1 Ha umulaʼn ibyegak, masapuɏʼn iluwaluwan taku cha losan un tagu. Chawaton taku ta kacheguwan Apudyus chicha ya manyaman taku kan Apudyus kan cha tuɏungla kan chicha. 2 Iluwaluwan taku bo cha papangat taku un mangituray kan chitaku ya losan un langatu saedcha taplu mallin-awa mambibiyeg taku ya lawaya taku un manchayaw ya mangipotog kan Apudyus ya mangwaan taku si bibiɏuʼn ugali. 3 Hachi ustuʼn luwalu ya siya mampagalas kan Apudyus un Malagu kan chitaku. 4 Ti piolaʼn matatagu cha losan un tagu ya maammuwancha katuttuwaan mipanggop kan siya. 5 Ti ossaan si Apudyus ya ossaan bo mampatimpuyug kan cha tagu kan Apudyus, siya si Jesu Kristu un lambyalin tagu. 6 Inchuyala biyegla ta malakala kan cha losan un tagu taplu achipun taku machusa. Hachiʼn killingwala, siya mangipain-an Apudyus un piolaʼn matatagu cha losan un tagu. Lakwa si ustu-ustuʼn timpu un ingkodchong Apudyus. 7 Ked gapu si hachi, lachutukalak un mangibyegbyega ya apostoles ta inyak ibyegbyega katuttuwaan mipanggop kan siya kan cha Gentil ta mamaticha. Tuttuwa cha allaʼn ibyegbyegak, chakampun un mantuntulliyak.

8 Ked si losan un man-um-ummungan cha mamati, piok un cha leɏaki malluwalu kan Apudyus un mampeɏkas chi somsomokcha ya achipuncha sumanga-sanga willu makasubo-subog.* 2:8 Ha uchum un piolan uguchon si Greek ked lappun bo makasangaancha willu manchuwachuwaancha.

9 Ked cha byebyai, masapuɏʼn ammancha ileɏam cha mansisilupcha ya ammucha un mabiin ya chakampun otyan un siyad potpotgoncha kilabiɏun chi buukcha ya ulay cha ekuschaʼn byalituk, bongeɏ ya mangkangilaʼn silup. 10 Ti ha mangitullongan si kilabiɏun chi byebyai ked ha bibiɏuʼn pin-ala koon, ti siya miyapot si byebyaiʼn mangibyega un chaychayawola si Apudyus.

11-12 Achipunku ipalubus cha byebyai un mantudtuchu kan cha leɏaki willu iturayancha cha leɏaki. Masapuɏʼn gumigillok cha byebyai ya ammancha manchochongngeɏ si mantudtuchu kan chicha ya masapuɏʼn mampakumbyabyacha. 13 Ti ha ummun-ula un killingwan Apudyus ked si Adam un leɏaki asila ot si Eve un byebyai.† 2:13 Genesis 2:7, 21-22 14 Ya chakampun un si Adam chi laallilaw ngim ha byebyai, ya siya ummun-ula lakabyasuɏ kan Apudyus.‡ 2:14 Genesis 3:1-6 15 Ked hachi gapula un mapaligatan chi byebyai lu umalak.§ 2:15 Ha uchum kalancha achipun abus cha umalakancha un mibyegbyega ngim pati bo ligatcha un ila. Ngim matagu lu ipapatila pammatila* 2:15 Ha uchum un piolaʼn uguchon si Greek, ngim matagucha lu kan Apudyus ya awed ayatla kan cha asintatagula ya laapudyusan chi somsomokla ya koola ustu.