1 Ḿpʋ́ɣʋ́ wulɑʋ kotɑ Yutɑ nɑ Yosɑlɛm pǝ nyʋɣʋ nyǝ́mɑ tǝnɑɣɑ ɩ kiŋ kɛ kpɑkpɑɑ. 2 Nɑ pɑ́ nɑ pɑ sɑmɑɑ pɑ́ polo Ɩsɔ tǝsɛɛlɛ. Pǝ kpɑɣɑʋ kɔtǝlɑɑ, nɑ Ɩsɔ kʋyɔɣɔtʋtʋ tɛlǝsǝlɑɑ nɑ yǝlɑɑ tǝnɑ, pɑɑ mpɑ. Ɩlɛnɑ wulɑʋ kɑlɑ-wɛɣɛ kiiu tɑkǝlɑɣɑ ŋkɑ pɑ hiiwɑ tɔ. 3 Pǝlɛ pǝ wɑɑlɩ kɛ́ wulɑʋ sǝŋɑ ɩ kumte tɔɔ kɛ Ɩsɔ tǝsɛɛlɛ tɑɑ. Ɩlɛnɑ ɩ́ nɑ Tɑcɑɑ pɑ́ pɛɛlɩ nɔɣɔ, nɑ sɑmɑɑ tisi sɩ mpɛ pɑɑ tɔkɩ Tɑcɑɑ kiiŋ, nɑ ɩ kʋsɛɣɛsǝtʋ, nɑ ɩ kʋtʋtʋtʋ, nɑ luɣu kʋlʋmʋɣʋ, nɑ lotu kʋlʋmtʋ. Nɑ pɑ́ lɑkɩ pǝ tǝnɑ mpi pɑ ŋmɑɑ tɑkǝlɑɣɑ ŋkɛ kɑ tɑɑ tɔ.

4 Pǝlɛ pǝ wɑɑlɩ kɛ́ wulɑʋ tɔmɑ kɔtʋlʋ sɔsɔ Hilikiyɑ, nɑ ɩ wɑɑlɩ nyǝ́mɑ, nɑ kɔtǝlɑɑ mpɑ pɑ tɑŋǝɣɩ Ɩsɔ tǝsɛɛlɛ nɔnɔɣɔ tɔ sɩ: Ɩ́ lɔ tʋɣʋ Pɑɑlɩ nɑ Aselɑ nɑ ɩsɔtʋlʋŋɑsɩ wontu kʋlɑlɑɑtʋ tǝnɑ. Ɩlɛnɑ pɑ́ wɔ-tǝɣɩ kɔkɔ kɛ Yosɑlɛm ɩcɑtɛ wɑɑlɩ kɛ Setǝlɔŋ tɛtɛkǝlɛ tɑɑ, nɑ pɑ́ cosi pǝ tɔlʋmɑ nɑ pɑ́ ponɑ Petɛɛlɩ. 5 Ḿpʋ́ɣʋ́ Sosiyɑsɩ tɔɣɔnɑ tɩɩŋ kɔtǝlɑɑ mpɑ Yutɑ ɑwulɑɑ kɑ́ kpɑwɑ tɔ. Mpɛ pɑ fɛɛnǝɣǝnɑ tǝkɔtǝlɛnɑɑ mpɑ pɑ wɛ ɑcɑlɛɛ nnɑ ɑ cɔɔnɑ Yosɑlɛm tɔ ɑ tɑɑ tɔ. Mpi tɔ, tʋɣʋ Pɑɑlɩ, nɑ ilim, nɑ ɩsɔtʋ, nɑ ɩsɔtʋlʋŋɑsɩ wɑɑnɩ wɑɑnɩ tǝnɑɣɑ pɑ fɛɛnɑɣɑɑ. 6 Ɩlɛnɑ pɑ́ lǝsɩ Ɩsɔ tǝsɛɛlɛ tɑɑ kɛ́ Aselɑ tesikɑ kʋlɑlɑɑɣɑ, nɑ pɑ́ wɔ-kɛɣɛ Yosɑlɛm wɑɑlɩ kɛ Setǝlɔŋ tɛtɛkǝlɛ tɑɑ, nɑ pǝ́ nyɑɣɑ tǝkpɑtɑɑ. Ɩlɛnɑ pɑ́ ŋmɩɩsɩ pǝ tɔlʋmɑ kɛ pǝlɑɑŋ tɑɑ. 7 Ḿpʋ́ɣʋ́ Sosiyɑsɩ yɔkɑ Ɩsɔ tǝsɛɛlɛ cɔlɔ kutuluŋ wei ɩ tɑɑ pɑ lɑkɩ wɑsɑŋkɑlǝtʋ tɔ. Tǝnɑɣɑ ɑlɑɑ nɑ́ lʋʋkɩ tʋɣʋ Aselɑ kɔtɑɣɑ wontu.

8 Pǝ wɑɑlɩ kɛ́ Sosiyɑsɩ kɔnɑ Yutɑ ɑcɑlɛɛ kɔtǝlɑɑ tǝnɑ, nɑ ɩ́ wɑkǝlɩ pɑ tǝkɔtǝlɛnɑɑ mpɑ pɑ tɑɑ pɑ fɛɛnɑɣɑɑ nɑ pɑ́ wɔkɩ tulɑɑlʋnɑɑ tɔ. Pǝ kpɑɣɑʋ Kepɑ nɑ pǝ polo Pɛɛsepɑ tɔ. Nɑ pɑ́ yɔkɩ tǝlɑɑlɛnɑɑ mpɑ pɑɑ wɛ Yosɑlɛm ɩcɑtɛ nɔnɔɔsɩ tɔ. Nɑ tǝlɑɑlɛ nte tɩɩ wɛ ɩcɑtɛ nyʋɣʋ tʋ Yosuwɑ nɔnɔɣɔ tɔ. Ye ń sʋʋkɩ ɩcɑtɛ nyɑ́ niŋ mpǝtǝŋ tɔɔ. 9 Amɑ kɔtǝlɑɑ mpɑ pɑ fɛɛnɑɣɑɑ tɩɩŋ tǝkɔtǝlɛnɑɑ tɔ, pɑ tɑ hɑ-wɛɣɛ mpɑɑʋ sɩ pɑ́ lɑ kɔtɑsɩ kɛ Tɑcɑɑ kɔtɑɣɑ tǝlɑtɛ tɔɔ kɛ́ Yosɑlɛm. Amɑ pɑ́ nɑ kɔtǝlɑɑ lɛlɑɑ pɑ tɔkɑɣɑnɑ potopotonɑɑ mpɑ pɑ tɑɑ kʋkʋsʋm fɛɩ tɔ.

10 Ḿpʋ́ɣʋ́ Sosiyɑsɩ wɑkǝlɑ tǝlɑɑlɛ Tofe timpi yǝlɑɑ wɔkɑɣɑ pɑ piyɑ kɛ tʋɣʋ Molɛkɩ kɛ Hinom tɛtɛkǝlɛ tɑɑ tɔ. 11 Nɑ ɩ́ wɑkǝlɩ tɔtɔɣɔ kpɑɣɑnǝŋ lɛɛsǝŋ wei Yutɑ ɑwulɑɑ kɑ hɑwɑ nɑ pɑ́ sɩɩ Ɩsɔ tǝsɛɛlɛ nɔnɔɣɔ kutuluɣu tɑɑ kɛ́ ɑkewe Netɑŋ-Melɛkɩ tǝyɑɣɑ cɔlɔ tɔ. Nɑ Sosiyɑsɩ wɔ ɩ kɛɛkɛnɑɑ kɛ kɔkɔ tɔtɔ. 12 Nɑ ɩ́ yɔkɩ tǝlɑɑlɛnɑɑ mpɑ Yutɑ ɑwulɑɑ kɑ ŋmɑwɑ Ahɑsɩ kutuluɣu pɑtɑ tɔɔ tɔ tǝpʋtʋpʋtʋ. Nɑ mpɑ wulɑʋ Mɑnɑsee ŋmɑwɑ Ɩsɔ tǝsɛɛlɛ tɑɑsɩ nɑɑlɛ tɔɔ tɔ. Nɑ ɩ́ lɔ pǝ hɔɣɔlɑsɩ kɛ Setǝlɔŋ tɛtɛkǝlɛ tɑɑ. 13 Nɑ Sosiyɑsɩ wɑkǝlɩ tǝkɔtǝlɛnɑɑ mpɑ Sɑlʋmɔŋ kɑ ŋmɑwɑ Olifinɑɑ pulɑɣɑ ilim mpǝtǝŋ tɔɔ hɔɣɔlʋɣʋ kɛ Yosɑlɛm ɩsɛntɑɑ tɔ. Pɑɑ Sitɔŋ nyǝ́mɑ tʋɣʋ ɑlʋnyǝŋkʋ ɩsɑɣɑʋ Asǝtɑtɩ, nɑ Mowɑpʋ nyǝ́mɑ tʋɣʋ ɩsɑɣɑʋ Kɛmɔsɩ, nɑ Amoni nyǝ́mɑ tʋɣʋ ɩsɑɣɑʋ Milikom. 14 Nɑ Sosiyɑsɩ yɔkɩ pɛɛ kʋsikee, nɑ ɩ́ sɛtɩ tesikɑsɩ, nɑ ɩ́ wɑɑsɩ tǝlɑɑlɛnɑɑ tɔɔ kɛ́ yǝlɑɑ mʋwɑ.

15 Ḿpʋ́ɣʋ́ Sosiyɑsɩ wɑkǝlɑ Petɛɛlɩ tǝkɔtǝlɛ, nte Nepɑ pǝyɑlʋ Solopʋwɑm kɑ ŋmɑwɑ nɑ ɩ́ tusi Ɩsɛɣɛlɩ nyǝ́mɑ kɛ lɑɑtʋ tɑɑ tɔ. Sosiyɑsɩ wɔpɑ tesikɑ kɛ kɔkɔ, nɑ ɩ́ yɔkɩ tǝlɑɑlɛ tǝnɑŋnɑŋ.

16 Sosiyɑsɩ tɔŋnɑ ḿpʋ́ɣʋ́ lɑpʋ tɔɣɔ ɩ loosɑ pǝlɑɑŋ kɛ pulɑɣɑ tɔɔ, nɑ ɩ́ tili yǝlɑɑ nɑ pɑ́ kuu mʋwɑ nɑ pɑ́ wɔ-yɛɣɛ kɔkɔ kɛ tǝkɔtǝlɛ nɑ tǝ́ pilisi, ɩsɩɩ Tɑcɑɑ kʋyɔɣɔtʋtʋ tɛlǝsʋlʋ kɑ kpɑɑlʋɣʋ tɔ. 17 Mpʋɣʋlɛ Sosiyɑsɩ tɑsɑ pɔɔsʋɣʋ sɩ: Pǝlɑɑʋ pǝlɛ nteɣe mɑ loosiɣi ɩsǝntɔ?

Ɩlɛnɑ ɩcɑtɛ yǝlɑɑ cɔ sɩ: Yutɑ Ɩsɔ kʋyɔɣɔtʋtʋ tɛlǝsʋlʋ wei ɩ kɑ kpɑɑlɑ nti tǝ tǝnɑ n lɑpɑ tǝkɔtǝlɛ tǝnɛ tɔ ɩ pǝlɑɑʋ kɛ́.

18 Ntɛnɑ Sosiyɑsɩ sɩ: Ɩ́ yele Ɩsɔ kʋyɔɣɔtʋtʋ tɛlǝsʋlʋ ɩnɩ ɩ pǝlɑɑʋ ŋkʋ. Nɔɣɔlʋ ɩ́ tɑɑ tokinɑ-kʋ.

Mpʋ pǝ lɑpǝnɑ nɑ pɑ́ yele Ɩsɔ kʋyɔɣɔtʋtʋ tɛlǝsʋlʋ ɩnɩ nɑ Sɑmɑlii nyǝŋ pɑ mʋwɑ.

19 Ḿpʋ́ɣʋ́ wulɑʋ Sosiyɑsɩ yɔkɑ tǝkɔtǝlɛnɑɑ, mpɑ Ɩsɛɣɛlɩ ɑwulɑɑ kɑ ŋmɑwɑ Sɑmɑlii ɑcɑlɛɛ tɑɑ, nɑ pɑ́ lɑɑkɩ nɑ pǝ́ kʋsɩ Tɑcɑɑ pɑ́ɑ́nɑ́ tɔ. Teitei ɩsɩɩ ɩ lɑpʋ Petɛɛlɩ tɔ. 20 Nɑ ɩ́ lɛntɩ pɑ kɔtǝlɑɑ mpɑ pɑ fɛɛnɑɣɑ tǝkɔtǝlɛnɑɑ mpɛ tɔ. Nɑ ɩ́ wɔ pǝ tɔɔ kɛ́ yǝlɑɑ mʋwɑ.

Pǝ wɑɑlɩ kɛ́ Sosiyɑsɩ mǝlɑ Yosɑlɛm.

21 Ḿpʋ́ɣʋ́ Sosiyɑsɩ tɔmɑ Yutɑ nyǝ́mɑ tǝnɑ sɩ: Ɩ́ tɔɣɔ mǝ Ɩsɔ Tɑcɑɑ Tɛɛʋ ɑcimɑ. Ɩsɩɩ pɑɑ kɛɛsʋɣʋ nɔɣɔ pɛɛlʋɣʋ tɑkǝlɑɣɑ tɑɑ tɔ. 22 Pɔpɔtʋ fɛɩ leleŋ, pǝ kpɑɣɑʋ hɑtoo pɑɑsǝnlɑɑ wɑɑtʋ, nɑ pǝ́ polo Yutɑ nɑ Ɩsɛɣɛlɩ pɑ ɑwulɑɑ wɑɑtʋ tɔ, pɑ tɑ tɔɣɔtɑ Tɛɛʋ ɑcimɑ ɩsɩɩ mpʋ pǝ tɑkɑ. 23 Sosiyɑsɩ kɑwulɑɣɑ pǝnɑɣɑ pǝlefɛɩ hiu nyǝŋkɑ tɑɑ kɛ́ pɑ tɔɣɔ-ɩ ḿpʋ́ɣʋ́ Yosɑlɛm tɑɑ.

24 Ḿpʋ́ɣʋ́ Sosiyɑsɩ kpiisɑ Yosɑlɛm nɑ Yutɑ tǝnɑ tɑɑ kɛ́ pee pɔɔsǝlɑɑ, nɑ kɔɣɔnɑŋ sʋsǝlɑɑ. Nɑ ɩ́ wɑkǝlɩ kʋlɑlɑɑm, nɑ lɛɛsǝŋ, nɑ lɑɑtʋ wontu lɛntǝnɑɑ, ɩsɩɩ pɑ kɛɛsʋɣʋ kiiŋ tɑkǝlɑɣɑ ŋkɑ kɔtʋlʋ Hilikiyɑ hiiwɑ Ɩsɔ tǝsɛɛlɛ tɑɑ tɔ, kɑ tɑɑ tɔ.

25 Too tɔ, wulɑʋ nɔɣɔlʋ ɩ tɑ cɑɣɑtɑ ɩsɩɩ Sosiyɑsɩ, nɑ ɩ́ sɔɔlɑ Tɑcɑɑ nɑ lotu kʋlʋmtʋ nɑ ɩ lǝsɑɣɑ sʋʋ-ɩ tǝmɑmmɑm. Ɩsɩɩ pɑ kɛɛsɑ Moisi kiiu tɑɑ tɔ. Pǝyele pɑ kɑɑ nɑ wulɑʋ nɔɣɔlʋɣʋ mpʋ tɔtɔ.

26 Ɩsǝnɑ Mɑnɑsee kɑ kʋsɑ Tɑcɑɑ pɑ́ɑ́nɑ́ kɛ Yutɑ tɔɔ tɔ ɑ tɑ tii. 27 Pǝ tɔɔ kɛ́ Ɩsɔ tɔmɑ sɩ: Ɩsɩɩ mɑ yeluɣu nɑ kolontunɑɑ kuu Ɩsɛɣɛlɩ nyǝ́mɑ tɔ. Mpʋ tɔtɔɣɔ mɑɑ yele nɑ pɑ́ kuu Yutɑ, mɑ tɑɑ nɑ-wɛɣɛ mɑ ɩsɛntɑɑ. Mɑɑ lɔ Yosɑlɛm ɩcɑtɛ nte mɑɑ lǝsɑɑ tɔ, nɑ Ɩsɔ tǝsɛɛlɛ nte mɑɑ tɔmɑ sɩ pɑɑ sɛɛkɩ-m tǝ tɑɑ tɔ.

28 Pɑ kɛɛsɑ Sosiyɑsɩ tɔm lɛntɩ kɛ Yutɑ ɑwulɑɑ tɑkǝlɑɣɑ tɑɑ. 29 Sosiyɑsɩ wɑɑtʋ tɑɑ kɛ́ Icipiti wulɑʋ Neko nɑ ɩ yoolɑɑ pɑ pukɑɣɑ Asilii nyǝ́mɑ wɑɑsʋɣʋ kɛ Ɩfǝlɑtɩ kiŋ. Ḿpʋ́ɣʋ́ Sosiyɑsɩ kʋlɑɑ sɩ ɩ kɑɣɑtǝɣɩ-wɛ. Ɩlɛnɑ pɑ́ kʋ Sosiyɑsɩ kɛ Mekito kɛ yoou kɑncɑɑlɑɣɑ nyǝŋkʋ tɑɑ. 30 Ḿpʋ́ɣʋ́ ɩ wɑɑlɩ nyǝ́mɑ tʋ-ɩ kɛɛkɛ tɑɑ, nɑ pɑ́ ponɑ-ɩ Yosɑlɛm nɑ pɑ́ pimi-ɩ ɩ pǝlɑɑʋ tɑɑ. Pǝ wɑɑlɩ kɛ́ Yutɑ nyǝ́mɑ kpɑwɑ Sosiyɑsɩ pǝyɑlʋ Sowɑkɑsɩ kɛ wulɑʋ, nɑ ɩ́ lɛɛtɩ ɩ cɑɑ lonte tɑɑ.

31 Sowɑkɑsɩ lʋlʋɣʋ pǝnɑɣɑ hiu nɑ kɑkpɑsɩ nyǝŋkɑ tɑɑ kɛ́ ɩ pǝsɑ Yutɑ wulɑʋ. Ɩlɛnɑ ɩ́ lɑ ɩsɔtʋnɑɑ tooso kɛ Yosɑlɛm tɑɑ. Ɩ too kɛlɛ Lipinɑ tʋ Ɩlimeyɑ pɛɛlɔ Hɑmutɑlɩ. 32 Ḿpʋ́ɣʋ́ Sowɑkɑsɩ lɑpɑ mpi pǝ tɑ mɑɣɑ Tɑcɑɑ tɔ, ɩsɩɩ ɩ cɔsɔnɑɑ. 33 Ɩlɛnɑ Icipiti wulɑʋ Neko kpɑ-ɩ nɑ ɩ́ ponɑ yomle kɛ Lipǝlɑ kɛ Hɑmɑtɩ tɛtʋ tɑɑ, nɑ ɩ kɑwulɑɣɑ sɩɩ tǝnɑɣɑ. Ḿpʋ́ɣʋ́ Neko tʋ Yutɑ nyǝ́mɑ sɩ pɑ́ fɛlɩ-ɩ lɑmpuu kɛ liɣitee nyǝɣǝtʋ kiloonɑɑ iyisi tooso (3000), nɑ wʋlɑ kɛ kiloonɑɑ hiu nɑ nɑɑnʋwɑ.

34 Pǝ wɑɑlɩ kɛ́ Icipiti wulɑʋ Neko kpɑ Sosiyɑsɩ pǝyɑlʋ Ɩliyɑkim sɩ ɩ́ lɛɛtɩ ɩ cɑɑ lonte. Nɑ ɩ́ lɑɣɑsɩ-ɩ hǝtɛ sɩ Sowɑkim. Pǝ kɑɑsɑ Sowɑkɑsɩ, ɩlɛnɑ ɩ́ ponɑ-ɩ Icipiti nɑ ɩ́ sɩ́ tǝnɑ. 35 Ḿpʋ́ɣʋ́ Sowɑkim tʋwɑ ɩ yǝlɑɑ nɑ pɑ́ fɛlǝɣɩ lɑmpuunɑɑ nɑ pǝ́ kɛɛsǝnɑ pɑ kʋhikim. Ɩlɛnɑ Sowɑkim nɑɑ fɛlɩ Icipiti wulɑʋ kɛ mpi ɩ́ pɔɔsɑɑ tɔ. Ye tɛtʋ tʋ ɩ́ fɛlɑ ɩ nyǝm, ɩlɛ Sowɑkim nɑ́ɑ́ ponɑ Icipiti wulɑʋ kɛ liɣitee nɑ wʋlɑ wei Icipiti wulɑʋ pɔɔsǝɣɩ tɔ.

36 Sowɑkim lʋlʋɣʋ pǝnɑɣɑ hiu nyǝŋkɑ tɑɑ kɛ́ ɩ pǝsɑ Yutɑ wulɑʋ kɛ Yosɑlɛm. Ɩ too kɛlɛ Lumɑ tʋ Petɑyɑ pɛɛlɔ Seputɑ. 37 Sowɑkim lɑpɑ mpi pǝ tɑ mɑɣɑ Tɑcɑɑ tɔ, ɩsɩɩ ɩ cɔsɔnɑɑ.