchon Apudyus. Chakampun un tagu langwa ti Apudyus mismu langwa, ked mallalayun si ing-inggala. 2 Ya umayuwong taku un manguway si baruʼn long-eg un makwaʼn inggew ud langit. 3 Ti lu masilupan taku, achipun chitaku ochesan un lanlulusay. 4 Ti ha allaʼn mataguwan taku utla pita, mangngosya taku gapu si ligat taku, chakampun un gapu ta pion taku un matoy, ngim pion taku masukatan allaʼn long-eg takuʼn lalaka un matoy si mallalayun un long-eg un achipun matoy si ing-inggala. 5 Ked si Apudyus chi langisagala kan chitaku si mansukatan taku. Ked illidchola Ispiritula un iinggew kan chitaku un maluttuwaan taku si mangidchela.

6 Ked ulay silu makwa kan chitaku, pasig kami latuled. Ammu taku un ha inggewan taku utla pita un bumɏoyan chi allaʼn long-eg, adchayuwan taku si awechen Apu takuʼn Jesu Kristu. 7 Ti matagu kami un ichaɏan chi pammati, chakampun un cha mamàila. 8 Ked ulay lu silu makmakwa, latuled kami, ti labibbiɏuwonmi chi inggewanmi kan Apu Jesus lu allaʼn inggewanmi utla pita. 9 Siyad asikasuwon taku koon chi mampagalas kan Apudyus, ulay si salaʼn matattaguwan taku willu inggewan taku kan siya ud langit. 10 Ti losan taku sanguwon si Kristu si makuisan taku, ta kacha osa maatod kan siya subyalit chi killingwala si allaʼn mataguwala bibiɏu man willu lawwing.

11 Gapu ta ammumi un umogyat kan Apu Jesu Kristu, ked hachi mangipapattiyanmi un awison cha tagu ta mamaticha otyan. Ked ammun Apudyus chikami. Ked lamlamaok un katla bo pallakaammuyu kan chikami si somsomokmi. 12 Achipunmi panggop chi mangichayaw si long-egmi kan chikayu kasin. Ngim pionmi un idchen chikayu si wayayuʼn mangichayaw kan chikami, ta awed isongbyatyu kan cha tagu un mangipasweɏ si kilasasaedcha ya achipuncha potgon chi kilabiɏun chi somsomok. 13 Ti ulay kalan cha tagu un latingang kami, gapu si machayawan Apudyus. Ya lu kalanchaʼn laun-ulan somsomokmi, gapu kan chikayu. 14 Iturayan chikami si ayat Kristu ti lalaweg kan chikami un latoy si Kristu gapu si losan un tagu, piolaʼn uguchon, lakakatoy taku losan si latoyala. 15 Ked latoy siya para si losan taplu chitaku losan un matattagu, chakampun otyan un bumaɏuwan chi long-eg taku potgon taku, ngim siya otyan potgon taku chi pion Jesu Kristu un latoy ya ummuli latagu gapu kan chitaku.

16 Ked si sala, achipunmi ibilang chi ulay siluʼn tagu si kilasasaedla utla pita. Ulay lu katchi bo killingwami kan Kristu si sin-eɏgew, achipunmi koon si sala. 17 Ti ulay silu un mamati kan Kristu, bumaɏu kilatatagula ti lakaan chi sigud un lawwing un ugalila ked lasukatan si bibiɏuʼn ugali. 18 Si Apudyus chi langwa si losan un alla. Gapu kan Kristu inyulinla tagu kan siya. Ked illidchola kan chikami chi kawachi un mangiyulin si tagu kan siya. 19 Ha ibyegbyegami: Inyulin Apudyus cha tagu kan siya gapu kan Kristu. Achipun Apudyus imbilang cha byasuɏcha. Ked impiyeɏla kan chikami allaʼn chameg un mangiyulilan Apudyus kan cha losan un tagu kan siya. 20 Ked chikami libuun un mangipakaammu mipanggop kan Kristu. Ked si Apudyus mismu chi mangàaɏuk kan chikayu. Ked gapu si ngachen Kristu, kewayu ta mangulin kayu kan Apudyus. 21 Ti lappun pulus byasuɏn Kristu. Ngim gapu kan chitaku, impapus-anla kan siya cha losan un byasuɏ taku ta mangulin taku kan siya. Ked lipati taku si kilabiɏula.