1 Sɔɔlɩ lɑŋlɛ kɑ hɛɛnɑ Ɩtiyɛɛnɩ kʋɣʋ.

Kʋyɑkʋ ŋkʋ kʋ mɑɣɑmɑɣɑ kɛ pɑ sʋʋ Yosɑlɛm Yesu sɛɛlɑɑ kpekǝle kɛ kʋnyɔŋ tʋɣʋ kɛ teu. Ɩlɛnɑ pɑ tǝnɑ pɑ́ yɑ Yutɑ nɑ Sɑmɑlii tɑɑ, nɑ pǝ yele tillɑɑ tike. 2 Ḿpʋ́ɣʋ́ yǝlɑɑ mpɑ pɑ tǝŋǝɣɩ Ɩsɔ mpɑɑʋ kɛ teu tɔ pɑ pimɑ Ɩtiyɛɛnɩ, nɑ pɑ́ wii-ɩ sɔsɔm.

3 Amɑ pǝ yelɑ Sɔɔlɩ ɩ́lɛ́ tɔ, Yesu sɛɛlɑɑ kɛ ɩ tɔŋnɑ lʋpʋ sɩ ɩ lɑkɩ sɑkɑsɑkɑ. Tɛɛsɩ tɑɑ kɛ́ ɩ sʋʋkɑɣɑ nɑ ɩ́ kpɑɑkɩ ɑpɑlɑɑ nɑ ɑlɑɑ nɑ ɩ́ tǝkǝɣɩ.

4 Mpɑ mpɑ pɑ yɑ mpʋ tɔ pɑ cɔɔkɑɣɑ pɑɑ le nɑ pɑ́ heeliɣi Ɩsɔ Tɔm Lɑɑpɑɑlɩ Kʋpɑŋ. 5 Sɑmɑlii ɩcɑtɛ kɛ Filipʋ nɑ́ polɑɑ nɑ ɩ́ heeliɣi tǝnɑ nyǝ́mɑ kɛ Mesii tɔm. 6 Piti tǝmɑ nnɑ Filipʋ lɑkɑɣɑ tɔ sɑmɑɑ nɩɩ ɑ tɔm nɑ pɑ́ nɑnɑ pɑ ɩsɛ. Pǝ tɔɔ kɛ́ wɑɑtʋ wei ɩ́ yɔɣɔtǝɣɩ, pɑ tǝnɑ tǝpɑɩ pɑ tʋɣɩ ŋkpɑŋʋɣʋ kɛ teu. 7 Pǝ tɑɣɑ pʋlʋ, ɑlɔɣɑɑ kiisɑɣɑ nɑ pɑ́ seeki ɑlɔɣɔhilɑɑ pɑɣɑlɛ kiŋ nɑ ɑcɑmɑɑ nɑ kɑɑkɑlɑsɩ pɑɣɑlɛ hikɑ ɑlɑɑfǝyɑ. 8 Ḿpʋ́ɣʋ́ yǝlɑɑ lɑŋɑ hʋlʋmɑ kɑtɑtǝlɑɣɑ, hɑlǝnɑ pǝ́ lɑ ɩcɑtɛ ntɛɣɛ yuŋ.

9 Apɑlʋ nɔɣɔlʋ nɑɑ wɛ ɩcɑtɛ ńtɛ́ tǝ tɑɑ kɛ́ hɑtoo lɔŋ, pɑ yɑɑkɩ-ɩ sɩ Simɔŋ. Apɑlʋ ɩnɩ ɩ lɑkɑɣɑ topotopo tǝmɑ kɛ́, nɑ pǝ lɑkɩ Sɑmɑlii nyǝ́mɑ tǝnɑɣɑ piti. Ɩ nyǝnɑɣɑ ɩ tǝɣɩ sɔsɔ kɛ́ pǝ tii fɛɩ. 10 Pǝ kpɑɣɑʋ piyɑ nɑ pǝ́ polo sɔsɑɑ tɔ pɑ tǝnɑ pɑ wutɑɣɑ-ɩ kɛ́. Hɑlǝnɑ yǝlɑɑ tɔŋɑɣɑ sɩ: Ɩsɔ tomɑ nnɑ pɑ yɑɑ tomɑ sɔsɔɔnɑ tɔ ɑ tʋ ntɔ.

11 Ɩlɛnɑ pɑ́ wutiɣi Simɔŋ ɩnɩ ɩ wɑɑlɩ. Pǝ tɑɣɑ pʋlʋ, ɩ topotopo tǝmɑ kɑ tɛmnɑ-wɛɣɛ piti lɑpʋ kɛ hɑtoo lɔŋ. 12 Amɑ Filipʋ kɔmɑ nɑ ɩ́ heeliɣi-wɛɣɛ Ɩsɔ Kɑwulɑɣɑ nɑ Yesu Kilisiti pǝ Lɑɑpɑɑlɩ Kʋpɑŋ tɔ pɑ mʋ Lɑɑpɑɑlɩ Kʋpɑŋ ɩnǝɣɩ teu, hɑlǝnɑ pɑ́ sɔ ɑpɑlɑɑ nɑ ɑlɑɑ kɛ Ɩsɔ lʋm. 13 Simɔŋ ɩ́lɛ́ ɩ mɑɣɑmɑɣɑ ɩ mʋwɑ nɑ pɑ́ sɔ-ɩ Ɩsɔ lʋm. Ɩlɛnɑ ɩ́ sʋʋ Filipʋ kɛ tǝŋʋɣʋ nɑ ɩ nyǝnɑɣɑ Ɩsɔ kɔkɔlɔnɑɑ sɔsɑɑ nɑ piti tǝmɑ nnɑ ɑ lɑkɑɣɑ tɔ nɑ pǝ wɛ-ɩ piti.

14 Tillɑɑ mpɑ pɑɑ wɛ Yosɑlɛm tɔ pɑ nɩɩwɑ sɩ Sɑmɑlii nyǝ́mɑ mʋ Ɩsɔ Tɔm, ɩlɛnɑ pɑ́ kʋsɩ Piyɛɛ nɑ Yohɑɑnɩ nɑ pɑ́ tili sɩ pɑ́ polo nɑ pɑ́ nɑ́. 15 Piyɛɛ pɑ tɑlɑ tǝnɑ, ɩlɛnɑ pɑ́ sǝlǝmǝnɑ Sɑmɑlii nyǝ́mɑ mpɛɣɛ Ɩsɔ sɩ pɑ́ hiki Feesuɣu Nɑŋŋtʋ. 16 Pǝ tɑɣɑ pʋlʋ, Tɑcɑɑ Yesu hǝtɛ tike kɛ pɑɑ yɑɑwɑ nɑ pɑ́ sɔnɑ-wɛɣɛ Ɩsɔ lʋm. Ɩlɛ Feesuɣu Nɑŋŋtʋ tɑ tiitɑ pɑ tɑɑ nɔɣɔlʋ ɩ tɔɔ. 17 Tǝnɑɣɑ Piyɛɛ nɑ Yohɑɑnɩ pɑ tǝnɑ niŋ kɛ pɑ tɔɔ. Ɩlɛnɑ pɑ́ hiki Ɩsɔ Feesuɣu Nɑŋŋtʋ.

18 Wɑɑtʋ wei Simɔŋ nɑwɑ sɩ tillɑɑ tǝnɑ-wɛɣɛ niŋ nɑ pɑ́ hiki Feesuɣu Nɑŋŋtʋ tɔ, ɩ cɛlɑ-wɛɣɛ liɣitee, 19 nɑ ɩ́ tɔ sɩ: Ɩ́ cɛlɛ mɑɣɑ mpʋ ɩnɩ pǝ lɑpʋ tɔtɔ, nɑ mɑ́ tǝnɑ wei kɛ́ niŋ, pʋntʋ hiki Feesuɣu Nɑŋŋtʋ kɛ mpʋ.

20 Tǝnɑɣɑ Piyɛɛ tɔmɑ sɩ: Ɩsǝnɑ mpi n hʋʋʋ sɩ pɑ pǝsǝɣɩ pɑ́ yɑ Ɩsɔ hɑtɛ nɑ liɣitee tɔ, nyɑ́ nɑ nyɑ́ liɣitee ɩ́ lɑ yem. 21 N kɑɑ nɑ pʋlʋ cǝcǝkɑ. Pǝyele nyɑ́ pɑɑ mɑɣɑmɑɣɑ tɩɩ fɛɩ tǝnɛ ɩnɩ tǝ tɑɑ. Pǝ tɑɣɑ pʋlʋ, Ɩsɔ ɩsɛntɑɑ nyɑ́ lotu tɑ te. 22 Ɩlɛ lɔ nyɑ́ hʋwɛɛ ɑsɑɣɛɛ ɑnɩ, nɑ ń wiinɑ Tɑcɑɑ nɑ ɩ́ hʋlɩ-ŋ suulu nɑ ɩ́ tɑɣɑnɩ-ŋ nyɑ́ hʋwɛɛ ɑsɑɣɛɛ ɑnɩ. 23 Pǝ tɑɣɑ mpʋ, mɑ nɑɑkʋɣʋ-ŋ tɔ, nyɑ́ nɑ nyɑŋ kɛ́ ɩsɩɩ kɑkɑɣɑ. Ɩsɑɣɑtʋ lɑpʋ tɔkǝnɑ-ŋ tǝkem.

24 Ḿpʋ́ɣʋ́ Simɔŋ cɔ-wɛ sɩ: Mɩɩ wiinɑ-m nɑ Tɑcɑɑ, nɑ nti ɩ́ yɔɣɔtɑ mpʋ tɔ tǝ tɑɑ nɑtǝlɩ ɩ́ tɑɑ lɑ-m.

25 Tillɑɑ mpɛ pɑ nɑɑlɛ pɑ tɛmɑ nti nti pɑ nɑwɑ tɔɣɔ kɛɛsʋɣʋ nɑ wɑɑsʋ lɑpʋ. Ɩlɛnɑ pɑ́ kʋlɩ nɑ pɑ́ mǝlɩ Yosɑlɛm. Pɑ mǝlɑɣɑ mpʋ tɔ, pɑ heelɑɣɑ Lɑɑpɑɑlɩ Kʋpɑŋ kɛ Sɑmɑlii ɑcɑlɛɛ pɑɣɑlɛ tɑɑ kɛ́ nɑ pɑ́ tɔŋnɑ pote.

26 Tɑcɑɑ ɩsɔtɑɑ tillu nɔɣɔlʋ heelɑ Filipʋ sɩ: Kʋlɩ nɑ ń tǝŋ ilim mpǝtǝŋ tɔɔ, nɑ ń kɑtɩ hɑpǝlɛ nte tǝ lɩɩkɩ Yosɑlɛm nɑ tǝ puki Kɑsɑ tɔ. Wʋlɑɣɑ tɛtʋ tɑɑ kɛ́ hɑpǝlɛ ńtɛ́ tǝ fɑɣɑnɑɑ.

27 Ḿpʋ́ɣʋ́ Filipʋ kʋlɑɑ nɑ ɩ́ tʋ mpɑɑʋ. Ɩ tɔŋnɑ pote, ɩlɛ ɩ nɑwɑ yʋlʋ nɔɣɔlʋɣʋlɛ. Sɛsɛ Ɩtiyopii yʋlʋ kɑtɑŋɑ ntɛ́. Ɩnɩ ɩ kɑ kɛnɑ Ɩtiyopii wulɑʋ sɔsɔ ɑlʋ nyǝŋ wei pɑ yɑɑ sɩ Kɑntɑsɩ tɔ ɩ ɑkewe sɔsɔ, wei ɩ nyǝnɑɣɑ ɩ kpɑncoou tǝnɑ tɔɔ tɔ. Apɑlʋ ɩnɩ ɩ kɑ lɩɩnɑ Yosɑlɛm kɛlɛ Ɩsɔ sɛɛʋ. 28 Ɩ cɑɣɑ ɩ kɛɛkɛ tɑɑ, nɑ ɩ́ kɑlǝɣɩ Ɩsɔ kʋyɔɣɔtʋtʋ tɛlǝsʋlʋ Ɩsɑyii tɑkǝlɑɣɑ tɑɑ nɑ ɩ́ tɔŋnɑ kpente. 29 Tǝnɑɣɑ Feesuɣu Nɑŋŋtʋ heelɑ Filipʋ sɩ: Tɔ nɑ ń kpǝtǝnɑ kɛɛkɛ ɩnɩ.

30 Ḿpʋ́ɣʋ́ Filipʋ kpɑɣɑ ɑsewɑ nɑ ɩ́ tɑlɑ ɩ kiŋ, nɑ ɩ́ nɩɩ ɩ tɔŋnɑ Ɩsɔ kʋyɔɣɔtʋtʋ tɛlǝsʋlʋ Ɩsɑyii tɑkǝlɑɣɑ tɑɑ kɛ́ kɑlʋɣʋ. Ɩlɛnɑ ɩ́ pɔɔsɩ-ɩ sɩ: N cɛkǝnɑ nti n kɑlǝɣɩ tɔɣɔlɛ?

31 Ḿpʋ́ɣʋ́ yʋlʋ kɑtɑŋɑ cɔ Filipʋ sɩ: Ye nɔɣɔlʋ tɑ sɛɣɛsɩ-m, ɩsǝnɑɣɑ mɑɑ lɑ nɑ mɑ́ cɛkǝnɑ?

Ɩlɛnɑ yʋlʋ kɑtɑŋɑ tɔ Filipʋ sɩ: Kpɑ nɑ ń cɑɣɑ mɑ kiŋ. 32 Tɔm nti ɩ kɑlɑɣɑ tɑkǝlɑɣɑ ŋkɛ kɑ tɑɑ tɔɣɔlɛ sɩ:

35 Ɩlɛnɑ Filipʋ sʋʋ yɔɣɔtʋɣʋ, nɑ ɩ́ kpɑɣɑ tɔm nti ɩnɩ ɑpɑlʋ ɩnɩ ɩ kɑlɑɣɑ mpʋ tɔ, nɑ ɩ sɛɣɛsǝnɑ-ɩ Yesu Lɑɑpɑɑlɩ Kʋpɑŋ. 36 Pɑ tɔŋnɑ tɔntɛ kɛ mpʋ, ɩlɛnɑ pɑ́ tɑlɑ tiili ɩsǝntɔ, lʋm kɑ wɛ tǝnɑɣɑ. Ḿpʋ́ɣʋ́ ɑkewe ɩnɩ ɩ tɔmɑ sɩ: Nyǝnɩ lʋm yee, n kɑɑ sɔ-m Ɩsɔ lʋm kɛ cǝnɛɣɛ kpɑkpɑɑ? Yɑɑ pǝ kɑɑsɑ-m pʋlʋ?

[ 37 Ɩlɛnɑ Filipʋ cɔ yʋlʋ kɑtɑŋɑ sɩ: Ye n tɛmɑ nyɑ́ tɑɑ tǝkpɑtɑɑ te, mɑ́ sɔɔ-ŋ kɛ́.

Ḿpʋ́ɣʋ́ yʋlʋ kɑtɑŋɑ cɔwɑ sɩ: Mɑ tɛmɑ mɑ tɑɑ sɩ Yesu Kilisiti kɛ́ Ɩsɔ Pǝyɑɣɑ kɛ́.]

38 Tǝnɑɣɑ yʋlʋ kɑtɑŋɑ sǝŋsɑ kɛɛkɛ nɑ Filipʋ nɑ ɑkewe ɩnɩ pɑ́ tii pɑ nɑɑlɛɣɛ lʋm tɑɑ, nɑ Filipʋ sɔ-ɩ Ɩsɔ lʋm. 39 Pɑ lɩɩnɑ lʋm tɑɑ, ɩlɛnɑ Tɑcɑɑ Feesuɣu kɛlɩ Filipʋ, ɑkewe ɩnɩ ɩ tɑ tɑsɑ-ɩ keesuɣu. Ḿpʋ́ɣʋ́ ɩ tʋ ɩ mpɑɑʋ nɑ lɑŋhʋlʋmlɛ kʋɣɩ-ɩ. 40 Amɑ Filipʋ nɑ́ tutɑ ɩ tǝɣɩ Asoto, nɑ ɩ́ lɑkɩ wɑɑsʋ kɛ ɑcɑlɛɛ nnɑ nnɑ ɑ tɑɑ ɩ tǝŋnɑɑ tɔ, hɑlǝnɑ ɩ́ tɑlɑ Sesɑlee.