Her brehd liq
Awg meh he lehq phehq peg che awg lawn
Awg kawd maq teq ha khuhn kheh ceha huh ve Khreq yad awg mor haq su du deh jad che haq gha khanr chehd che awg yand awg khuhn, liq che te koz haq buhq tuhz lar che yaog. Gha khanr chehd che awg ceng haq te lehq Khreq yad awg gha lia saw suh lawq lawq mad gag ser liz, hehnd jad che awg khehq khuhn chehd chehd che yaog. Liq che te koz awr lehr, Yud daq chaw phehq che Khreq yad teq pa i hehd ve yonr che ted ceng haq chid bag lar haz lehq,Yud daq chaw ve a kor pi che awg lid geh kawq phuhz koeq tug duhd chehd che chaw teq pa haq buhq vid lar che haq sur che yaog. Kheh te cheaq te lehq, Yer suq Khreq vawr Jawd mawd Ghig sa he lehq Thaer khuhq par phehq che haq i hehd kha sehax yonr yeg vid tug, buhq var awr lehr liq che te koz haq buhq lehq i hehd haq awg ghad pid che yaog.
Buhq var he lehq buhq che awg yand
Liq che ve te koz haq buhq sehr phad vawr, yawd ved awg meh mad buhq lar lawz liz, liq che haq awg kawd gha haq yug che chaw teq pa awr lehr yawd haq kha sehax sir chehd che yaog. Awg yand laex khuhq phanr lag che awg khuhn, Pawd loq haq liq che te koz buhq var yaog lehd su sawnr lar che yaog. Kheh ma khuhd Khreq yad ve yonr khad haq kawq ghu te peg khaz nuhr, chaw mad awr ver Pawd loq yawd liq che ve te koz haq buhq lar che ma hez hawg lehd koz che yaog. Ar Pawd loq he lehq Bar nar baq ix mag te ghad ma hez ver, te ghad buhq lar che yaog lehd koz che yaog. Liq che ve te koz awr lehr, Yer ruq sar lehnr med mad luq ser huh A.D. 70 khuhq thad huh buhq lar che yaog.
A yed ir che awg lawn he lehq awg lawn kha peg
Her brehd liq che ve khuhn a yed ir jad che awg lawn nux maz vawr, Yer suq Khreq awr lehr, ir jad muh jad che kand pax phehq che he lehq peh lawq jad che ted ceng phehq che yaog. Yer suq Khreq awr lehr Ghig sa kheha pehar che awg bon haq pheq mar ax lar lehq awg bon u ve ve awg kanr te sehr phad phehq che yaog. Liq phu che ve awg kawd ted tawn khuhn koz lar che, Khreq awr lehr Ghig sa ve awg hoq awg han kha peg awg leh med te pawz pheq mar ax lar che ted ceng phehq che yaog. Her brehd liq che awr lehr, “Che haq keh daq che awg ceng teq pa ve liq,” lehd koz gha che yaog. Awg lawn ghod ver, Her lar saq ve liq mehz “haq keh daq che” he lehq “haq keh ir che muh che” koz che liq mehz che ve nid mehz awr lehr, liq che ve te koz awg khuhn 15 pawz kha gag buhq lar che yaog. Kheh te lehq liq mehz che ve haq caz daq che hend yug tug awg khad liz, liq che khuhn ted kag gha lia lo cawg chehd che yaog.
Awg lawn nux
1. Khreq ir jad muh jad che awg lawn haq pheq mar lar che (1:1-4)
2. Yer suq Khreq muhd nuh maq cuh yad haq keh ir che muh che (1:5-2:18)
3. Yer suq Khreq Mod ser haq keh ir che muh che (3:1-4:13)
4. Yer suq Khreq paw khod Ar ronr ve awg khad khuhn ve paw khod teq pa haq keh ir che muh che (4:14-7:28)
5. Yer suq Khreq tand tug awg gha lia haq keh daq jad kehg jad che (8:1-10:39)
6. Yonr che awg pun yeg khanr tug lawg khawx che (11:1-12:29)
7. Awg leh med ve tawd (13:1-25)
1
Ghig sa yawd ved Yad phu haq cud lehq koz mar lar peg che awg lawn
1 Ghig sa awr lehr, a mig thad lo cuh kar var teq pa haq cud lehq, laex ceng haq cud lehq a pux a pi teq pa haq laex pawz tawd yaw vid che yaog. 2 A meha awg leh med ve awg ni awg hax che awg khuhn,* 1:2 A meha awg leh med ve awg ni awg hax che awg khuhn Liq che haq buhq chehd che awg yand haq koz che yaog. yawd ved Yad phu haq cud lehq, yawd a nig haq tawd kawq yawa peg che yaog. Awg sinx awg gha lia haq cad sehr phad phehq tug, Yad phu u ve haq Ghig sa lez yug lar che yaog. Ghig sa yawd haq cud lehq, mig gig he lehq muhd nuh maq awg gha lia haq te phanr lar che yaog. 3 Yad phu awr lehr, Ghig sa ve awg mig awg phond haq paw tuhaz lehq, Ghig sa ni ma tar che heh te lehq, yawd tar che yaog. Kand pax kha peh cawg che yawd ved tawd khuhd haq cud lehq, kha cawg che awg gha lia haq yawd haq sax chehd che yaog. Chaw yad ve vend bax teq pa haq yawd chuhd kha vehr khaz nuhr, muhd nuh maq lo chehd che kand pax ir sehr phad ve laq yaq awr pax awr huh yawd mi chehd che yaog.
Muhd nuh maq cuh yad teq pa haq keh Yad phu ir che
4 Kheh te cheaq te lehq, Yad phu awr lehr, muhd nuh maq cuh yad teq pa haq keh liz ir che yaog. Che ve heh te lehq yawd gha lar che awg meh liz i hehd ve awg meh† 1:4 awg meh Yud daq chaw awg pun awg meh awr lehr, yawd ved awg ton, awg lid awg khad he lehq yawd te che kanx haq pheq mar che yaog lehz yonr che yaog. Khiz 17:5 haq keh daq jad che yaog.
5 † 1:5a Chid 2:7“Nawg awr lehr ngag ved Yad phu yaog.
Yaq ni ngag nawg ved Awr pa phehq vehr che yaog,”
lehz Ghig sa awr lehr, muhd nuh maq cuh yad a sug te ghad haq koz vid jawa le. Ma hez ver,
† 1:5b 2Sm 7:14“Ngag awr lehr yawd ved awr pa phehq lehq, yawd ngag ved yad phehq tug yaog,”
lehz Ghig sa awr lehr, muhd nuh maq cuh yad a sug te ghad haq koz vid jawa le. 6 Kheh te lehq, yad kaog‡ 1:6 yad kaog Yer suq haq koz che yaog. haq mig gig khod-aq lo lag peha che te yand,
† 1:6 Bon 32:43“Ghig sa ve muhd nuh maq cuh yad
awg gha lia yawd haq a kor pi lor,”
lehz yawd koz vid che yaog. 7 Muhd nuh maq cuh yad teq pa awg lawn Ghig sa koz che,
† 1:7 Chid 104:4“Yawd ved cuh yad teq pa haq
muhd huh heh te vid lehq,
yawd ved awg ceg teq pa haq a mir ha heh te vid che yaog,”
lehz yawd koz lar che yaog. 8 Kheh ma khuhd, Yad phu ve awg lawn che kheh koz che,
† 1:8-9 Chid 45:6-7“Ghig sa-og, nawg ved kaw jaw
co co taer taer yeg chehd che yaog.
Nawg ved muhd mig haq thed-e ghad cawd-aw ghad nawg uq penr che yaog.
9 Nawg thed che cawd che haq haq lehq,
ma thed ma cawd che haq cand che yaog.
Kheh te cheaq te lehq nawg ved Ghig sa awr lehr,
nawg ved awg chawd teq pa haq
puhr vid che haq keh, ha lehg che nag mand nawg haq yawd puhr ax che yaog,”
lehd koz che yaog. 10 Kheh te lehq,
† 1:10-12 Chid 102:25-27“Jawd mawd Ghig sa-og, awg kawd maq thad nawg mig gig haq te phanr lar lehq,
muhd nuh maq haq liz nawg ved laq kuhr te phanr lar che yaog.
11 U ve teq pa lug vehr tug yaog.
Kheh ma khuhd, nawg vawr khar thad liz yeg chehd tug yaog.
U ve awg gha lia beg ke heh te pir vehr tug yaog.
12 A poq nux haq loq lar che heh te lehq,
u ve teq pa haq nawg loq lehq kawq pa vid tug yaog.
Kheh ma khuhd, nawg khar thad liz kha sur suar te lehq,
nawg co co taer taer teq chehd che yaog,”
lehd koz che yaog. 13 U ve haq keh liz,
† 1:13 Chid 110:1“Nawg ved cand par teq pa haq
nawg ved khi kud awg huhx lo ngag tar thad kha gag,
ngag ved laq yaq awr pax awr huh mi lar-oq,”
lehz Ghig sa awr lehr muhd nuh maq cuh yad a sug te ghad haq koz vid jawa le. 14 Muhd nuh maq cuh yad awg gha lia vawr, thaer khuhq che awg sinx§ 1:14 thaer khuhq che awg sinx Co tiq ha tiq gha che haq koz che yaog. haq gha cad tug chaw teq pa awg pun kanx te tug, cuh lar che awg ha teq pa phehq che ma hez hawg la.
*1:2 1:2 A meha awg leh med ve awg ni awg hax che awg khuhn Liq che haq buhq chehd che awg yand haq koz che yaog.
†1:4 1:4 awg meh Yud daq chaw awg pun awg meh awr lehr, yawd ved awg ton, awg lid awg khad he lehq yawd te che kanx haq pheq mar che yaog lehz yonr che yaog. Khiz 17:5
†1:5 1:5a Chid 2:7
†1:5 1:5b 2Sm 7:14
‡1:6 1:6 yad kaog Yer suq haq koz che yaog.
†1:6 1:6 Bon 32:43
†1:7 1:7 Chid 104:4
†1:8 1:8-9 Chid 45:6-7
†1:10 1:10-12 Chid 102:25-27
†1:13 1:13 Chid 110:1
§1:14 1:14 thaer khuhq che awg sinx Co tiq ha tiq gha che haq koz che yaog.