1 Ḿpʋ́ɣʋ́ kʋyɑkʋ nɑkʋlɩ Piyɛɛ nɑ Yohɑɑnɩ pɑ pukɑɣɑ Ɩsɔ tǝsɛɛlɛ kɛ ilim kpiluɣu sǝlǝmʋɣʋ. 2 Apɑlʋ nɔɣɔlʋɣʋ pɑ lʋlǝnɑ kɑɑkɑlǝtʋ, nɑ pɑ́ pukinɑ-ɩ nɑ pɑ́ sɩɩkɩ Ɩsɔ tǝsɛɛlɛ sɔsɔɔlɛ nɔnɔɣɔ ŋkɑ pɑ yɑɑ sɩ Cɑŋǝm Nɔnɔɣɔ tɔɣɔ pɑɑ kʋyɑkʋ ŋku sɩ ɩ́ sǝlǝmǝɣɩ Ɩsɔ tǝsɛɛlɛ tɑɑ sʋʋlɑɑ kɛ liɣitee. 3 Ɩ nɑwɑ Piyɛɛ nɑ Yohɑɑnɩ pɑ sʋʋkɩ Ɩsɔ tǝsɛɛlɛ tɑɑ, ɩlɛnɑ ɩ́ sǝlǝmɩ-wɛ sɩ pɑ́ hɑ-ɩ pʋlʋ. 4 Ḿpʋ́ɣʋ́ Piyɛɛ nɑ Yohɑɑnɩ pɑ nyǝnɑ-ɩ tǝpiŋŋ. Ɩlɛnɑ Piyɛɛ tɔmɩ-ɩ sɩ: Pɑɑsǝnɑ cǝnɛ.

5 Tǝnɑɣɑ kɑɑkɑlɑɣɑ pɑɑsǝnɑ-wɛɣɛ teu, nɑ kɑ tɛɛlɑɣɑɑ sɩ pɑɑ hɑ-kɛɣɛ pʋlʋ. 6 Ḿpʋ́ɣʋ́ Piyɛɛ tɔmɑ-kɛ sɩ: Mɑ fɛɩnɑ liɣitee sɩ mɑɑ hɑ-ŋ. Amɑ mɑɑ hɑ-ŋ mpi mɑ wɛnɑ tɔ. Nɑ Nɑsɑlɛtɩ Yesu Kilisiti toŋ tɑɑ kʋlɩ nɑ ń tɔ.

7 Ɩlɛnɑ Piyɛɛ siisi nɑ ɩ́ tɔkɩ kɑɑkɑlɑɣɑ nɑ niŋ ntɔɣɔŋ, nɑ ɩ́ kʋsɩ. Tǝnɑɣɑ kɑɑkɑlɑɣɑ nɔɔhɛɛ nɑ kɑ nɔɔcʋwɑsɩ kpɑ toŋ kɛ kpɑkpɑɑ. 8 Ḿpʋ́ɣʋ́ kɑ kʋlɑɑ tǝhɑpɑ nɑ kɑ́ tii kɑ nɔɔhɛɛ tɔɔ, nɑ kɑ́ sǝŋ tǝye nɑ kɑ́ niki tɔntɛ, nɑ kɑ́ nɑ tillɑɑ sɔsɑɑ pɑ́ kpɛntɩ nɑ pɑ́ sʋʋ Ɩsɔ tǝsɛɛlɛ tɑɑ. Nɑ kɑ́ tɔŋ nɑ kɑ́ ŋmɑɑlǝɣɩ nɑ kɑ́ sɑŋ Ɩsɔ. 9 Sɑmɑɑ tǝnɑ nɑ́ kɑ tɔntɛ nɑ kɑ Ɩsɔ sɑm. 10 Pɑ kɔmɑ nɑ pɑ́ cɛkǝnɑ sɩ ŋkɛ kɑ cɑkɑɣɑnɑ Ɩsɔ tǝsɛɛlɛ Cɑŋǝm Nɔnɔɣɔ kiŋ nɑ kɑ́ sǝlǝmǝɣɩ liɣitee, ɩlɛnɑ sɔɣɔntʋ nɑ piti lɑ-wɛ nɑ ɩsǝnɑ kɑ hikɑ nɔɔhɛɛ tɔ.

11 Ḿpʋ́ɣʋ́ kɑɑkɑlɑɣɑ ŋkɛ kɑ nyɔɔnɑ Piyɛɛ nɑ Yohɑɑnɩ kɛ tɑm. Ḿpʋ́ɣʋ́ piti kpɑ sɑmɑɑ kɛ sɔsɔm, ɩlɛnɑ pɑ́ wɑtɩ Piyɛɛwɛ pɑ tɔɔ kɛ́ sɑkɑɣɑ sɔsɔɣɑ ŋkɑ pɑ yɑɑkɑɣɑ sɩ Sɑlʋmɔŋ sɑkɑɣɑ tɔ kɑ tɛɛ. 12 Piyɛɛ nɑ́ mpʋ, ɩlɛnɑ ɩ́ tɔ sɑmɑɑ sɩ: Ɩsɛɣɛlɩ yǝlɑɑ mɛ, pepe tɔɔ kɛ́ ɑpɑlʋ ɩnɛ ɩ kʋlʋɣʋ tɔ pǝ cɛkɩ mǝ lɑŋɑ? Nɑ pepe tɔɔ kɛ́ ɩ́ nyǝnǝɣɩ-tʋ ɩsɩɩ tɑ́ mɑɣɑmɑɣɑ tɑ́ toŋ yɑɑ tɑ́ Ɩsɔsɛɛlɛ teu nɑpǝlɩ pǝ yelinɑ nɑ ɑpɑlʋ ɩnɛ ɩ́ tɔŋ? 13 Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ, wei ɩ kɛ́ tɑ cɑɑnɑɑ cɑɑnɑɑ Ɩsɔ tɔ, ɩ kʋsɑ ɩ tǝmlɛ tʋ Yesu nyʋɣʋ. Amɑ mɛ mǝ tʋ-ɩ toŋtʋnɑɑ niŋ tɑɑ. Pǝlɛ pǝ wɑɑlɩ Pilɑtɩ luɣu lɑpɑ sɩ ɩ yeki-ɩ tɔ, mǝ tɑɣɑnnɑ kisuɣu. 14 Ɩ́ kisɑ yʋlʋ kʋpɑŋ tɑmpɑnɑ tǝŋlʋ ɩnɩ, nɑ ɩsɑɣɑʋ kpitikpiti kɛ́ ɩ́ sɔɔlɑɑ nɑ ɩ́ sǝlǝmɩ Pilɑtɩ sɩ ɩ́ tʋlɩ-mɛɣɛ ɩ́lɛ́. 15 Ḿpʋ́ɣʋ́ pǝ lɑpɑ nɑ ɩ́ yele nɑ pɑ́ kʋ weesuɣu hɑlʋ. Amɑ Ɩsɔ nɑ́ feesɑ-ɩ nɑ tǝ́ nɑnɑ tɑ́ ɩsǝpee. 16 Yesu ɩnɩ ɩ mɑɣɑmɑɣɑ ɩ toŋ tɑɑ nɑ tɑ́ɑ́ tɛmnɑʋ kɛ-ɩ yelinɑ ɑpɑlʋ ɩnɛ ɩ kʋlɑɑ. Ɩ́ nyǝmɑ-ɩ nɑ ɩnɩ ɩ sǝŋnɑ mǝ ɩsɛntɑɑ ɩsǝntɔ. Tɑ́ɑ́ tɛmnɑʋ kɛ Yesu yelinɑ ɑpɑlʋ ɩnɛ ɩ wɛnɑ ɩ tɩ tǝmɑmmɑm nɑ mǝ tǝnɑ ɩ́ nɑɑkɩ mpʋ.

17 Tɔʋ, mɑ nyǝ́mɑ mɛ, mɑ nyǝmɑ́ teu sɩ mǝ nɑ mǝ sɔsɑɑ ɩ́ tɑɑ cɛkǝnɑ tɔɣɔ ɩ́ lɑpɑ Yesu ɩnǝɣɩ mpʋ. 18 Ɩlɛ tɔm nti Ɩsɔ yelɑɑ nɑ Ɩsɔ kʋyɔɣɔtʋtʋ tɛlǝsǝlɑɑ tǝnɑ kpɑɑlɩ hɑtoo lɔŋ tɑɑ, sɩ ɩ Mesii kɑ́ tɔɣɔ kʋnyɔŋ tɔ, ntɩ ɩnɩ tǝ mɑɣɑmɑɣɑ kɛ ɩ yelɑɑ nɑ tǝ́ lɑ́. 19 Pǝ tɔɔ tɔ, ɩ́ lɔ mǝ ɩsɑɣɑtʋ nɑ ɩ́ lɑɣɑsɩ hʋwɛɛ, nɑ ɩ́ pǝsǝnɑ Ɩsɔ tɔɔ. Ɩlɛnɑ ɩ́lɛ́ ɩ́ tɑɣɑnɩ mǝ tǝwɑkǝllɛnɑɑ. 20 Ɩlɛ Tɑcɑɑ kɑ́ hɑ-mɛɣɛ kʋyɛɛŋ wei ɩ tɑɑ pɩɩ wɑɑsɩ-mɛ tɔ, nɑ ɩ́ kɔnɑ Mesii wei ɩ kɑ lǝsɑ hɑtoo lɔŋ nɑ ɩ́ sɩɩ-mɛ tɔ. Mesii ɩnǝɣǝlɛ Yesu. 21 Amɑ pǝ wɛɛ kɛ́ sɩ Yesu Kilisiti ɩ́ cɑɣɑ ɩsɔtɑɑ, hɑlǝnɑ pǝ́ tɑlɑ wɑɑtʋ wei pɑɑ tɑɣɑnɩ pǝ tǝnɑɣɑ kʋfɑm pǝsʋɣʋ, ɩsɩɩ Ɩsɔ kɑ tɛm yeluɣu kɛ hɑtoo lɔŋ nɑ ɩ kʋyɔɣɔtʋtʋ tɛlǝsǝlɑɑ kʋpɑmɑ yɔɣɔtɩ tɔ. 22 Hɑlɩ Moisi mɑɣɑmɑɣɑ nɑ́ yɔɣɔtɑ ɩ tɔm kɛ mpʋ sɩ: Tɑcɑɑ mǝ Ɩsɔ kɑ́ kɔnɑ-mɛɣɛ Ɩsɔ kʋyɔɣɔtʋtʋ tɛlǝsʋlʋ nɔɣɔlʋ wei ɩ wɛ ɩsɩɩ mɑ́, nɑ ɩ kɑ́ wɛɛ mǝ mɑɣɑmɑɣɑ mǝ piitim tʋ, nɑ ɩ́ kɑ́ tǝŋ tǝ tǝnɑ nti ɩ kɑ́ heeli-mɛ tɔ. 23 Ye wei ɩ tɑ nɩɩnɑ Ɩsɔ kʋyɔɣɔtʋtʋ tɛlǝsʋlʋ ɩnɩ, pɑɑ lǝsɩ pʋntʋ kɛ Ɩsɔ yǝlɑɑ tɑɑ nɑ pɑ́ kʋ-ɩ. 24 Ɩsɔ kʋyɔɣɔtʋtʋ tɛlǝsǝlɑɑ mpɑ pɑ tǝnɑ pɑ yɔɣɔtɑ pǝ kpɑɣɑʋ Sɑmiyɛɛlɩ nɑ ɩ wɑɑlɩ nyǝ́mɑ pɑ looŋɑ ŋkɛ kɑ tǝnɑɣɑ mpʋ tɔ, pɑ yɔɣɔtɑ kʋyɛɛŋ ɩnɛ ɩnɩ ɩ tɔm. 25 Mpi Ɩsɔ kɑ tɔmɑ sɩ ɩ kɑ́ hɑ nɑ Ɩsɔ kʋyɔɣɔtʋtʋ tɛlǝsǝlɑɑ ŋmɑɑ pǝ tɔm tɔ, mɛɣɛ ɩ tɔmɑ sɩ ɩ kɑ́ lɑ. Hɑlɩ mǝ tɔm kɛ Ɩsɔ kɑ yɔɣɔtɑ sɑɑ wei ɩ́ nɑ mǝ cɑɑnɑɑ cɑɑnɑɑ pɑɑ sɩɩ tǝmɑɣɑ nɔɔsɩ tɔ. Wɑɑtʋ ɩnǝɣɩ Ɩsɔ tɔmɑ Apǝlɑhɑm sɩ: Nyɑ́ piyɑ tɔɔ kɛ́ mɑɑ lɑ ɑtɛ yǝlɑɑ tǝnɑɣɑ kʋpɑntʋ. 26 Pǝ tɔɔ kɛ́ Ɩsɔ lǝsɑ ɩ tǝmlɛ tʋ tɔ, mǝ cɔlɔɣɔ ɩ lɑɑlǝnɑ-ɩ kɔnɑʋ. Ɩ kɔnɑ-mɛɣɛ-ɩ ḿpʋ́ɣʋ́ sɩ ɩ́ lɑ-mɛɣɛ kʋpɑntʋ, sɩ ɩ́ lɑɣɑsɩ-mɛ nɑ pɑɑ wei ɩ́ yele ɩ yɑɑsi ɩsɑɣɑʋ.