1 Ḿpʋ́ɣʋ́ Amɑsiyɑ tɔɣɔ kɑwulɑɣɑ kɛ ɩ lʋlʋɣʋ pɩɩsɩ hiu nɑ kɑkpɑsɩ nyǝŋkɑ tɑɑ. Yosɑlɛm kɛ ɩ tɔɣɔ kɑwulɑɣɑ kɛ pɩɩsɩ pɔɣɔlɑɣɑfɛɩ hiu nɑ nɑɑnʋwɑ. Ɩ too kɑ kɛ́ Yosɑlɛm tʋ kɛ́, nɑ pɑ́ yɑɑkɩ-ɩ sɩ Yowɑtɑŋ. 2 Amɑsiyɑ lɑpɑ mpi pǝ mɑɣɑ Tɑcɑɑ tɔ yɑɑ, ɑmɑ ɩ tɑ lɑnɑ ɩ lotu tǝnɑɣɑ.

3 Wɑɑtʋ wei Amɑsiyɑ kɑwulɑɣɑ cɑɣɑ teu, ɩlɛnɑ ɩ́ kʋ́ ɩ wɑɑlɩ nyǝ́mɑ mpɑ pɑɑ kʋwɑ ɩ cɑɑ Sowɑsɩ tɔ. 4 Amɑ ɩ yelɑ pɑ piyɑ. Ɩsɩɩ Tɑcɑɑ yepu nɑ pɑ́ ŋmɑɑ Moisi kiiu tɑɑ tɔ sɩ: Pɑ kɑɑ kʋ cɛcɛ kɛ́ ɩ pǝyɑɣɑ ɩsɑɣɑtʋ tɔɔ. Yɑɑ pɑ́ kʋ́ pǝyɑɣɑ kɛ kɑ cɑɑ nyǝntʋ tɔɔ. Amɑ wei ɩ lɑpɑ ɩsɑɣɑtʋ tɔ, ɩnɩ ɩ kɑ́ sǝnɑ.

5 Ḿpʋ́ɣʋ́ Amɑsiyɑ kotɑ Yutɑ nɑ Pɛncɑmɛɛ pɑ kpekɑ nnɑ ɑ tɔɔ ɩ tɔkɑɣɑ kɑwulɑɣɑ tɔ pǝ ɑpɑlɑɑ. Ɩlɛnɑ ɩ́ kpɑ yoolɑɑ kpekɑ nyɔɔŋ nyǝ́mɑ nɑ pǝ́ kɛɛsǝnɑ pɑ lʋlʋŋ. Ɩlɛnɑ pɑ́ kɑlɑ mpɑ pɑ pɩɩsɩ wɛ ɩsɩɩ hiu tɔ. Nɑ pɑ́ hiki yǝlɑɑ iyisi ŋmʋnʋɣʋ nɑ nɩɩnʋwɑ (300000), mpɑ pɑ mʋnɑ yoou pote nɑ pɑ́ nyǝ́mɑ ŋmɑntɑɑsɩ nɑ kpɑlǝŋ pǝ tɔm tɔ. 6 Ḿpʋ́ɣʋ́ Amɑsiyɑ kpɑɣɑ Ɩsɛɣɛlɩ nyǝ́mɑ yoolɑɑ tɑɑ yoolɑɑ kɛ ɑpɑlɑɑ iyisi nɩɩnʋwɑ (100000), nɑ ɩ́ fɛlɩ pɑ tɔɔ kɛ́ liɣitee nyǝɣǝtʋ ɩsɩɩ tɔɔnǝnɑɑ tooso. 7 Amɑ Ɩsɔ kʋyɔɣɔtʋtʋ tɛlǝsʋlʋ nɔɣɔlʋ ɩ kɔmɑ nɑ ɩ́ heeli-ɩ sɩ: Tɑ Cɑɑ, pǝ fɛɩ sɩ Ɩsɛɣɛlɩ yoolɑɑ ɩ́ tǝŋɩ-ŋ. Mpi tɔ, Tɑcɑɑ kɑɑ sǝnɑ mpɛ ɩnɩ. 8 Ye nyɑnɑ-wɛ ɩ́ polɑɑ, pɑɑ n kɑ́ yoo ɩsǝnɑ, ɩsɩɩ Tɑcɑɑ yelɑɑ nɑ ń se nyɑ́ kolontunɑɑ. Ɩ tike ɩ wɛnnɑ toŋ sɩ ɩ́ lɑ nɑ ń kǝlɩ yɑɑ ń kpisi.

9 Ntɛnɑ Amɑsiyɑ pɔɔsɩ Ɩsɔ kʋyɔɣɔtʋtʋ tɛlǝsʋlʋ sɩ: Nɑ ɩsǝnɑɣɑ mɑɑ lɑ liɣitee nnɑ ɑ tǝnɑ mɑ tɛmɑ fɛlʋɣʋ tɔ ɑ tɔm? Ɩsɔ kʋyɔɣɔtʋtʋ tɛlǝsʋlʋ sɩ: Tɑcɑɑ pǝsǝɣɩ nɑ ɩ́ lɛɛtɩ-ŋ-yɛ nɑ pǝ́ kǝlɩ mpʋ.

10 Ḿpʋ́ɣʋ́ Amɑsiyɑ mǝlǝnɑ Ɩsɛɣɛlɩ yoolɑɑ. Pɑ tɑɑ kɑ hɑŋnɑ Yutɑ nyǝ́mɑ kɛ́, nɑ pɑ́ kpenɑ pɑ́ɑ́nɑ́ sɔsɔɔnɑ.

11 Ɩlɛnɑ Amɑsiyɑ tɔɣɔ ɑpɑlʋtʋ nɑ ɩ́ kpɑɣɑ ɩ yoolɑɑ nɑ pɑ́ tɛɛ tɔm tɛtɛkǝlɛ tɑɑ. Nɑ ɩ́ kʋ́ Ɩtɔm yoolɑɑ kɛ iyisi nɑɑnʋwɑ (10000). 12 Nɑ pɑ́ kpɑ yoolɑɑ iyisi nɑɑnʋwɑ (10000) lɛlʋ nɑ pɑ ɩsɛ, nɑ pɑ́ kpɑɑnɑ-wɛɣɛ pulɑɣɑ tɔɔ. Ɩlɛnɑ pɑ́ tusi-wɛɣɛ ɩpilisɑʋ tɑɑ, nɑ pɑ́ hoti pɑ tǝnɑ nɑ pɑ́ sɩ́.

13 Wɑɑtʋ ɩnǝɣɩ Ɩsɛɣɛlɩ yoolɑɑ mpɑ Amɑsiyɑ kɑ tɔɣɔnɑɑ sɩ, pɑ́ tɑɑ tǝŋɩ-ɩ yoou tɔ, pɑ wɑtɑ Yutɑ ɑcɑlɛɛ wenɑ ɑ wɛ Sɑmɑlii nɑ Pɛtɩ-Holoŋ pɑ hɛkʋ tɑɑ tɔ. Nɑ pɑ́ kʋ́ yǝlɑɑ iyisi tooso (3000) nɑ pɑ́ kuu pɑ wontu kɛ tuutuumɑ.

14 Wɑɑtʋ wei Amɑsiyɑ lɩɩnɑ Ɩtɔm nyǝ́mɑ tǝyoole nɑ ɑkɑɩtʋ, ɩlɛnɑ ɩ́ kpɛnnɑ Ɩtɔm nyǝ́mɑ tɩɩŋ nɑ ɩ́ lɑɑkɩ nɑ ɩ́ wɔkɩ-ɩ tulɑɑlʋnɑɑ. 15 Ḿpʋ́ɣʋ́ Tɑcɑɑ mʋ Amɑsiyɑ nɑ pɑ́ɑ́nɑ́ nɑ ɩ́ tili Ɩsɔ kʋyɔɣɔtʋtʋ tɛlǝsʋlʋ nɔɣɔlʋɣʋ ɩ kiŋ. Nɑ ɩ́lɛ́ ɩ́ pɔɔsɩ Amɑsiyɑ sɩ: Pepe tɔɔ kɛ́ n tǝŋǝɣɩ tɩɩŋ wei ɩ tɑ pǝsɩ nɑ ɩ́ yɑ ɩ yǝlɑɑ kɛ nyɑ́ niŋ tɑɑ tɔ?

16 Tǝnɑɣɑ wulɑʋ cɛpɑ Ɩsɔ kʋyɔɣɔtʋtʋ tɛlǝsʋlʋ nɔɣɔ tɔɔ nɑ ɩ́ pɔɔsɩ-ɩ sɩ: Ɩlɛ mɑ kpɑ-ŋ sɩ ń lɑ kɑwulɑɣɑ tɑɑ tɔm tɑsǝlʋ nɑ? Ye nn cɑɑkɩ mɑ́ nyǝŋsɩ nyɑ́ ɩsɛ su.

Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ sumɑ. Ɩlɛnɑ ɩ́ tɑɣɑnɩ kpɑɣɑʋ sɩ: Mɑ nyǝ́mɑ sɩ Ɩsɔ tʋ ɩ tɑɑ sɩ ɩ kɑ́ kʋ-ŋ. Mpi pǝ tɔɔ n lɑpɑ yɑɑsi ɩnɩ ɩ tɑkɑ, nɑ ń kisi mɑ tɔm tɔ.

17 Ḿpʋ́ɣʋ́ Amɑsiyɑ cɑɑ ɩ lɑɣɑtʋ tɑsǝlɑɑ. Ɩlɛnɑ ɩ́ tili nɑ pɑ́ heeli Yehu pǝyɑlʋ Sowɑkɑsɩ pǝyɑlʋ Sowɑsɩ sɩ: Mɑ nɑ-ŋ tǝ́ suli nɑ tǝ́ yoo. 18 Ntɛnɑ Sowɑsɩ cɔ-ɩ sɩ: Lipɑŋ pʋɣʋ tɔɔ sɔsɔʋ kɑ sǝlǝmǝnɑ tʋɣʋ sɔsɔɔʋ sɩ: Hɑ mɑ pǝyɑlʋ kɛ́ nyɑ́ pɛɛlɔ. Ḿpʋ́ɣʋ́ tɑɑlɛ wontuɣu nɑkʋlɩ kʋ tɔmɑ sɔsɔʋ tɔɔ nɑ kʋ́ pʋɣʋtɩ-ɩ. 19 Nɑ Sowɑsɩ tɑsɑ sɩ: Pepe tɔɔ kɛ́ n hɔŋ nyɑ́ tɩ sɩ n kǝlɑ Ɩtɔm nyǝ́mɑ? N lɑkɩ kɑlɑmpɑɑnɩ kɛ́ yem kɛ́. Pɩɩ kǝlɑ teu sɩ ń cɑɣɑ nyɑ́ tɛ. Pepe tɔɔ kɛ́ n cɑɑ sɩ mɑ́ nɑ-ŋ tǝ́ yoo nɑ nyɑ́ nɑ Yutɑ nyǝ́mɑ ɩ́ lɑ́ ɑsɑlɑʋ kɛ yem?

20 Amɑ Amɑsiyɑ tɑ nɩɩ. Ɩlɛ Ɩsɔ cɑɑkɑɣɑ kɛ́ sɩ ɩ́ kʋ́ ɩ́ nɑ ɩ yoolɑɑ kɛ timpi pɑ sʋ́ʋ́ Ɩtɔm tɩɩŋ kɛ lɑɑʋ tɔ. 21 Ḿpʋ́ɣʋ́ Sowɑsɩ nɑ Amɑsiyɑ pɑ yoolɑɑ sulɑ yoou kɛ Pɛtɩ-Sɛmɛsɩ kɛ Yutɑ tɛtʋ tɑɑ. 22 Ɩlɛnɑ Ɩsɛɣɛlɩ nyǝ́mɑ kǝlɩ Yutɑ nyǝ́mɑ nɑ pɑ́ se nɑ pɑ́ kpe. 23 Ḿpʋ́ɣʋ́ wulɑʋ Sowɑsɩ kpɑ Yutɑ wulɑʋ Amɑsiyɑ kɛ Pɛtɩ-Sɛmɛsɩ nɑ ɩ́ kǝlɩ-ɩ. Ɩlɛnɑ ɩ́ polo Yosɑlɛm nɑ ɩ́ kʋ́ koluŋɑ kɛ pʋ́ʋ́ɣʋ́ kɛ mɛɛtǝlǝnɑɑ ŋmʋnʋɣʋ (200) cɔlɔ kɛ Ɩfǝlɑyim nɔnɔɣɔ nɑ ŋkuluŋɑ nyǝŋkɑ pǝ hɛkʋ tɑɑ. 24 Ḿpʋ́ɣʋ́ Sowɑsɩ kuu wʋlɑ nɑ liɣitee nyǝɣǝtʋnɑɑ, nɑ wontunɑɑ kʋpɑntʋnɑɑ mpɑ pɑɑ wɛ Ɩsɔ tǝsɛɛlɛ tɑɑ kɛ́ Opɛtɩ-Ɩ́tɔm kiŋ tɔ. Nɑ kɑwulɑɣɑ tǝyɑɣɑ kpɑncooŋ. Nɑ ɩ́ kuu yǝlɑɑ tɔtɔ, nɑ ɩ́ ponɑ Sɑmɑlii.

25 Pɩɩsɩ nɑɑnʋwɑ nɑ kɑkpɑsɩ kɛ Amɑsiyɑ tɑsɑ tɔɣɔʋ kɛ Ɩsɛɣɛlɩ wulɑʋ Sowɑsɩ sǝm wɑɑlɩ. 26 Pɑ kɛɛsɑ Amɑsiyɑ tɔm lɛntɩ kɛ pǝ kpɑɣɑʋ tǝ kɑncɑɑlɑɣɑ nɑ tǝ tǝnɑɣɑ tɔɣɔ Yutɑ nɑ Ɩsɛɣɛlɩ pɑ ɑwulɑɑ tɑkǝlɑɣɑ tɑɑ. 27 Wɑɑtʋ wei Amɑsiyɑ kisɑ Tɑcɑɑ tɔɣɔ yǝlɑɑ kʋlɑ ɩ tɔɔ kɛ́ Yosɑlɛm. Ɩlɛnɑ kʋyɑkʋ nɑkʋlɩ Amɑsiyɑ se nɑ ɩ́ polo Lɑkisi. Nɑ pɑ́ tǝŋɩ-ɩ tǝnɑ nɑ pɑ́ kʋ-ɩ. 28 Pǝ wɑɑlɩ kɛ́ pɑ tʋ-ɩ kɛɛkɛ tɑɑ nɑ kpɑɣɑnǝŋ pɑɣɑlɛ hɔ, nɑ pɑ́ polo pɑ́ pimi-ɩ pɑ tǝyɑɣɑ pǝlɑɑʋ tɑɑ.