Ed fed suq liq
Awg meh he lehq phehq peg che awg lawn
Ed fed suq med vawr, awg yand u ve khuhn Ar siq muhd mig nehax ghod che muhd ni kehg phawd awr cawg che a yed ir jad che med ted mag phehq che yaog. (A meha Tu ra ki muhd mig yaog). Awg lawn ghod ver Ed fed suq med awr lehr, tad kag nag khaex te daq che yaq kaw khad laex khad phanr kae kig phehq cheaq te lehq, tad kag te daq kig awg cuhz penr nux phehq vehr che yaog. U ve lehax ma hez ser, Ed fed suq med u ve khuhn awg meh buhg jad che Rod maq chaw a kor pi che awg lid khuhn ve ghig sa ma Dai nag sax ho ve bon yehg nux liz te tand lar che yaog. (Her lar saq khuhd ver, A te miq lehd koz che yaog). Pawd lod Ed fed suq med haq yawd ved kanx te kig awg cuhz penr te lar lehq med che khuhq seh khuhq kha gag chehd lehq ha lehg che bon khuhd mar che yaog. Liq che ve te koz vawr, Ed fed suq med khuhn chehd che Khreq yad awg mor haq lehax fe vid che ma hez hawg. Pawd loq yawd sehr pawz te pawz huh ha lehg che bon khuhd ca maer kig Ar siq muhd mig khuhn ve med teq pa khuhn cawg che Khreq yad awg mor teq pa haq liz fe vid lar che gha hawg.
Buhq var he lehq buhq che awg yand
A.D. 60 khuhq thad huh, cuh yad Pawd loq Rod maq med nux lo nid khuhq thawnr khuhn chehd thad huh, yawd buhq lar che yaog lehd chaw mad awr ve koz che yaog.
A yed ir che awg lawn he lehq awg lawn kha peg
Ed fed suq liq che ve te koz vawr, Pawd loq buhq lar che awg kag awg nuz awr ve liq haq pen daq lehq ma hez hez che mar khad he lehq mar yaq che awg ceng teq pa haq caz daq che awg lawn haq yawd mad buhq lar. Kheh ma khuhd, Ghig sa ve co co taer taer te che awg bon awg sinx he lehq duhd law che ted ceng khawd-ehg kheh taw maq kuhg, khawd-ehg kheh taw maq nax che haq ghawn par teq pa kha sehax na gha lehq, Ghig sa Khreq yad awg mor awg pun muh jad daq jad che duhd law lar che awg ceng teq pa haq liz i hehd ve ni ma sir khuhn kha nehax sir gha tug awg pun Pawd loq buhq lar che yaog. Liq che ve te koz awg khuhn a yed ir jad che ted ceng liz, teq mor ted chuhq ax lehax te che awg lawn haq buhq lar che yaog. U ve awr lehr, Khreq yad gha lia Ghig sa ve ted yehg yad ka yad lehax phehq che yaog. Kheh te cheaq te lehq, te ghad he lehq te ghad haq daq cawd che yaog. Che nuz awr liz yawd Khreq yad awg mor awg lawn kawq buhq lar che yaog. Khreq yad awg mor ghod che awr lehr, te lar che bon lawg kig yehg haq koz che ma hez. Khreq yad awg mor awr lehr, chaw mawd, yad nehg, haw khaz, yad mid, Khreq yad kha phehq che chaw awg gha lia haq koz che yaog.
Awg lawn nux
1. Awg kawd ve tawd (1:1-2)
2. Khreq ve awg miq awg phond he lehq Khreq yad awg mor ve a kor sir phehq che Khreq (1:3-14)
3. Khreq yad teq pa Ghig sa ve kand pax he lehq Ghig sa ve duhd law che ted ceng haq kha sehax sir tug awg pun Pawd loq bon lawg vid che (1:15-23)
4. Ghig sa duhd law lar che lo geh gha tug awg khad teq pa (2:1-3:21)
5. Khreq yad awg mor awg khuhn Ghig sa duhd law lar che haq te peh lawq gha tug awg khad (4:1-6:20)
6. Awg leh med ve tawd (6:21-24)
1
Awg chawd teq pa haq duhd nuhd che tawd
1 Ghig sa ve a lor cawd cheaq te lehq, Yer suq Khreq ve cuh yad phehq che ngag Pawd loq awr lehr, Ed fed suq med khuhn chehd che Khreq yad phehq lehq Yer suq Khreq haq yonr yeg che chaw teq pa haq liq che te koz buhq fea che yaog. 2 A nig ved Awr pa Ghig sa he lehq Jawd mawd Yer suq Khreq ve awg bon awg sinx* 1:2 awg bon awg sinx Gal 1:3 haq ngawx. he lehq duhd sa gad sa tug nig hehd geh cawg vid-oq.
Yer suq haq te lehq awg bon gha che awg lawn
3 A nig ved Jawd mawd Yer suq Khreq ve Awr pa Ghig sa haq chid muh-oq. Yawd awr lehr, co ha phawd awr awg pun muhd nuh maq haq caz daq che awg bon awg ceng gha lia, Khreq haq cud lehq a nig haq naq ax peor. 4 Mig gig maq te phanr ser thad loar, Ghig sa awr lehr, Khreq awg khuhn lo a nig haq lez yug lar peor.† 1:4 lez yug lar peor Ghig sa ve chaw te lar peg che haq koz gad che yaog. Rm 11:5 A nig awr lehr, yawd mehz khuhd suhr daq kehg che chaw he lehq yaq kig mad cawg che chaw gha phehq tug, yawd a nig haq lez yug lar che yaog.
5 Yer suq Khreq haq te lehq a nig Ghig sa ve awg yad phehaq tug, awg kawd thad loar yawd a nig haq haq lehq fir teh lar peor. Che kheh te tug, Ghig sa yawd ni ma cawd che yaog. 6 Yawd ved awg bon haq chid muh tug, Ghig sa haq jad che yawd ved Yad phu awg khuhn, awg mig awg phond cawg che yawd ved awg bon a nig haq yawd pehar lar che yaog. 7 Yad phu ve awg suhr haq te lehq, yawd awg khuhn a nig thaer khuhq che‡ 1:7 thaer khuhq che Vend bax awg khuhn suh chehd che chaw teq pa haq Yer suq ve awg suhr chuhd phu vid che haq koz che yaog. 1Pt 1:18-19 haq gha peor. Yer suq yawd ved awg bon ir jad mad jad cheaq te lehq, a nig ved yaq kig jiz kig teq pa haq yawd phehd kha ax che yaog.
8 Cud yiq ma yiq he lehq sir vix che awg ceng gha lia khuhn lo lehax, Ghig sa ve awg bon a nig haq sang te sang mad-ag tug yawd tea che yaog. 9 Kheh te cheaq te lehq, pong lag thad Ghig sa ve a lor awr lehr khuhd ceh lar che liz, a meha a nig haq Ghig sa yawd pheq mar ax peor. Yer suq haq cud lehq che kheh te tug yawd ni ma cawd che yaog. 10 Khawd-ehg kheh le lehd koz ver, awg yand gag vehr che te yand, muhd muh maq lo cawg che awg ceng gha lia lehd ma koz, mig gig khod-aq lo cawg che awg ceng gha lia lehd ma koz, Ghig sa cuhx daq caz daq vid lehq, Khreq haq uq penr cuh tug yaog.
11 Yer suq Khreq haq te lehq, a nig liz Ghig sa ve chaw phehq che yaog. Yawd a lor cawd che khuhn awg gha lia haq yawd te lar che yaog. Ghig sa awr lehr, yawd duhd lar che heh, awg kawd thad liz a nig haq fir teh lar peor. 12 Khreq haq awg kawd duhd law lar che§ 1:12 Khreq haq awg kawd duhd law lar che Yud daq chaw teq pa haq koz che yaog. ngag hehd teq pa awr lehr, yawd ved awg mig awg phond haq chid muh tug awg pun, yawd ngag hehd haq fir teh lar peor.
13 Nig hehd liz, nig hehd gha pong che awg lawn ha lehg che bon khuhd lehd koz che, thed che cawd che tawd khuhd haq gha kad peg lehq, Yer suq Khreq haq yonr vehr khaz nuhr, peha tug yaog lehd koz lar che Daq che kehg che Awg ha phu haq cud lehq, Ghig sa nig hehd haq maex lar peor.* 1:13 nig hehd haq maex lar peor Ghig sa ve chaw phehq vehor lehd koz gad che yaog. 14 Ghig sa a nig haq pong ax thad kha gag, Ghig sa ve awg sinx haq a nig gha cad tug haq sir vid tug, a meha liz Daq che kehg che Awg ha phu a nig haq pehar lar peor.† 1:14 Awg ha phu a nig haq pehar lar peor Awg ha phu pehar che awr lehr, Ghig sa ve chaw phehq vehr che sax khiz phehq che yaog. Che awr lehr, yawd ved awg mig awg phond haq a nig chid muh tug awg pun yaog.
I hehd duhd sir duhd pawnr tug bon lawg che
15 Kheh te cheaq te lehq, nig hehd Jawd mawd Yer suq haq yonr lehq, Khreq yad teq pa awg gha lia haq haq che awg lawn ngag gha kad peor. 16 Kheh te lehq, nig hehd haq te lehq ngag Ghig sa haq khar thad liz chid muh lehq, nig hehd awg pun bon lawg chehd che yaog. 17 Ngag bon lawg thad, awg mig awg phond ir che Awr pa phehq che, a nig ved Jawd mawd Yer suq Khreq ve Ghig sa awr lehr, yawd ved awg lawn haq nig hehd sir tug, duhd sir vix che ni ma he lehq pheq mar che teq pa haq sir vix che ni ma yawd nig hehd haq pid tug ngag lawg che yaog. 18 Yawd nig hehd haq kug yug cheaq te lehq, duhd law tug khawd-ehg kheh cawg che lehd ma koz, Khreq yad teq pa gha tug awg sinx khawd-ehg kheh ma awg mig awg phond ir jad mad jad che lehd ma koz, nig hehd ve ni ma awg khuhn kha sehax saw duhd mawg gha tug ngag bon lawg chehd che yaog. 19 Kheh te lehq, a nig kha yonr che chaw teq pa awg pun, koz mad peg thad kha gag yawd ved kand pax khawd-ehg taw maq ir jad che haq nig hehd sir tug liz, ngag bon lawg che yaog. Che ve haq Ghig sa te thad, kand pax ir jad hehnd jad che awg khuhn yawd te che yaog. 20 Kand pax u ve awr lehr, Khreq haq suh kig lo kawq teq tuag vid lehq, muhd nuh maq lo Ghig sa yawd ved laq yaq awr pax awr lo‡ 1:20 laq yaq awr pax awr lo Awg ghad ir lehq awg mig awg phond cawg che haq koz che yaog. yawd haq mi vid lar che yaog. 21 Yawd awr lehr, uq penr che phad awg gha lia, kand pax ir che phad awg gha lia, awg ghad ir che phad awg gha lia, jawd mawd awg gha lia he lehq awg meh kha cawg lar che awg gha lia, che teq co haq lehd ma koz, awg khaz nuhr teq co haq lehd ma koz, che awg gha lia thag lo yawd ir jad muh jad che yaog. 22 Awg ceng gha lia haq yawd awg huhx lo Ghig sa teh lar lehq, Khreq yad awg mor haq kha caz daq che awg gha lia awg thag lo yawd haq a kor phehq vid che yaog. 23 Khreq yad awg mor awr lehr, Yer suq ve awg ton yaog. Khreq yad awg mor awg khuhn Khreq peh lawq chehd lehq awg gha lia haq yawd peh lawq vid che yaog.
*1:2 1:2 awg bon awg sinx Gal 1:3 haq ngawx.
†1:4 1:4 lez yug lar peor Ghig sa ve chaw te lar peg che haq koz gad che yaog. Rm 11:5
‡1:7 1:7 thaer khuhq che Vend bax awg khuhn suh chehd che chaw teq pa haq Yer suq ve awg suhr chuhd phu vid che haq koz che yaog. 1Pt 1:18-19
§1:12 1:12 Khreq haq awg kawd duhd law lar che Yud daq chaw teq pa haq koz che yaog.
*1:13 1:13 nig hehd haq maex lar peor Ghig sa ve chaw phehq vehor lehd koz gad che yaog.
†1:14 1:14 Awg ha phu a nig haq pehar lar peor Awg ha phu pehar che awr lehr, Ghig sa ve chaw phehq vehr che sax khiz phehq che yaog.
‡1:20 1:20 laq yaq awr pax awr lo Awg ghad ir lehq awg mig awg phond cawg che haq koz che yaog.