1 Yesu lɩɩnɑ pʋɣʋ tɔɔ nɑ ɩ́ tii, ɩlɛnɑ sɑmɑɑ sɔsɔ tʋ ɩ wɑɑlɩ. 2 Tǝnɑɣɑ tɔnʋɣʋ tɔɔ ɑsilimɑ kʋtɔŋ tʋ nɔɣɔlʋ ɩ kpǝtǝnɑ-ɩ nɑ ɩ́ sopi ɩ tɛɛ nɑ ɩ́ tɔmɩ-ɩ sɩ: Tɑcɑɑ, ye n kɑ tisɑɣɑ n tɑɑ wɑɑsɩ-m?

3 Ḿpʋ́ɣʋ́ Yesu kʋsɑ niŋ nɑ ɩ́ tokinɑ ɑsilimɑ kʋtɔŋ tʋ ɩnɩ nɑ ɩ́ cɔ-ɩ sɩ: Teu mɑ tisɑɑ, ɑlɑɑfǝyɑ ɩ́ lɑ.

Tǝnɛ ɩnǝɣɩ pǝ wɑɑ ɑpɑlʋ ɩnǝɣɩ kpɑkpɑɑ. 4 Ɩlɛnɑ Yesu kpɑɑlɩ-ɩ teu sɩ: Tɑɑ heeli nɔɣɔlʋ. Amɑ tɛɛ kpɑkpɑɑ nɑ kɔtʋlʋ nɑ-ŋ. Ɩlɛnɑ ń yiɣisi ɩsɩɩ Moisi kɑ kɛɛsʋɣʋ tɔ nɑ pɑ́ nɑ́ sɩ pǝ wɑɑ-ŋ.

5 Yesu sʋʋkɑɣɑ Kɑpǝnɑhum, ɩlɛnɑ Lom yoolɑɑ nyʋɣʋ tʋ nɔɣɔlʋ kpǝtǝnɑ-ɩ nɑ ɩ́ wiinɑ-ɩ 6 sɩ: Tɑcɑɑ, mɑ yom nɔɣɔlʋ hǝntɑ tǝyɑɣɑ. Kʋtɔŋ kʋtʋʋlʋɣʋ tɔkǝnɑ-ɩ nɑ ɩ́ sɑlǝmǝɣɩ teu. 7 Yesu cɔ-ɩ sɩ: Mɑɑ polo nɑ mɑ́ wɑɑsɩ-ɩ.

8 Tǝnɑɣɑ yoolɑɑ nyʋɣʋ tʋ ɩnɩ ɩ pǝsǝnɑɑ sɩ: Tɑcɑɑ, mɑ tɑ tɑlɑ sɩ ń sʋʋ mɑ tǝyɑɣɑ. Amɑ yɔɣɔtɩ kʋyɔɣɔtʋ kɛ tɔm kʋlʋm nɑ mɑ yom hiki ɑlɑɑfǝyɑ. 9 Mɑ́ ɩsǝntɔ mɑ see mɑ sɔsɑɑ kɛ́. Pǝ́cɔ́ mɑ wɛnɑ mɑ sǝkpemɑ nɑ pɛlɛ pɑ́ lɑkɩ mɑ luɣu nyǝntʋ. Mɑ́ heelɑ pɑ tɑɑ wei sɩ ɩ́ polo cǝnɛ, ɩ́lɛ́ ɩ puki kɛ́. Mɑ́ heelɑ wei sɩ ɩ́ kɔɔ, ɩ́lɛ́ ɩ kɔɔ tɔtɔ. Pǝ́cɔ́ ye mɑ heelɑ mɑ yom sɩ ɩ́ lɑ pǝnɛ, ɩ lɑkɩ kɛ́.

10 Yesu nɩɩ tɔm tǝnɛ, ɩlɛnɑ ɩ́ pǝsǝnɑ mpɑ pɑ tǝŋɑɣɑ-ɩ tɔ pɑ tɔɔ nɑ ɩ́ tɔ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ. Mɑ tɑ nɑtɑ yʋlʋ kɛ Ɩsɛɣɛlɩ nyǝ́mɑ tɑɑ nɑ ɩ́ tɛmɑ ɩ tɑɑ nɑ Ɩsɔ kɛ́ ɩsǝntɔ. 11 Mɑ heeliɣi-mɛ tɔtɔ sɩ, pɑɣɑlɛ kɑ́ lɩɩnɑ ilim tǝlɩɩlɛ nɑ ilim tǝtʋlɛ, nɑ pɑ́ nɑ Apǝlɑhɑm nɑ Ɩsɑɑkɑ nɑ Yɑkɔpʋ pɑɑ cɑɣɑ tɔɣɔʋ kɛ ɩsɔtɑɑ Kɑwulɑɣɑ tɑɑ. 12 Amɑ mpɑ pɑɑ kɛ́ Kɑwulɑɣɑ nyǝ́mɑ tɔ pɑɑ lɔ-wɛɣɛ ɑwɑlɩ kɛ́ sǝkpɛtʋɣʋ tɑɑ, timpi pɑɑ cɑsǝɣɩ kɑpusi nɑ pɑ́ nyɑsǝɣɩ pɑ tǝɣɩ kelɑ tɔ.

13 Ḿpʋ́ɣʋ́ Yesu heelɑ yoolɑɑ nyʋɣʋ tʋ sɩ: Kpe, ɩsǝnɑ mpi n tɛmɑ nyɑ́ tɑɑ nɑ Ɩsɔ tɔ pɩɩ lɑ ḿpʋ́ɣʋ́ teitei.

Wɑɑtʋ ɩnɩ ɩ mɑɣɑmɑɣɑ kɛ pǝ wɑɑ yoolɑɑ nyʋɣʋ tʋ yom.

14 Ḿpʋ́ɣʋ́ Yesu polɑ Piyɛɛ tǝyɑɣɑ, nɑ ɩ́ mɑɣɑnɑ wɑtʋ wɛnɑ Piyɛɛ yɔsɔ nɑ ɩ́ hǝntɑɑ. 15 Ḿpʋ́ɣʋ́ Yesu tokinɑ kʋtɔntʋ niŋ nɑ ɩ wɑtʋ yɑ kpɑkpɑɑ. Ɩlɛnɑ ɩ́ kʋlɩ nɑ ɩ́ cɑlǝsɩ-wɛ.

16 Tɑɑnɑɣɑ tɑɑnɑɑ ɩlɛnɑ pɑ́ kɔnɑ Yesu kɛ ɑlɔɣɔhilɑɑ pɑɣɑlɛ. Nɑ ɩ́ yɔɣɔtɩ kʋyɔɣɔtʋ nɑ ɑlɔɣɑɑ se, nɑ ɩ́ wɑɑ kʋtɔntʋnɑɑ tǝnɑ tɔtɔ. 17 Ɩ lɑpɑ mpʋ sɩ pǝ́ lɑ nti Ɩsɔ kʋyɔɣɔtʋtʋ tɛlǝsʋlʋ Ɩsɑyii kɑ yɔɣɔtɑɑ tɔ sɩ: Ɩ lǝsɑ tɑ́ ɩcɑntʋ nɑ ɩ́ lɔ, nɑ ɩ́ mʋ tɑ kʋtɔmǝŋ.

18 Yesu nɑ́ sɑmɑɑ kotinɑ-ɩ, ɩlɛnɑ ɩ́ tɔ-wɛ sɩ pɑ́ tɛsɩ teŋku nɑ wɑɑlɩ. 19 Ḿpʋ́ɣʋ́ Ɩsɔ Tɔm sɛɣɛsǝlʋ nɔɣɔlʋ ɩ kpǝtǝnɑ Yesu nɑ ɩ́ tɔ sɩ: Tɑcɑɑ, mɑɑ tǝŋǝɣɩ-ŋ nyɑ́ tǝpote tǝnɑ tɑɑ.

20 Yesu cɔ Ɩsɔ Tɔm sɛɣɛsǝlʋ ɩnɩ sɩ: Sɔɔŋ wɛnɑ ɩ lonɑ nɑ sumɑsɩ wɛnɑ sɩ tɑnɑ. Amɑ Yʋlʋ Pǝyɑɣɑ mɑ́, mɑ fɛɩnɑ nyʋɣʋ tǝtʋlɛ mɑɣɑmɑɣɑ.

21 Tǝnɑɣɑ Yesu ɩfɑlɑɑ tɑɑ nɔɣɔlʋ nɑ́ tɔmɑ-ɩ sɩ: Tɑcɑɑ yele nɑ mɑ́ polo nɑ mɑ́ pi mɑ cɑɑ nɑ pǝ́cɔ́.

22 Ɩlɛnɑ Yesu cɔ-ɩ sɩ: Tǝŋɩ-m nɑ ń yele nɑ sǝtɑɑ pi pɑ sǝtɑɑ.

23 Ḿpʋ́ɣʋ́ Yesu nɑ ɩ ɩfɑlɑɑ pɑ sʋʋ kpɩɩlʋɣʋ tɑɑ. 24 Tǝnɑɣɑ heelim sɔsɔɔm kʋlɑ teŋku tɔɔ nɑ lʋm holɑ wɑɑsǝɣɩ kpɩɩlʋɣʋ. Amɑ pǝ pɑmnɑ Yesu tooki. 25 Ḿpʋ́ɣʋ́ ɩ ɩfɑlɑɑ polɑɑ nɑ pɑ́ feesi-ɩ nɑ pɑ́ tɔmɩ-ɩ sɩ: Tɑcɑɑ, yɑ-tʋ, tǝ lepɑɣɑ.

26 Ɩlɛnɑ Yesu cɔ ɩ ɩfɑlɑɑ sɩ: Pepe tɔɔ kɛ́ sɔɣɔntʋ kpɑɑ-mɛ? Ɩ́ tɑ́ tɛ Ɩsɔ nɑ mǝ tɑɑ nɑ pǝ tɔɔ suwe? Ḿpʋ́ɣʋ́ ɩ kʋlɑɑ nɑ ɩ́ kɑlǝnɑ heelim nɑ lʋm, nɑ pǝ tǝnɑ pǝ hɛɛ tǝli. 27 Ɩlɛnɑ piti kpɑ pɑ tǝnɑ nɑ pɑ́ pɔɔsǝɣɩ sɩ: Aweɣe ɩnɛ ɩnɩ nɑ pǝ́ kpɛŋnɑ heelim nɑ teŋku lʋm nɑ pǝ́ nɩɩkǝnɑ-ɩ?

28 Yesu tɛsɑ teŋku kʋteŋ lɛŋkʋ tɔɔ kɛ́ Kɑtɑlee nyǝ́mɑ tɛtʋ tɑɑ. Ɩlɛnɑ ɑpɑlɑɑ nɑɑlɛ lɩɩnɑ pǝlɑɑŋ tɑɑ nɑ pɑ́ sǝŋǝɣɩ-ɩ. Apɑlɑɑ mpɛ pɑɑ hii ɑlɔɣɑɑ kɛ́, nɑ pɑ nyɑŋ wɛ sɔɣɔntʋ. Yǝlɑɑ cɔlɑɣɑ pɑ mpɑɑʋ ŋkʋɣʋ. 29 Tǝnɑɣɑ pɑ sʋʋ kiisuɣu sɩ: Ɩsɔ Pǝyɑlʋ, tɑ nɑ-ŋ suwe? N kɔmɑ sɩ n tʋɣɩ-tʋɣʋ wɑhɑlɑ nɑ pǝ wɑɑtʋ mɑɣɑmɑɣɑ tɑ tɑtɑ?

30 Pǝ pɑmnɑ ɑfɑnɑɑ kɑlǝkʋ sɔsɔɔʋ nɑkʋlɩ kɩɩ wɛ pǝ cɔlɔ tǝnɑ nɑ kʋ tuliɣi. 31 Ḿpʋ́ɣʋ́ ɑlɔɣɑɑ wiinɑ Yesu sɩ: Ye n kɑ́ tɔɣɔnɩ-tʋ, yele nɑ tǝ́ sʋʋ ɑfɑnɑɑ kɑlǝkʋ kʋnɛ kʋ tɑɑ.

32 Yesu cɔ-wɛ sɩ: Ɩ́ polo. Ɩlɛnɑ pɑ́ se ɑpɑlɑɑ nɑɑlɛ ɩnɩ ɩ wɑɑlɩ nɑ pɑ́ tɛɛnɑ ɑfɑnɑɑ tɑɑ. Ɩlɛnɑ ɑfɑnɑɑ tʋ cɑsǝlɛ kɛ yem kɛ kpɑkpɑɑ, nɑ pɑ́ tii kɑlɑkɑlɑ nɑ pɑ́ tʋ lʋm nɑ pɑ́ sɩ.

33 Ḿpʋ́ɣʋ́ ɑfɑnɑɑ tiikilɑɑ nɑ́ lomɑ kpɑkpɑɑ nɑ pɑ́ polo ɩcɑtɛ tɑɑ, nɑ pɑ́ kɛɛsɩ pǝ tǝnɑ mpi pǝ lɑpɑ tɔ, nɑ ɩsǝnɑ ɑlɔɣɑɑ mpɛ pɑ tɔm lɑpɑ tɔ. 34 Tǝnɑɣɑ ɩcɑtɛ nyǝ́mɑ tǝnɑ lɩɩwɑ sɩ pɑ sǝŋǝɣɩ Yesu. Pɑ nɑ-ɩ, ɩlɛnɑ pɑ́ tɛɛkɩ-ɩ sɩ ɩ́ lɩɩ pɑ tɛtʋ tɑɑ.