1 Susuludmi, ammuyu un chakampun un kenga langgeggakayanmi utlat. 2 Ulay lapaligatan kami ya pilabiilan chikami kan cha taguʼd Philippi si sin-eɏgew, ya achu bo lalupling kan chikami utlat iliyu, ammuyu un illidchen Apudyus chikami si teɏod un mangibyegbyega si bibiɏuʼn chameg un lampeɏpu kan siya. 3 Ti tuttuwa cha ibyegbyegami, ked lappun somsomokmi un manguyung ya lappun somsomokmi si lawwing ya lappun panggopmiʼn sumikap. 4 Ngim pilaloklokan Apudyus un mantegochen kami un mangibyegbyega si bibiɏuʼn chameg, ked impiyeɏla un siya kawachiyonmi, ya siya ibyegbyegami. Chakampun un mas-oman cha tagu singtonmi, ngim ha mas-oman Apudyus un sin-ammu kan cha awed si somsomokmi. 5 Ammuyu un chakampun un ummali kami man-eɏ-eɏlug si langibyegbyeg-anmi, ya chakampun bo un mambyegbyega kami ta maleinmi si kilaagummi. Ammun Apudyus un tuttuwa cha allaʼn insuɏatku! 6 Ked chakampun un siyad singtonmi michayawanmi kan chikayu willu kan cha uchum un tagu, ulay awed kalobbonganmi un apostoles Kristu. 7 Ngim laalus kami kan chikayu un isun chi ila un mangayyuwan si alakla. 8 Gapu si ayatmi kan chikayu, lakasagala kami un mangibyegbyega kan chikayu si bibiɏuʼn chameg un lampeɏpu kan Apudyus, ya lakasagala kami un ulay matoy kami mipagapu kan chikayu ti lapotog kayu kan chikami. 9 Susulud, ammuk un sosomkonyu mangkakawachimi si illinggewanmi utlat, un eɏgewonmi ya lablabiyonmi un langkawachi taplu chakampun un mambyalin kami palikut kan chikayu si mangibyegbyeg-anmi si bibiɏuʼn chameg un lampeɏpu kan Apudyus.

10 Intutullongyu ya ammun Apudyus cha ugalimi kan chikayuʼn mamati utlat, ti lappun lakabyasuɏanmi, ustu killingwami ya lappun lachillawanmi si sangwalanyuʼn mamati. 11 Ammuyu cha langkokopyami kan chikayu, un isun chi mangkokopyan chi ama kan cha aalakla. 12 Silegegmi chikayu ya pilakoscheɏmi somsomokyu ya imbilibilinmi kan chikayu un masapuɏʼn umulud kayu si mambibiyeg un lumbong si tagun Apudyus, ti siya mangayeg kan chikayu taplu mipati kayu si mampangatala ya milak-am kayu si kilachayawla.

13 Ya awed bo osaʼn manyamyamalanmi kan Apudyus, si langngeɏanyu si ugud Apudyus un imbyegbyegami, pilatiyu ya achiyu kalan un ugud laing chi tagu ti lailasinyu un katuttuwaan un siya ugud Apudyus. Ked ha ugud Apudyus, ituɏutuɏuyla pabungabungaon chi biyegyuʼn mamati. 14 Susulud, man-iisu lakwa kan chikayu ya cha lakwa kan cha tagun Apudyus un lititimpuyug kan Jesu Kristu un pin-a lanchetchetong ud Judea, ti pilampaligatan chikayu kan cha kailiyanyu un isun bod chi lamampaligatan cha chogachaʼn Judio kan chicha. 15 Ti cha Judio lamatoy kan cha propetan Apudyus. Ked cha galakcha bo lamatoy kan Apu Jesus, ked cha chogacha boʼn Judio lamampaligat kan chikami. Achipuncha lakaay-ayu kan Apudyus ti suplingoncha cha losan un tagu 16 ti tipochoncha chikami si mangibyegbyeg-anmi si ugud Apudyus kan cha Gentil taplu matatagucha otyan. Ked hachi malogchog-ancha kan cha byasuɏcha inggala si mangkigachencha. Ked hachi asin Apudyus sumangaan ked sigulachuʼn chusaola chicha.

17 Susulud, ulay sin-akitan chi lisilaanmi kan chikayu, amod chi ayumi. Ulay lappun kami kan chikayu, pasigmi sosomkon chikayu. Gapu si ayumi kan chikayu, iggami kabyeeɏanmi un mangulin utlat taplu kasin taku man-asitullong. 18 Pionmi un kasin umali kan chikayu, sinchumadlu kan sakon, impadpachasku un umali ngim tilippotippod Satalas chikami. 19 Pionmi un umali ti chikayu lamlamami ya chikayu gumalasanmi ya chikayu gunggulami un isayawmi si sangwalan Apu takuʼn Jesus si kasinla umaliyan. 20 Ti tuttuwaʼn chikayu gapun chi michayawanmi ya chikayu bo mampagalas kan chikami.