3
ख्रिस्ते़न्मोसान्नुःल्ले़आङ् पयम् यम्बा चोःक्
1 खे़ल्ले़ चोगुल्ले़ आमिःम् फुॽनुसाॽ नु ने़ॽनुसाॽसे, निङ्वाॽफुमाङ्ङिल्ले़ आबाङे सेसे कुमना पोःङ्माआङ् साङ्ग्राम्पेदाङ् पेःक्मा लक् के़घोःसुम्बाल्ले़ चोगुल्ले़ आनिॽ सेःक्युक्मिबा नु मानिङ्वाॽफुसाम्बा फाॽआङ् ते़न्दिङ् आजोगुम्बा ये़सुःन् निङ्वाॽ इःत्ते़म्मे़ॽओ॥ 2 मोसाःन्* मोसाःन्–खुने़ॽ उनाहुरिओ यहुदिहाॽरे़ खुनिॽ लाम्लोःबा वये़॥ खे़ङ्हाॽ योःक् मे़वये़बा मिस्र लाजेॽलाम् लाम्लोसुसि लःत्तुसि॥ खुने़ॽए यहुदिहाॽ निङ्वाॽफुमाङ्ङिल्ले़ कुसाम्यो इङ्जाःङ् पिरुसि॥ निङ्वाॽफुमाङ्ङिल्ले़ काक् कुहिम्सयङ्ङो नसाःन्साबा पोःक्खे़बा कुइसिःक् ये़सुःन्नाङ् खुने़ॽ सेःक्युक् के़जोःक्पाल्लो ताःक्पोसाबा पोःक्खे़॥ 3 हिम्मिन्नुःल्ले़आङ् हिम् के़जोःक्पे़न्साॽरिक् मिङ्सो इङ्धाःङ् पिमा लाॽरुबा कुइसिःक्के ये़सुःन् मोसाःन्नुःल्ले़आङ् मिङ्सो इङ्धाःङ्साबा पोःक्खे़रो॥ 4 के़रे़क् हिम्हाॽग मनाहाॽरे़ मे़जोगुबारो, कर काक् पाःन्हाॽ के़जोःक्पाङ्ग निङ्वाॽफुमाङ्ङिन्नेरो॥
5 आल्ल मोसाःङ्ग के़दाःबा ये़म्मो पाःप्मा के़बोःङ्बा पाःन्निल्ले़ कुयाःम्बेओ पाःप्मा फाॽआङ् खुने़ॽ निङ्वाॽफुमाङ्ङिल्ले़ काक् कुहिम्सयङ्ङो नसाःन्साबा सेवारोबा वये़रो॥ 6 कर ख्रिस्ते़ङ्ग निङ्वाॽफुमाङ्ङिल्ले़ कुहिम्सयङ्ङो नसाःन्साबा आबुगे़न् कुस्साःरो॥ ख्रिस्तओबा आनिॽ आजोगुम्बा निङ्साङ्ङिन् मे़ल्ले़त्ते हाङ्हाङ्ङाङ् आवाॽने़ फाॽग्र आनिॽआङ् निङ्वाॽफुमाङ्ङिल्ले़ कुहिम्सयङ्ङोबासिरो॥
निङ्वाॽफुमाङ्ङिल्ले़ कुमनाहाॽरे़ खुनिॽ नाःम्सिङ्मान्
7 खे़ल्ले़ चोगुल्ले़ सेसेमाङ्ङिल्ले़ अक्खेलॽरिक् पाःत्तुबा हे़क्के,
“आइन् खुने़ॽ कुइक्लाःन् के़घे़प्सुम्मिल्ले़ 8 एःक्सादे़न्नो इस्राइलिहाॽरे़ निङ्वाॽफुमाङ्ङिन् हङ्मे़साॽरुबा ये़म्मो बिफ्युङ् मे़जोगुबा कुइसिःक् खिनिॽ निङ्वाॽबान् के़धुङ्बा मे़जोगे़म्मिन्ने़ॽओ॥ 9 खे़प्मो खिनिॽ थाःक्थे़बाहाॽरे़ इङ्गाॽ आनासि थःप्मान् मे़साॽरु हे़क्क्याङ् खे़ङ्हाॽरे़ तङ्बे लिबोःङ्(४०) थारिक् चोगुङ्बा आयाःम्बक्किन् मे़निःसु॥ 10 खे़ल्ले़ चोगुल्ले़ खे़न् थाःक्हाॽनु इङ्गाॽ आसिक् पोगे़आङ् पाःत्तुङ्, ‘खे़ङ्हाॽरे़ खुनिॽ सिक्लुङ्मान् सदादिङ् ताप्पे़ॽरो, हे़क्क्याङ् खे़ङ्हाॽरे़ आलाम्मिन् कुसिङ्मे़न्निःत्ते मे़वाॽरो॥’ 11 हे़क्केःल्ले़ इङ्गाॽ आसिक् पोःक्मो अक्खेलॽरिक् माङ्हे़क्सिङ्ङाङ्लो, ‘खे़ङ्हाॽग इङ्गाॽ यारिप् चोगुङ्बा नाःम्सिङ्मा ते़न्नो आप्फाल्ले़आङ् लाःप्मा मे़ङ्घोने़न्लो॥’ ”* निङ्वाॽफुसाम्लो सुम् ९५.७-११
12 आमिःम् फुॽनुसाॽ नु ने़ॽनुसाॽसे, खिनिॽ लुम्मो ताप्फे़ःम्बा नु नसाःन् मे़न्जोःक्मनाबा निङ्वाॽबाल्ले़ खिनिॽ आजुनि निङ्वाॽफुमाङ्लाम्बा माःङ्घा के़न्जोगिन्ल फाॽआङ् सिङ्सिङ् लॽरे़म्मे़ॽओ॥ 13 “आइन्”* ‘आइन्’ फाॽइन् दाङ्बारे़ कुनुःङ्मा युःमा ये़म् थारिक् पोःङ्लो (३.७ ओमे़त्ते़ॽ)॥ वाॽर थारिक् खिनिॽग थिक्याःन्धक् हाङ्हाङ् मे़त्छिङ्ङे़म्मे़ॽ हे़क्केलॽरिक् लायोःल्ले़ कुइङ्ले़क्को के़न्ध्ये़ॽइन्ल हे़क्क्याङ् खिनिॽ निङ्वाॽइन्मे़धःप्सुन्लरो॥ 14 आनिॽ तगि नसाःन् आजोगुम्बा ये़म्मो खुने़ॽ ताःक्पो आजोगुम्बा कुइसिःक् कुनुप्मो थारिक् नसाःन्साबा आबोःङ्ने़ फाॽग्र ख्रिस्ते़न्नु लक् के़घोःबा आबोःक्खे़आङ् आवाॽरो॥ 15 साम्योसाप्लाःल्ले़ अक्खेलॽरिक् साम्दिङ् आबिॽरो,
“आइन् खुने़ॽ कुइक्लाःन् के़घे़प्सुम्मिल्ले़ इस्राइलिहाॽरे़ बिफ्युङ् मे़जोगुबा कुइसिःक् खिनिॽ निङ्वाॽइन्के़धःप्पा मे़जोगे़म्मिन्ने़ॽओ॥”* निङ्वाॽफुसाम्लो सुम् ९५.११
16 निङ्वाॽफुमाङ्ङिल्ले़ कुइक्लाःन् मे़घे़प्सुसाङ् खुने़ॽ कुदक्ले़ङ्वाओ बिफ्युङ् के़जोःक्पाहाॽ आत्तिन्हाॽ मे़वये़बे? हाबा खे़न् मोसारे़ मिस्र लाजेॽलाम् लःत्तुसिबा मनाहाॽए मे़ःन्छिबि? 17 हे़क्क्याङ् तङ्बे लिबोःङ्थारिक् निङ्वाॽफुमाङ्ङिल्ले़ कुसाक्के़न् के़भोःङ्बाहाॽ आत्तिन्हाॽ मे़वये़बे? एःक्सादे़न्नो लायो के़जोःक्पाआङ् के़सिःबा मनाहाॽए मे़ःन्छिबि? 18 हे़क्क्याङ् निङ्वाॽफुमाङ्ङिल्ले़ यारिप् चोगुबा नाःम्सिङ्दे़न्नो आप्फाल्ले़आङ् लाःप्मा के़ङ्घोःसिन्लो लॽरिक् आत्तिन्हाॽनु माङ्हे़क् चोगुआङ् वये़बे? कुइङ्जाःङ् इःप्मा नाःप्मा मे़न्दे़म्मनाबा मनाहाॽनुए मे़ःम्बि? 19 हे़क्केःल्ले़ खे़ङ्हाॽग खुनिॽ नसाःन् मे़न्जोःक्मनाबा निङ्वाॽबाल्ले़ चोगुल्ले़ खे़न् नाःम्सिङ्दे़न्नो लाःप्मा मे़ङ्घोःसुम्बान् आनिःसुम्लो॥
*3:2 मोसाःन्–खुने़ॽ उनाहुरिओ यहुदिहाॽरे़ खुनिॽ लाम्लोःबा वये़॥ खे़ङ्हाॽ योःक् मे़वये़बा मिस्र लाजेॽलाम् लाम्लोसुसि लःत्तुसि॥ खुने़ॽए यहुदिहाॽ निङ्वाॽफुमाङ्ङिल्ले़ कुसाम्यो इङ्जाःङ् पिरुसि॥
*3:11 निङ्वाॽफुसाम्लो सुम् ९५.७-११
*3:13 ‘आइन्’ फाॽइन् दाङ्बारे़ कुनुःङ्मा युःमा ये़म् थारिक् पोःङ्लो (३.७ ओमे़त्ते़ॽ)॥
*3:15 निङ्वाॽफुसाम्लो सुम् ९५.११