2 Pepe mǝlǝɣǝnɑ-m ɩsɩɩ too ɩlɛ,

sɑɑ wei Tɑcɑɑ feŋɑɣɑ mɑ tɔɔ,

3 nɑ ɩ fǝtǝlɑ mʋɣɩ mɑ nyʋɣʋ tɑɑ tɔ.

Mɑ tɔŋɑɣɑnɑ ɩ nyɑɑlǝm kɛ ɑhoo kɛ́.

4 Ye pɩɩ mǝlɑɣɑnɑ-m mɑ wule tɑɑ,

ɩsɩɩ wɑɑtʋ wei Ɩsɔ yɑɑkɑɣɑ-m ɩ tɑɑpɑlʋ,

nɑ ɩ́ feŋiɣi mɑ tǝyɑɣɑ tɔɔ tɔ.

5 Tomɑ tǝnɑ tʋ kɑ wɛ mɑ kiŋ,

nɑ mɑ piyɑ tʋ-m hɛkʋ.

6 Nɑɑlǝm kɑ tɔlǝnɑ-m kɛ́ tǝhɔ,

nɑ nim kpeŋ pǝ tǝnyɑɑsǝlɛ kɛ kʋkpɑmʋɣʋ tɔɔ.

7 Wɑɑtʋ wei mɑ lɩɩkɩ nɔnɔɣɔ tɛɛ sɩ,

mɑ cɑkɩ ɩcɑtɛ sɔsɑɑ tǝcɑɣɑlɛ tɔ.

8 Ye pɑ nɑ-m, ɩfepiyɑ nɑ́ hɛlǝɣɩ kɛ́,

nɑ kʋkpɑtǝlɑɑ nɑ́ɑ́ kʋlǝɣɩ nɑ pɑ́ sǝŋǝɣɩ.

9 Kʋpɑɣɑlɑɑ nɑ suŋɑɣɑ yɔɣɔtɑɣɑ,

nɑ pɑ́ kpɑɑkɩ nɔɔsɩ.

10 Awulɑɑ mɑɣɑmɑɣɑ nɑ́ suŋɑɣɑ kɛ́,

nɑ pɑ nsǝmɑ mɑtǝnɑ pɑ tɑntɑhɑɑŋ.

11 Mpɑ pɑ nɩɩkɑɣɑ mɑ tɔm tɔ, pɑ yɑɑkɑɣɑ-m leleŋ nɩɩlʋ kɛ́.

Mpɑ pɑ nɑɑkɑɣɑ-m tɔ, pɑ lǝsǝɣɩ mɑ ɑseetɑ.

12 Mpi tɔ, ye kʋnyɔntʋ wiiki mɑ wɑɑsǝɣɩ-ɩ kɛ́.

Mɑ sǝŋnɑ sulɑʋ wei ɩ fɛɩnɑ pɑɑsǝnlʋ tɔ.

13 Mpɑ pɑ cɑɑkɩ sǝpʋ tɔ,

pɑ kooliɣi-m kʋpɑntʋ kɛ́,

nɑ mɑ́ hɛɛsǝɣɩ leelɑɑ lɑŋɑ.

14 Siɣisuɣu kɛ mɑ suuwɑ ɩsɩɩ toko,

nɑ tɑmpɑnɑ tǝŋʋɣʋ, ɩsɩɩ cɑpɑ nɑ kɑhukɑ.

15 Mɑɑ wɛɛ kɛ́ ɩsɩɩ yʋlʋm ɩsǝlɛ.

Mɑɑ wɛɛ ɩsɩɩ kɑɑkɑlɑɣɑ nɔɔhǝlɛ.

16 Mɑɣɑlɛ kʋnyɔntʋnɑɑ cɑɑ.

Mɑ pɑɑsǝɣǝnɑ mpɑ mɑ tɑ nyɩ tɔ, pɑ tɔm kɛ teu.

17 Mɑ yɔkǝɣɩ ɑsɑɣɑɑ tɑmɑsɩ,

nɑ mɑ́ wɔɣɔsǝɣɩ tɔɣɔnɑɣɑ kɛ pɑ kelɑ tɑɑ.

18 Mɑ tɔŋɑɣɑ sɩ mɑɑ kpɑtǝlɩ kɛ́ tǝkuŋkuŋku.

Mɑɑ sɩ mɑ tɑntɛ tɑɑ ɩsɩɩ sumɑɣɑ.

19 Mɑ wɛɛ kɛ́ ɩsɩɩ tʋɣʋ ŋku kʋ lilɑ kɑmɑ lʋm tɑɑ,

nɑ cɔlɔʋ niɣitiɣi kʋ piliŋɑsɩ kɛ ɑhoo tɔ.

20 Mɑ teeli kɑ́ wɛɛ tɑm kɛ́ ɩ kɑɑ sɩ,

nɑ mɑ tomɑ ɩsɩɩ tɔɔʋ ŋku kʋ nyɔɔ teu tɔ.

21 Yǝlɑɑ nɩɩkɑɣɑ mɑ tɔm kɛ́,

nɑ pɑ́ tɑŋɑɑ nɑ pɑ́ mʋɣɩ mɑ lɑɣɑtʋ tɑsʋɣʋ nɑ pɑ́ sumɑ.

22 Pɑ nɩɩkɑɣɑ mɑ tɔm kɛ́ pɑ tǝnɑɣɑ.

Ye mɑ tɛmɑ yɔɣɔtʋɣʋ nɔɣɔlʋ ɩɩ cɔɔkɩ nɑtǝlɩ.

23 Yǝlɑɑ tɑŋɑɣɑ-m kɛ́, nɑ pɑ́ hɑɑwɑ

nɔɔsɩ ɩsɩɩ pɑ tɑŋʋɣʋ tɛʋ tɔ.

24 Mɑ mʋɣʋlɑɣɑnɑ-wɛɣɛ, ɩlɛ pɑɑ tʋɣʋnɑ.

Pǝyele pɑɑ pǝsǝɣɩ nɑ pɑ́ wɑkǝlɩ mɑ ɩsɛntɑɑ hɛtʋɣʋ.

25 Mɑɑ kɛnɑ pɑ nyʋɣʋ tʋ,

nɑ mɑ́ hʋlǝɣɩ-wɛɣɛ mpɑɑʋ ŋku pɑɑ tǝŋ tɔ,

nɑ mɑ́ wɛ ɩsɩɩ wulɑʋ kɛ ɩ kpekǝle yǝlɑɑ tɑɑ.

Mɑ hɛɛsɑɣɑ lɑŋwɑkǝllɛ nyǝ́mɑ lɑŋɑ.