1 ཡོ༌སེབ༌བི༌ ཁོང༌རང༌ངི༌ ཁང༌པའེ༌ ཁག༌ཁུར༌པའ༌ བཀའ༌ ཏངས༌ཏེ༌ ཟེརས༌, "ཁོང༌གུན༌ནི༌ ཕ༌ཙ༌གུན༌ནི༌ ཁའ༌ ཚག༌པ༌ སྐངས༌ཏེ༌ གྲུ༌ གྱོང ཡང༌ པེ༌ནེ༌ གི༌གུ༌ ཁོང༌གུན༌ནི༌ ཕ༌ཙའེ༌ ཁའེ༌ཀ༌ ལོགས༌ཏེ༌ གྱོང༌། 2 ནོ༌ ཆུང༌ཤོག༌གི༌ ཕ༌ཙའེ༌ ཁའེ༌ཀ༌ གྲུ༌ ཉོས༌ཁན༌ནི༌ པེ༌ནེ༌ ཉམ༌པོ༌ ངའེ༌ མུལ༌ལི༌ ཀོ༌རེ༌བོའང༌ གྱོང༌།" ཁོའེ༌ ཡོ༌སེབ༌བི༌ ཅོས༌ ཟེར༌ཁན༌བོ༌ ཅོས༌།

3 ཐོ༌རེ༌ཟུག༌པོ༌ ང༌མོ༌ནེ༌ ཡོ༌སེབ༌བི༌ སྤུན༌ལ༌གུན༌ ཁོ༌རང༌གུན༌ནི༌ བུང༌བུ༌ ཉམ༌པོ༌ ལོགས༌ཏེ༌ ལམ༌ཅུགས༌། 4 ཁོང༌གུན༌ གྱལ༌ས༌ནེ༌ མ༌ ཐག༌རིང༌ང༌ མེད༌ ཟ༌ནེ༌ ཡོ༌སེབ༌བི༌ ཁོ༌རང༌ངི༌ ཁང༌པའེ༌ ཁག༌ཁུར༌པའ༌ ཟེརས༌, "གྱོགས༌པ༌ ཏེ༌ མི༌གུན༌ནི༌ སྟིང༌རང༌ནེ༌ སོང༌ ཡང༌ ཁོང༌གུན༌ ཐུག༌ག༌ཅིག༌ ཟེར༌, 'ཟང༌པོའེ༌ ཚབས༌ལ༌ ངན༌པ༌ ཅིའ༌ ཅོས༌པིན༌? 5 ཁྱོ༌ཞའེ༌ ངའེ༌ སྤོན༌བོའེ༌ དོན༌ཅེས༌ དང༌ མ༌འོངས༌པའེ༌ ཏུས༌སི༌ ནང༌ང༌ བྱུང༌ཅེས༌གུན༌ ལྟའ༌ལ༌ ཀོལ༌ཁན༌ནི༌ མུལ༌ལི༌ ཀོ༌རེ༌ ཅིའ༌ རྐུས༌པིན༌? ཁྱོ༌ཞའེ༌ ངན༌པ༌ ལས༌ ཅོས༌ཏེ༌ ཨིན༌ནོག༌།' "

6 ཡོག༌པོའེ༌ ཁོང༌གུན༌ ཐུག༌ག༌ཅིག༌, ཁོའེ༌ ཏེན༌ན༌ ཙོགས༌ ཟེརས༌། 7 ཨིན༌ནའང༌ ཁོང༌གུན༌ནི༌ ལན༌ཏངས༌, "སྤོན༌བོ༌ལེ༌ ཉེ༌རང༌ངི༌ ཏེ༌ཟུག༌ ཅིའ༌ མོལ༌ལད༌? ཏན༌ཏན༌ ང༌ཞའེ༌ ཏེ༌ཟུག༌ ལས༌ མ༌ཅོས༌པིན༌། 8 ཕ༌ཙའེ༌ ནང༌ང༌ ཡོད༌ཁན༌ནི༌ པེ༌ནེ༌ ང༌ཞའེ༌ ཀེ༌ནན༌ནེ༌ ལོགས༌ཏེ༌ ཁྱོངས༌ཏེ༌ ཉེ༌རང༌ང༌ མ༌ཏངས༌ས༌? ཏེ༌ནེ༌ ཉེ༌རང༌ངི༌ སྤོན༌བོའེ༌ ཁང༌པ༌ནེ༌ མུལ༌ ཡ༌ སེར༌ ང༌ཞ༌གུན༌ནི༌ ཅིའ༌ རྐུ༌ཨིན༌? 9 ང༌ཞའ༌ སུ༌ཞིག༌གི༌ ལག༌ནེ༌ ཏེ༌བོ༌ ཐོབ༌ན༌ ཁོ༌ སད༌ནའང༌ གྲིག༌ ཡང༌ ང༌ཞའ༌ ལུས༌ཁན༌ ཚང༌མ༌ ཉེ༌རང༌ངི༌ སྤོན༌བོའེ༌ ཚེ༌ཡོག༌ གྱུར༌ཨིན༌།"

10 ཁོའེ༌ ཟེརས༌, "ཁྲིག༌རག༌། ཨིན༌ནའང༌ ཀོ༌རེ༌ ཐོབ༌ཁན༌ ཅིག༌པོ༌ ངའེ༌ ཚེ༌ཡོག༌ གྱུར༌ཨིན༌, ཞན༌གུན༌ ལོགས༌ཏེ༌ ཆ༌ནའང༌ གྲིག༌།"

11 ཁོང༌གུན༌ནི༌ གྱོགས༌པ༌ ཁོ༌རང༌གུན༌ནི༌ ཕ༌ཙ༌ སའི༌ཀ༌ ཕབས༌ཏེ༌ ཁའ༌ ཕེས༌། 12 ཏེ༌ནེ༌ ཡོག༌པོའེ༌ ཙལ༌ཅེས༌ གོ༌ཟུག༌, ཆེ༌ཤོག༌ནེ༌ ཏངས༌ཏེ༌ ཆུང༌ཤོག༌ ཚོག༌པ༌ ཡང༌ ཀོ༌རེ༌བོ༌ བེན༌ཡཱ༌མིན༌ནི༌ ཕ༌ཙའེ༌ ནང༌ང༌ ཐོབ༌། 13 ཏེ༌བོ༌ ཐོང༌ཏེ༌ ཨ༌ཅོ༌གུན༌ནི༌ ཚེར༌ཁའེ༌ ནང༌ང༌ ཁོ༌རང༌གུན༌ནི༌ ཀོས༌ ཤགས༌ ཡང༌ ཁོ༌རང༌གུན༌ནི༌ བུང༌བུ༌གུན༌ལ༌ གལ༌ ཀལ༌ཏེ༌ གྱལ༌ས༌ ལོགས༌ཏེ༌ སོང༌།

14 ཡ༌ཧུ༌དཱ༌ དང༌ ཁོའེ༌ སྤུན༌ལ༌གུན༌ ཡོ༌སེབ༌བི༌ ཁང༌པ༌ ལེབ༌བ༌ཅིག༌ ཁོ༌ ཏེ༌རུ༌ ཡོད༌པིན༌། ཁོང༌གུན༌ ཁོའེ༌ རྐང༌པའེ༌ཀ༌ གྱེལས༌། 15 ཡོ༌སེབ༌བི༌ ཁོང༌གུན༌ལ༌ ཟེརས༌, "ཁྱོ༌ཞའེ༌ འི༌བོ༌ ཅི༌ ཅོས༌ཏེ༌ ཨིན༌? ངའ༌, སྦས༌ཏེ༌ ཅོ༌ཁན༌གུན༌ ཤད༌ ཉན༌ཁན༌ནི༌ མི༌ཞིག༌ ཨིན༌ཁན༌བོ༌ ཁྱོ༌ཞའ༌ གྱུས༌ མེ༌ད༌?"

16 ཡ༌ཧུ༌དཱའེ༌ ལན༌ཏངས༌, "སྤོན༌བོ༌ལེ༌ ང༌ཞའེ༌ ཉེ༌རང༌ང༌ ཅི༌ ཞུ༌? ང༌ཞའེ༌ ཅི༌ ཟེར༌? ཀ༌ཟུག༌གི༌ ང༌ཞའེ༌ ང༌ཞའ༌ ནོངས༌མེད༌ ཨིན༌ཁན༌བོ༌ ལྟན༌? དཀོན༌མཆོག༌གི༌ ང༌ཞའེ༌ ཅོ༌ཁན༌ནི༌ སྡིག༌པ༌ ལྟན༌ན༌ ཛད༌ཏེ༌ ཨིན༌ནོག༌། ཏ༌ ཀོ༌རེ༌ ཐོབ༌ཁན༌བོ༌ ཅིག༌པོ༌ མན༌པ༌ ང༌ཞའ༌ ཚང༌མ༌ ཉེ༌རང༌ངི༌ ཚེ༌ཡོག༌ ཨིན༌།"

17 ཨིན༌ནའང༌ ཡོ༌སེབ༌བི༌ ཟེརས༌, "ངའེ༌ ཏེ༌ཟུག༌ མ༌ནེ༌ མི༌ཅོ༌། ཀོ༌རེ༌ ཐོབ༌ཁན༌བོ༌ ཅིག༌པོ༌ ངའེ༌ ཚེ༌ཡོག༌ གྱུར༌གོས༌། ཞན༌གུན༌ ཞི༌དེ༌ ཉམ༌པོ༌ ཁྱོ༌ཞ༌རང༌ངི༌ ཨ༌བ༌ ཡོད༌ས༌ སོང༌།"

18 ཡ༌ཧུ༌དཱ༌ ཡོ༌སེབ༌ ཡོད༌ས༌ སོང༌ཏེ༌ ཟེརས༌, "ཇུ༌ཇུ༌ སྤོན༌བོ༌ལེ༌, ཉེ༌རང༌ངི༌ ཡོག༌པོའ༌ སྤེ༌ར༌ ཞིག༌ ཟེར༌ཅུག༌ག༌ ཛད༌། ངའེ༌ཀ༌ ཐུགས༌སྲོ༌ མ༌སྐྱོད༌, ཉེ༌རང༌ང༌ ཝང༌ཆ༌ ཨི༌ཇིབ༌བི༌ གྱལ༌པོ༌ ཙོགས༌ ཡོད༌། 19 སྤོན༌བོ༌ལེ༌ ཉེ༌རང༌ངི༌ ང༌ཞའ༌ ཏྲིའ༌ ཛདས༌, 'ཁྱོ༌ཞ༌གུན༌ལ༌ ཨ༌བ༌ ཡ༌ ཞན༌ ཨ༌ཅོ༌ནོ༌ ཡོད༌ད༌?' 20 ཡང༌ ང༌ཞའེ༌ ཉེ༌རང༌ང༌ ལན༌ཏངས༌པིན༌, 'ང༌ཞ༌གུན༌ལ༌ ཨ༌བ༌ རྒད༌པོ༌ ཡང༌ ཁོང༌ང༌ རྒད༌པོའེ༌ ཏུས༌ལ༌ ཇོར༌ཁན༌ནི༌ བུ༌ཚ༌ཞིག༌ ཡོད༌། ཨ༌མ༌ ཅིག༌གི༌ ཕྲུ༌གུ༌ ཁོའེ༌ ཨ༌ཅོ༌ ཤི༌པ༌ ཁོ༌རང༌ ཅིག༌པོ༌ མན༌ནེ༌ མེད༌ ཡང༌ ཁོའེ༌ ཨ༌བའེ༌ ཁོའ༌ མའ༌ སྲན༌ཏྲེ༌ ཡ༌ཤ༌ ཅོའད༌།' "

21 "སྤོན༌བོ༌ལེ༌ ཉེ༌རང༌ངི༌ ང༌ཞའ༌ མོལ༌ལ༌རག༌, 'ང༌ ཁོ༌ ཐོང༌ཐུབ༌ཅེས༌ལ༌ ཁྱོ༌ཞའེ༌ ཁོ༌ འི༌རུ༌ ཁྲིད༌ཏེ༌ ཁྱོང༌།' 22 ཡང༌ ང༌ཞའེ༌ ཟེར༌པིན༌, 'བེན༌ཡཱ༌མིན༌ ཨ༌བ༌ བོར༌ཏེ༌ ཡོང༌མི༌ཉན༌, གལ༌ཏེས༌ ཡོང༌ན༌ ཨ༌བ༌ ཀྲོངས༌ས༌ནོག༌།' 23 ཨིན༌ནའང༌ ཉེ༌རང༌ངི༌ མོལས༌, 'ཁྱོ༌རང༌གུན༌ ཉམ༌པོ༌ ནོ༌ ཆུང༌ཤོག༌པོ༌ ཡོད༌ཏེ༌ མན༌ནེ༌ ཁྱོ༌ཞ༌གུན༌ ངའེ༌ དུན༌ལ༌ ཡོང༌ མི༌ཆོགས༌།' 24 ང༌ཞ༌གུན༌ ང༌ཞའེ༌ ཨ༌བའེ༌ཀ༌ ལོགས༌ཏེ༌ སོང༌ཏེ༌ ང༌ཞའེ༌ ཉེ༌རང༌ངི༌ མོལ༌ཁན༌ ཚང༌མ༌ ཁོང༌ང༌ ཤད༌པིན༌།"

25 "སྟིང༌ནེ༌ ང༌ཞའེ༌ ཨ༌བའེ༌ ང༌ཞའ༌ གྲུ༌ ཉོའ༌ལ༌ ཡང༌སྐྱར༌ སོན༌ ཟེར༌ར༌རག༌། 26 ཨིན༌ནའང༌ ང༌ཞའེ༌ ཁོང༌ང༌ ཟེར༌པིན༌, 'ནོ༌ ཆུང༌ཤོག༌པོ༌ ང༌ཞའ༌ ཉམ༌པོ༌ ཀལ༌ན༌ ང༌ཞ༌གུན༌ ཆེན༌། ང༌ཞ༌གུན༌ནི༌ ནོ༌ ང༌ཞའ༌ ཉམ༌པོ༌ ཡོད༌ཏེ༌ མན༌ནེ༌ ང༌ཞའ༌ ཏེ༌ མི༌བོའེ༌ དུན༌ལ༌ ཆ༌ མི༌ཉན༌།' "

27 "ཉེ༌རང༌ངི༌ ཡོག༌པོ༌, ང༌ཞའེ༌ ཨ༌བའེ༌ ང༌ཞའ༌ མོལས༌, 'ཁྱོ༌རང༌གུན༌ལ༌ གྱུས༌ཨིན༌ནོག༌ ངའེ༌ ན༌མ༌ རེ༌ཅལ༌ལི༌ ངའ༌ བུ༌ཚ༌ ཉིས༌ ཏངས༌། 28 ཏེ༌ནང༌ནེ༌ ཅིག༌པོ༌ སྟོར༌, ཏན༌ཏན༌ ཁོ༌ རི༌ སེམས༌ཅན༌གུན༌ནི༌ ཟོས༌ཏེ༌ ཡོད༌གྲོ༌། ཏེ༌ ཏུས༌ནེ༌ ཕར༌ལ༌ ངའེ༌ ཁོ༌ མ༌ཐོང༌ང༌ཨིན༌། 29 གལ༌ཏེས༌ ཁྱོ༌ཞ༌གུན༌ནི༌ ཁོའང༌ ངའེ༌ ཀ༌ནེ༌ ཁྱེར༌ཏེ༌ ཁོ༌ ཉམ༌པོ༌ ངན༌པ༌ ཆ༌ན༌, ཁྱོ༌ཞ༌གུན༌ནི༌ རྒད༌པོ༌ ངའ༌ རྡུག༌ངལ༌ ལྟན༌ཏེ༌ ཤི༌ ཅུག༌ཨིན༌།' "

30 "ཏ༌ སྤོན༌བོ༌ལེ༌ ང༌ཞའ༌ བུ༌ཚ༌བོ༌ མ༌ཁྲིད༌ད༌ ཨ༌བ༌ ཡོད༌ས༌ ཆ༌ ཉན༌ཅེས༌ མེད༌། ང༌ཞ༌གུན༌ནི༌ ཨ༌བའེ༌ སྲོག༌, འི༌ བུ༌ཚའེ༌ ནང༌ང༌ ཡོད༌ཏེ༌ ཨིན༌ནོག༌, 31 བེན༌ཡཱ༌མིན༌ ང༌ཞའ༌ ཉམ༌པོ༌ མེད༌ཁན༌བོ༌ ཐོང༌ཏེ༌ ཁོང༌ ཀྲོངས༌ཨིན༌། ང༌ཞའེ༌ ང༌ཞ༌རང༌ངི༌ ཨ༌བ༌ རྒད༌པོའ༌ རྡུག༌ངལ༌ ལྟན༌ཏེ༌ ཤི༌ ཅུག༌ག༌ནོག༌། 32 ངའེ༌ ཁོ༌ ཁམ༌ཟང༌ ཉམ༌པོ༌ ལོགས༌ཏེ༌ ཁྱོང༌ཨིན༌ ཟེར༌ཏེ༌ ང༌རང༌ངི༌ ཨ༌བའ༌ ཁ༌ཆད༌ ཅོས༌ཏེ༌ ཟེར༌པིན༌, 'གལ༌ཏེས༌ མ༌ཁྱོང༌ན༌ མི༌ཚེ༌ གང༌པོ༌ ཏེ༌བོའེ༌ སྐྱོན༌ ངའ༌ ཀལ༌ནའང༌ གྲིག༌།' "

33 "སྤོན༌བོ༌ལེ༌, ཏ༌ ང༌ འི༌རུ༌ ཁོའེ༌ ཚབས༌ལ༌ ཉེ༌རང༌ངི༌ ཚེ༌ཡོག༌ག༌ བོར༌ར༌ ཛད༌ ཡང༌ ཁོ༌ ཁོ༌རང༌ངི༌ ཨ༌ཅོ༌གུན༌ ཉམ༌པོ༌ ལོགས༌ཏེ༌ ཆའ༌ ཅུག༌ག༌ ཛད༌། 34 བུ༌ཚ༌བོ༌ མ༌ཁྲིད༌ད༌ ཀ༌ཟུག༌གི༌ ང༌ ང༌རང༌ངི༌ ཨ༌བ༌ ཡོད༌ས༌ ལོགས༌ཏེ༌ ཆེན༌། ཨ༌བའ༌ རྡུག༌ངལ༌ ཐོང༌ཅེས༌པོ༌ ངའ༌ ལྟ༌ཐུབ༌ཅེས༌ མེ༌རག༌།"