1 Awed chi chingngeɏk un makmakwa utlat un keɏwingan, ti ulay cha achipun mamati, lappun kokòoncha si kamatlat. Ti chingngeɏk un awed kalu osa kan chikayu un pillosla pidwaʼn asawan amala. 2 Ked sissiya un ilaslastugyu kilabiɏuyu? Ked bumain kayu otyan ked peɏyawonyu siya si gimungyu. 3-4 Ulay lu lappulak utlat, isun chi awechak kan chikayu ti sosomkok chikayu. Ked gapu ta isun chi awechak kan chikayu, ya mipagapu bo si kalobbongak un illidchon Apu takuʼn Jesus, lagamputku chilusa chi halat un langwa si katchi. Ked lu magimung kayu, un isun chi lakagimungak kan chikayu si ispiritu, mipagapu si pallakabyelin Apu takuʼn Jesus Kristu un awed kan chitaku un mamati: 5 Ipuɏangyu hachiʼn leɏaki kan Satalas* 5:5 Ha piolaʼn uguchon lu ipuɏanglu osaʼn tagu kan Satalas ked kaalonyu siya si simbyaan. Itullongyu 1:19-20 mipanggop kan Himeneus kan alexander un lipuɏang kan satalas. ta kigedlaʼn mamaligat kan siya, ta matagu chi kalichodwala lu mangulin si Apu Jesu Kristu.

6 Ked ha ilaslastugyu un chikayu ga ustu, achipun kayu ustu. Ti ammuyu mit cha hachiʼn ugud un kalala, “Lu mikamos chi akit un yeast si arina, paboteɏola losan.” 7 Masapuɏʼn kaalonyu halat un chachaan un isun chi yeast, un byasuɏ, taplu kasin kayu machuɏsan kan Apudyus, ti katchi masapuɏ kan chikayuʼn lamati kan Jesu Kristu. Ti si Kristu lamayed kan chitaku, un isun chi keɏliluʼn lichatun kan Apudyus si timpun chi hachiʼn Piyastaʼn Mammammokan.† 5:7 Ha ugalin cha Judio si Piyastan Lallausan, masapuɏn ibyellucha yeast un inggew si byebbyeɏoycha ta mampeɏticha si keɏlilu si mabigat. Ked lu awed lagamput lapeɏtin keɏlilu, lawwik lu awed labun-an un yeast. 8 Ked si salaʼn mataguwan taku, man-awichen taku otyan cha losan un lawwing un pin-a taku koon. Ked ipapati taku un mangwa si ustu, ya popotpotan taku chi katuttuwaan.

9 Ha osaʼn suɏatku kan chikayu, imbyegak un achi kayu makabibiɏun kan cha taguʼn kachechegchegas.‡ 5:9 Inggew chi inggilin Paul kan cha simbyaan ud Corinth un ummula lu allaʼn suɏat, ngim libilang un ummulan suɏat kan chicha, ti lappun ammumi lu simma awed. 10 Ngim achipunku kalan un achi kayu makabibiɏun kan cha achipun mamati, un kachechegchegas willu maagum willu akkawan willu cha malaychayaw si silan-apudyus. Ti ma in-ilola lu achipun kayu makabibiɏun, achi kappay masapuɏʼn telanyu allaʼn lubung! 11 Ngim ha piok un kalan, achi kayu otyan mikama kan cha mangibyega un mamaticha ked siyad pin-acha koon cha lawwing un isun chi makachegchegas, maagum, malaychayaw si silan-apudyus, lakiyap, kabubuuk ya akkawan. Ulay kakan achi kayu miyubung kan chicha.

12-13 Ti lappun mit biyang taku un manguis kan cha chakampun un kadwa takuʼn mamati, ti kiged Apudyus un manguis ya malusa kan chicha. Ngim chitakuʼn mamati, kalobbongan taku un manguis kan cha kadwa takuʼn pin-a makagimung. Ti ha liigili un ugud Apudyus, kalala, “Peɏyawonyu lawwing chi pin-ala koon kan chikayuʼn pin-a manchetchetong.”§ 5:12-13 Deut. 17:7