22
1 "ཡ༌ཧུ༌དཱ༌པའེ༌ སྤུན༌ དང༌ འུ༌སྐྱོང༌ གུན༌, ངའ༌ སྐྱོན༌ཀལ༌ཁན༌གུན༌ལ༌ ངའེ༌ ལན༌ཏང༌ཅེས༌ཅན༌བོ༌ ཉོན༌ཤིག༌།" 2 མི༌ཚོགས༌སི༌ ཁོང༌ངི༌ ཨིབ༌རི༌པའེ༌ སྐད༌དི༌ ནང༌ང༌ མོལ༌ལ༌ ཚོར༌ར༌ཅིག༌, ཁོང༌གུན༌ མང༌ང༌ ཅུབ༌ཅདས༌།
ཏེ༌ནེ༌ པ༌འུ༌ལུའི༌ མོལས༌, 3 "ང༌ ཀཱི༌ལི༌ཀི༌ཡཱ༌ ཡུལ༌ཇོངས༌སི༌ ཏར༌སས༌ གྱལ༌ས༌ སྐྱེས༌ཁན༌ནི༌ ཡ༌ཧུ༌དཱ༌པ༌ཞིག༌ ཨིན༌, ཨིན༌ནའང༌ འིན༌ན༌ གྱལ༌སའེ༌ ནང༌ང༌ ལོབ༌པོན༌ གཱ༌མ༌ལི༌ཨེལ༌ནེ༌ ངའ༌ ལོབ༌ཇོང༌ ཐོབ༌ཏེ༌ ཨིན༌། ཁོང༌ངི༌ ལོབ༌ཕྲུགས༌ ཨིན༌པ༌ ང༌ ཡ༌ཧུ༌དཱ༌པའེ༌ ཆོས༌ཁྲིམས༌ དང༌ ལུགས༌སྲོལ༌ གུན༌ སྲུང༌ཅེས༌སི༌ ལོབ༌ཇོང༌ གྱལ༌ལ༌ ཐོབ༌། དཀོན༌མཆོག༌ག༌ ངའེ༌ སྙིང༌ངི༌ ཐིལ༌ནེ༌ ཅེས༌པ༌ ཅོས༌ཁན༌བོ༌ ལག༌ལེན༌ལ༌ ཁྱོངས༌པིན༌, ཀ༌ཟུག༌ དི༌རིང༌ ཁྱོ༌ཞའ༌ ཚང༌མའེ༌ ཅོ༌ཨིན༌ ཨིན༌ནོག༌། 4 ངའེ༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌གུན༌ལ༌ ནགས༌ སྲན༌ཏྲེ༌ ལྟན༌པིན༌ ཡང༌ ཁ༌ཅིག༌ ཤིའང༌ ཤི༌། བུ༌ཚ༌ ཨིན༌གྲོ༌ ཡ༌ བུ༌མོ༌ ངའེ༌ ཚང༌མ༌ ཟུམས༌ཏེ༌ ཙོན༌ཁང༌ང༌ ཀགས༌པིན༌། 5 ཏེ༌བོའེ༌ སྤང༌པོ༌ བླ༌མ༌ ཆེན༌མོ༌ དང༌ ཚོགས༌དུའི༌ འུ༌སྐྱོང༌ ཚང༌མ༌ ཨིན༌། ཁོང༌གུན༌ནི༌ ཆོགས༌ནེ༌ དཱ༌མེས༌ཁས༌སི༌ ཚོགས༌དུའི༌ ལས༌ ཅོ༌ཁན༌ ཕྲོ༌པ༌གུན༌ལ༌, ངའ༌ ཝང༌ཆ༌ ཏང༌ཁན༌ནི༌ ཨི༌གེ༌ ཁུར༌ཏེ༌, མ༌ཤི༌ཀའེ༌ཀ༌ ཏད༌པ༌ ཅོ༌ཁན༌གུན༌ ཏགས༌ཏེ༌ ཡེ༌རུ༌ཤ༌ལེམ༌མ༌ ཆད༌པ༌ ཅད༌ཅེས༌ལ༌ ཁྱོང༌ཅེས༌སི༌ ཕིའ༌ སོང༌པིན༌།"
6 "ཉིང༌གུང༌ ཟམ༌ཤིག༌ག༌, ང༌ དཱ༌མེས༌ཁས༌སི༌ ཉེ༌མོའ༌ ལེབ༌བ༌ཅིག༌, ཧུན༌མེད༌ལ༌ ནམ༌ཁའ༌ནེ༌ འོད༌དི༌ ཟེར༌ ཀྲག༌པོ༌ཞིག༌ བབས༌ཏེ༌ ངའ༌ སྐོར༌ ཏངས༌། 7 ང༌ སའེ༌ཀ༌ གྱེལ༌, ཡང༌ ངའ༌ སུང༌སྐད༌ཅིག༌ ཚོར༌, 'ས༌འུལ༌! ས༌འུལ༌! ཁྱོ༌རང༌ངི༌ ང༌ ཅིའ༌ ནགས༌ ལྟན༌ནད༌'།"
8 "ངའེ༌ ཏྲིས༌པིན༌, 'གཙོ༌བོ༌ ཉེ༌རང༌ སུ༌ ཞུགས༌ཏེ༌ ཨིན༌'།"
"ཁོང༌ངི༌ མོལ༌ལ༌རག༌, 'ང༌ ཁྱོ༌རང༌ངི༌ ནགས༌ ལྟན༌ཁན༌ ན༌ཙ༌རེད༌པ༌ ཡེ༌ཤུ༌ ཨིན༌།' 9 ངའེ༌ ཕྲོ༌པ༌གུན༌ནི༌ ཏེ༌ འོད༌པོ༌ ཐོང༌, ཨིན༌ནའང༌ ཁོང༌གུན༌ནི༌ ང༌ མོལ༌ཁན༌ནི༌ སྐད༌པོ༌ ཧ༌མ༌གོ༌།"
10 "ངའེ༌ ཏྲིས༌པིན༌, 'ཀྱེ༌ གཙོ༌བོ༌ ངའེ༌ ཅི༌ ཅོ༌'།"
"གཙོ༌བོའེ༌ ངའ༌ མོལ༌ལ༌རག༌, 'ལོངས༌, དཱ༌མེས༌ཁས༌ལ༌ སོང༌, ཏེ༌རུ༌ ཁྱོ༌རང༌ང༌ ཅི༌ ཅོ༌གོ༌ཤེས༌ ཚང༌མ༌ ཤད༌ཨིན༌།' 11 ངའེ༌ ཕྲོ༌པ༌གུན༌ནི༌ ང༌ ལག༌པ༌ ཐམས༌ཏེ༌ དཱ༌མེས༌ཁས༌ལ༌ ཁྲིད༌ཏེ༌ ཁྱེརས༌ ཅིའ༌ཟེར༌ན༌ འོད༌དི༌ ལྡངས༌ ཀྲག༌པོའེ༌, ངའེ༌ མིག༌པོ༌ ཞར༌ ཅུགས༌།"
12 "ཏེ༌རུ༌ ཨ༌ན༌ནི༌ཡཱས༌ ཞུ༌ཁན༌ནི༌ མི༌ཞིག༌ ང༌ ལྟའ༌ལ༌ ཡོངས༌། ཁོང༌ དཀོན༌མཆོག༌གི༌ སྕོད༌ལམ༌མི༌ཀ༌ གྲུལ༌ཁན༌ དང༌ བཀའ༌ཁྲིམས༌གུན༌ སྲུང༌ཁན༌, ཡང༌ ཏེ༌རུ༌ དུག༌ཁན༌ནི༌ ཡ༌ཧུ༌དཱ༌པ༌གུན༌ནི༌ ཁོང༌ང༌ མ༌ རྩི༌ཝ༌ ཅོའད༌པིན༌། 13 ཁོང༌ ངའེ༌ དུན༌ལ༌ ཡོངས༌ཏེ༌ མོལ༌ལ༌རག༌, 'སྤུན༌ ས༌འུལ༌, ཁྱོ༌རང༌ང༌ ཡང༌སྐྱར༌ ཐོང༌ཤིག༌,' ཏེན༌ན༌མལ༌ལ༌ ངའ༌ ཁོང༌ ཐོང༌ཐུབ༌།"
14 "ཏེ༌ནེ༌ ཁོང༌ངི༌ མོལས༌, 'ང༌དང༌ངི༌ ཕ༌མེས༌པོའེ༌ དཀོན༌མཆོག༌གི༌ ཁྱོ༌རང༌ང༌ ཁོང༌ངི༌ ཐུག༌གོངས༌ ཤེས༌ཤེས༌, དྲང༌པོ༌ ཨིན༌ཁན༌བོ༌ ཇལ༌ཅེས༌ དང༌ ཁོང༌ངི༌ ཞལ༌ཏ༌ ཚོར༌ཅེས༌ལ༌ ལྡམ༌མ༌ ཛད༌ཏེ༌ ཨིན༌། 15 ཁྱོ༌རང༌ངི༌ ཚང༌མ༌ལ༌ ཁྱོ༌རང༌ང༌ ཐོང༌ཁན༌ དང༌ ཚོར༌ཁན༌ གུན༌ནི༌ སྤང༌པོ༌ ཏང༌ཨིན༌། 16 ཏ༌ ཅི༌ཕིའ༌ སྲུངས༌ཏེ༌ ཨིན༌, ལངས༌ཏེ༌ ཁྲུས༌ལེན༌ ཡང༌ རང༌ངི༌ སྡིག༌པ༌གུན༌ སེལ༌ཅེས༌ལ༌ གཙོ༌བོ༌ ཡེ༌ཤུའ༌ མོས༌ལམ༌ ཞུས༌'།"
17 "ང༌ ཡེ༌རུ༌ཤ༌ལེམ༌མ༌ ལོགས༌ཏེ༌ ཡོངས༌ཏེ༌ སྟིང༌ནེ༌ ཆོད༌ཁང༌ངི༌ ནང༌ང༌ མོས༌ལམ༌ ཞུ༌ ཟ༌ནེ༌, ངའེ༌ ཞལ༌ཟིགས༌ཤིག༌ ཐོང༌། 18 ཏེ༌ནང༌ང༌ གཙོ༌བོའེ༌ ངའ༌ མོལ༌ལ༌རག༌, 'གྱོགས༌པ༌ ཅོས༌, ཡེ༌རུ༌ཤ༌ལེམ༌ནེ༌ དག༌ས༌རང༌ བིང༌ཏེ༌ སོང༌, ཅིའ༌ཟེར༌ན༌ ཁྱོ༌རང༌ངི༌ ངའེ༌ སྐོར༌ལ༌ སྤང༌པོ༌ ཏང༌ཅེས༌པོའ༌ འི༌ མི༌གུན༌ནི༌ མི༌ཉན༌'།"
19 "ངའེ༌ གཙོ༌བོའ༌ ཟེར༌པིན༌, 'ཀྱེ༌ གཙོ༌བོ༌ ངའེ༌ དུ༌ཁང༌ ཚང༌མའེ༌ ནང༌ནེ༌ ཉེ༌རང༌ང༌ ཏད༌པ༌ ཅོ༌ཁན༌གུན༌ ཟུམས༌ཏེ༌ ཙོན༌ལ༌ ཀགས༌ཏེ༌ རྡུང༌ཁན༌བོ༌ འི༌ མི༌གུན༌ལ༌ གྱུས༌ཡོད༌། 20 ཡང༌ ཉེ༌རང༌ངི༌ སྤང༌པོ༌ ཏང༌ཁན༌ སྟེ༌ཕན༌ སད༌ ཟ༌ནེ༌ ང༌རང༌ ཏེ༌རུ༌ ཁོང༌ སད༌ཁན༌གུན༌ནི༌ ཀོས༌ལག༌གུན༌ སྲུང༌ཨིན༌ ཁོང༌གུན༌ནི༌ ཅོ༌ཁན༌ནི༌ ལས༌པོའེ༌ ནང༌ང༌ ངའང༌ ཁའ༌ཆམས༌ཏེ༌ ཨིན༌'"
21 "ཏེ༌ནེ༌ གཙོ༌བོའེ༌ ང༌ མོལས༌, 'སོང༌ ངའེ༌ ཁྱོ༌རང༌ ཐག༌རིང༌ང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཀལ༌ཨིན༌'།"
22 ཏེ༌ སྤེ༌ར༌བོ༌ ཟེར༌ཟེར༌ ཚག༌པ༌ མི༌ཚོགས༌ གང༌པོ༌ པ༌འུ༌ལུའི༌ ཞལ༌ཏ༌གུན༌ ཞིབ༌ཅ༌ ཉམ༌པོ༌ ཉན༌ཏེ༌ དུགས༌། ཏེ༌བོ༌ ཚོར༌ར༌ཅིག༌, ཁོང༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, "འི༌ མི༌བོ༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོས༌། ཁོ༌ སོན༌ཏེ༌ དུག༌ཅེས༌སི༌ འོས༌པ༌ མི༌དུག༌།"
23 མི༌གུན༌ནི༌ ཆད༌མེད༌ལ༌ ཀུ༌ཅོ༌ ཏང༌ཨིན༌ རང༌རང༌ངི༌ ཁ༌ཐོག༌གི༌ ཀོས༌གུན༌ ཕུད༌ཏེ༌ ཕངས༌, ཡང༌ ལག༌པའེ༌ ནང༌ང༌ ཐལ༌བ༌ ཁུར༌ཏེ༌ ཡོགས༌།
པ༌འུ༌ལུ༌ རོམ༌པ༌ ཨིན༌ཁན༌ སྔོན༌ཅུགས༌།
22:24 ནེ༌ 30
24 མག༌སྟོང༌ངི༌ སྤོན༌བོའེ༌ པ༌འུ༌ལུ༌ ཀི༌ལའེ༌ ནང༌ང༌ ཁྱེར༌ཅེས༌ལ༌ བཀའ༌ ཏངས༌, ཡང༌ རྟལ༌ལྕག༌ གྱབ༌ཏེ༌ མི༌གུན༌ནི༌ ཅི༌ཕིའ༌ ཁོའེ༌ གྱབ༌གལ༌ལ༌ ཀུ༌ཅོ༌ ཏངས༌ཏེ༌ ཨིན༌ནོག༌ ཏེ༌བོ༌ གྱུས༌ ཅོ༌ཅེས༌ལ༌ ཟེརས༌། 25 རྟལ༌ལྕག༌ གྱབ༌ཅེས༌ལ༌ ཁོང༌གུན༌ནི༌ པ༌འུ༌ལུའི༌ རྐང༌ལག༌ ཅིང༌ང༌ཅིག༌, དུན༌ལ༌ ཡོད༌ཁན༌ནི༌ མག༌མི༌རྒྱའེ༌ སྤོན༌བོ༌ཞིག༌ག༌ པ༌འུ༌ལུའི༌ མོལས༌, "རོམ༌པ༌ཞིག༌ག༌ ཁོའེ༌ སྐྱོན༌ གྱུས༌ མ༌ཅོའ༌ རྟལ༌ལྕག༌ གྱབ༌ཅེས༌པོ༌ འོས༌པ༌ ཨིན༌ནོག༌ག༌?"
26 ཏེ༌བོ༌ ཚོར༌ར༌ཅིག༌, ཁོ༌ མག༌སྟོང༌ངི༌ སྤོན༌བོའེ༌ཀ༌ སོང༌ཏེ༌ ཟེརས༌, "ཉེ༌རང༌ངི༌ ཅི༌ ཛད༌ཏེ༌ ཨིན༌? འི༌ མི༌བོ༌ རོམ༌པ༌ ཨིན༌ནོག༌།"
27 མག༌སྟོང༌ངི༌ སྤོན༌བོ༌ ཡོངས༌ཏེ༌ པ༌འུ༌ལུའ༌ ཏྲིས༌, "ངའ༌ ཤོད༌དའང༌, ཁྱོ༌རང༌ རོམ༌པ༌ ཨིན༌ན༌?"
ཁོང༌ངི༌ མོལས༌, "ང༌ ཨིན༌།"
28 མག༌སྟོང༌ངི༌ སྤོན༌བོའེ༌ ཟེརས༌, "པེ༌ནེ༌ མང༌པོ༌ ཏངས༌ཏེ༌ མ༌ནེ༌ ངའ༌ རོམ༌པ༌ མ༌གྱུར༌།"
པ༌འུ༌ལུའི༌ མོལས༌, "ང༌ སྐྱེས༌པ༌ནེ༌ ཕར༌ལ༌ རོམ༌པ༌ ཨིན༌།"
29 པ༌འུ༌ལུའ༌ ཏྲི༌སོ༌ ཏང༌ཅེས༌ལ༌ དུགས༌ཏེ༌ ཡོད༌ཁན༌གུན༌, ཏེན༌ན༌མལ༌ལ༌ བིང༌ཏེ༌ སོང༌། རོམ༌པ༌ ཨིན༌ཁན༌ནི༌ པ༌འུ༌ལུ༌ ལྕག༌ཐག༌ག༌ ཏག༌ཅེས༌ལ༌ བཀའ༌ ཏངས༌ཅེས༌པོ༌ ནོར༌ཏེ༌ ཨིན༌ཁན༌ ཧ༌གོའ༌ཅིག༌, མག༌སྟོང༌ངི༌ སྤོན༌བོ༌ སྲན༌ཏྲེ༌ ཇིགས༌།
30 སྟིང༌མ༌ཞག༌པོ༌ མག༌སྟོང༌ངི༌ སྤོན༌བོའེ༌ ཡ༌ཧུ༌དཱ༌པ༌གུན༌ནི༌ པ༌འུ༌ལུའ༌ སྐྱོན༌ ཅིའ༌ ཀལ༌ཏེ༌ ཨིན༌ནོག༌ གྱུས༌ ཅོ༌ཅེས༌ལ༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌གུན༌ དང༌ བླ༌མ༌ འུ༌སྐྱོང༌གུན༌ བོད༌ཏེ༌ ཁྱོངས༌། ཏེ༌ནེ༌ ཁོའེ༌ པ༌འུ༌ལུ༌ ཁྱོང༌ཅུགས༌ཏེ༌ ཁོང༌གུན༌ནི༌ དུན༌ལ༌ ལངས༌ཏེ༌ དུག༌ཅུགས༌།