11
པ༌འུ༌ལུ༌ དང༌ ཟུས༌མའེ༌ སྐུ༌ཚབས༌གུན༌།
11:1 ནེ༌ 15
1 ཏ༌རུང༌ངའང༌ ངའེ༌ སམ༌བ༌ མ༌ཏང༌ང༌ ཕོ༌སོ༌ ཅོ༌ཁན༌བོའ༌, ཁྱོ༌ཞ༌གུན༌ ཙ༌པིག༌ཤིག༌ སྣང༌ང༌ མ༌ཚེར༌ར༌ ཉན༌ཅེས༌སི༌ རེ༌ཝ༌ ཅོའད༌། ཐུག༌རྗེ༌ ཛད༌ཏེ༌ ང༌ ཉམ༌པོ༌ ཟོད༌པ༌ སྒོམ༌ཤིག༌། 2 དཀོན༌མཆོག༌གི༌ ཁྱོ༌ཞ༌ ཁོང༌རང༌ ཅིག༌པོའེ༌ ཨིན༌ཅེས༌སི༌ ཐུགས༌དོད༌ ཡོད༌ད༌ ཙོགས༌ལ༌, ངའེ༌ ནང༌ངའང༌ ཁྱོ༌ཞ༌གུན༌ནི༌ ཕིའ༌ ཏེན༌ན༌ ཙོགས༌ དོད༌པ༌ རག༌། ཨ༌བའེ༌ ཁོང༌རང༌ངི༌ བུ༌མོ༌བོ༌ ཁོའེ༌ མག༌པའེ༌ ལག༌ག༌ སྟད༌ ཟ༌ནེ༌, རྩང༌མ༌ཞིག༌ ཡོང༌གོ༌ སམ༌མད༌, ཏེན༌ན༌ ཙོགས༌ལ༌ མ༌ཤི༌ཀའེ༌ གྱུར༌ཅེས༌སི༌ ཕིའ༌ ངའེ༌ ཁྱོ༌ཞ༌གུན༌ ཁོང༌ངི༌ ཆག༌ག༌ སྟད༌ ཟ༌ནེ༌, སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ རྩང༌མ༌ ཡོང༌ཅེས༌སི༌ ཁ༌ཆད༌ ཅོས༌པིན༌། 3 ཨིན༌ནའང༌ ཤེ༌ཏན༌ རུལ༌ལ༌ ཟུས༌ཏེ༌ ཧ༌ཝ༌ བུ༌མོ༌བོའ༌ གོབ༌སྐོར༌ ཏང༌ང༌ ཙོགས༌ལ༌, ཁོའེ༌ ཅི༌ ཅོས༌ཏེའང༌ ཁྱོ༌ཞ༌གུན༌ནི༌ སེམས༌ ལག༌མོ༌ དང༌ སྙིང༌ངི༌ ཐིལ༌ནེ༌ མ༌ཤི༌ཀ༌ ཅིག༌པོའེ༌ ཨིན༌ཅེས༌སི༌ དོད༌པའེ༌ ལམ༌ནེ༌ ཐག༌རིང༌ང༌ ཁྱེར༌ར༌ནོག༌ སམས༌ཏེ༌ ངའ༌ ཇིགས༌ས༌རག༌། 4 སུ༌ཞིག༌ ཁྱོ༌ཞ༌གུན༌ ཡོད༌ས༌ ཡོངས༌ཏེ༌ ང༌ཞའེ༌ ལབ༌ཁན༌ནི༌ ཡེ༌ཤུའི༌ སྐོར༌ལ༌ མན༌པ༌ ཡང༌ ཡེ༌ཤུ༌ སོ༌སོ༌ཞིག༌གི༌ སྐོར༌ལ༌ ལབ༌ན༌, ཡ༌ ཁྱོ༌ཞ༌གུན༌ལ༌ ཐོབས༌ཏེ༌ ཡོད༌ཁན༌ནི༌ ཐུག༌ཉིད༌བོ༌ མན༌པ༌ ཡང༌ སེམས༌ཉིད༌ སོ༌སོ༌ཞིག༌ ཐོབ༌ན༌, ཡ༌ ང༌ཞའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌ ཁྱོ༌ཞའེ༌ ཏད༌པ༌ ཅོ༌ཁན༌བོ༌ མན༌པ༌ ཡང༌ གའ༌མོའེ༌ ནས༌ཚུལ༌ སོ༌སོ༌ཞིག༌ ཤད༌ན༌, ཁྱོ༌ཞ༌གུན༌ནི༌ ཐད༌པོ༌ ཉམ༌པོ༌ ཏེ༌གུན༌ ལེན༌དུག༌།
5 ཨིན༌ནའང༌ ཅི༌ས༌ཐོག༌ནེ༌ ང༌ ཏེ༌ མ༌ཤི༌ཀའེ༌ སྐུ༌ཚབས༌ ཀྲག༌པོ༌ རིག༌ ཨིན༌ ཟེར༌ཁན༌གུན༌ནི༌ སང༌ འུ༌ཐུགས༌ མེད༌། 6 སྤེ༌ར༌ ཏང༌ཅེས༌སི༌ ནང༌ང༌ ངའ༌ ཁོང༌གུན༌ ཙོགས༌ལ༌ ཁས༌པ༌ མེད༌གྲོ༌, ཨིན༌ནའང༌ ངའེ༌ ནང༌ང༌ ཡོན༌ཏན༌ མེད༌པ༌ མན༌། ང༌ཞའེ༌ ཅོ༌ཁན༌ དང༌ ལབ༌ཁན༌ ཚང༌མའེ༌ ནང༌ང༌ ཏེ༌བོ༌ སལ༌པོ༌ ཅོས༌ཏེ༌ ལྟན༌པིན༌།
7 ཅི༌ ངའེ༌ ང༌རང༌ པས༌མོ༌ དང༌ ཁྱོ༌ཞ༌གུན༌ལ༌ རྩི༌ཝ༌ ཅོས༌ཏེ༌ དཀོན༌མཆོག༌གི༌ གའ༌མོའེ༌ ནས༌ཚུལ༌བོ༌ རིན༌ མེད༌པ༌ ཤད༌ ཟ༌ནེ༌, སྡིག༌པ༌ ཅོས༌ཏེ༌ ཨིན༌ནོག༌ག༌?* 11:7 ཆོས༌ཤད༌ཅེས༌སི༌ ཕིའ༌ པ༌འུ༌ལུའ༌ གྱབ༌གལ༌ ཅོ༌ཁན༌ནི༌ ཟུས༌མའེ༌ སྐུ༌ཚབས༌གུན༌ལ༌ པེ༌ནེ༌ ཏང༌གོས༌སད༌པིན༌ 8 ངའེ༌ ཞན༌མ༌ ཆོས༌ཚོགས༌གུན༌ནི༌ ཀ༌ནེ༌ པེ༌ནེ༌ རོགས༌གུན༌ ལེན༌ཏེ༌ ཁྱོ༌ཞ༌གུན༌ལ༌ རིན༌ མེད༌པ༌ ཞབ༌སྟོག༌ ཞུ༌ ཟ༌ནེ༌, ཅི༌ ངའེ༌ ཁོང༌གུན༌ ཅོམས༌ཏོག༌ག༌? 9 ཡང༌ ང༌ ཁྱོ༌ཞ༌གུན༌ ཉམ༌པོ༌ ཡོད༌དི༌ ཏུས༌ ངའེ༌ སྒོས༌དོམ༌གུན༌ དྲན༌དྲ༌ མ༌ཆ༌ ཟ༌ནེ༌, ངའེ༌ སུ༌ཞིག༌གའང༌ རོགས༌ ཅོ༌ཅེས༌ལ༌ བར༌དོ༌ མ༌ལྟན༌པིན༌, ཅིའ༌ཟེར༌ན༌ མ༌ཀེ༌དོ༌ནི༌ཡཱའེ༌ནེ༌ ཡོང༌ཁན༌ནི༌ སྤུན༌གུན༌ནི༌ ངའ༌ སྒོས༌དོམ༌ ཡོད༌ཁན༌ ཚང༌མ༌ ཁྱོངས༌། ང༌ ཁྱོ༌ཞ༌གུན༌ནི༌ཀ༌ བར༌དོ༌ཞིག༌ མ༌ནེ༌ མ༌གྱུར༌པིན༌, ཡང༌ ང༌ གྱུར༌ཨིན༌ནའང༌ མེ༌རག༌། 10 ཀ༌ཟུག༌ མ༌ཤི༌ཀའེ༌ དེན༌བ༌ ངའེ༌ ནང༌ང༌ ཡོད༌ཁན༌བོ༌ ཏན༌ཏན༌ ཨིན༌, ཨ༌ཀ༌ཡཱའེ༌ † 11:10 ཀོ༌རིན༌ཐི༌ གྱལ༌ས༌ ནི༌ ཨ༌ཀ༌ཡཱའེ༌ ནང༌ང༌ ཡོད༌ཏེ༌ ཨིན༌ནོག༌། ཡུལ༌ལི༌ ནང༌ང༌ སུ༌ཞིག༌གིའང༌ ཏེ༌གུན༌ནི༌ སྐོར༌ལ༌ ཕོ༌སོ༌ ཅོ༌ཅེས༌ནེ༌ ང༌ གགས༌ཏེ༌ བོར༌ མི༌ཉན༌། 11 ངའེ༌ ཁྱོ༌ཞ༌གུན༌ནི༌ ཀ༌ནེ༌ ང༌རང༌ངི༌ སྒོས༌དོམ༌མི༌ ཕིའ༌ གུ༌ནོར༌རི༌ རོགས༌གུན༌ མ༌ལེན༌ པ༌སང༌, ཅི༌ ངའེ༌ ཁྱོ༌ཞ༌གུན༌ལ༌ ཅེས༌པ༌ མ༌ཅོའ༌ ཨིན༌ནོག༌ག༌? མ༌ནེ༌ མན༌། ངའེ༌ ཁྱོ༌ཞ༌གུན༌ལ༌ ཅེས༌པ༌ ཅོ༌ཁན༌བོ༌ དཀོན༌མཆོག༌གི༌ ཁྱེན༌ན༌ ཛད༌ད༌ནོག༌།
12 འོ༌ན༌ ངའེ༌ ཏ༌རུང༌ངའང༌ ཏེན༌ན༌བོ༌ ཅོ༌ཨིན༌ དུག༌ཨིན༌། ཏེ༌བོའེ༌ ཀྲག༌པོ༌ སྐུ༌ཚབས༌གུན༌ལ༌ ཁོང༌གུན༌ནི༌ ལས༌པོའང༌ ང༌ཞའེ༌ ལས༌ ཙོགས༌ ཨིན༌ ཟེར༌ཏེ༌ ཕོ༌སོ༌ ཅོ༌ཅེས༌སི༌ སྐབས༌ ཐོབ༌ཅེས༌ནེ༌ གགས༌ཏེ༌ བོར༌ཨིན༌། 13 ཁོང༌གུན༌ མ༌ཤི༌ཀའེ༌ ཟུས༌མ༌ སྐུ༌ཚབས༌གུན༌ ཨིན༌ནོག༌། ཁོང༌གུན༌ནི༌ སྐྱོན༌ཇན༌ནི༌ ལས༌གུན༌ ཅོ༌ཨིན༌, མ༌ཤི༌ཀའེ༌ སྐུ༌ཚབས༌ ཨིན༌ཟུན༌ ཏང༌ང༌ནོག༌། 14 ཨིན༌ནའང༌ ང༌ ཧ༌ལས༌ས༌ མེ༌རག༌, ཤེ༌ཏན༌ནིའང༌ ཁོ༌རང༌ དཀོན༌མཆོག༌གི༌ ཀལ༌ལ༌ ཛད༌ཁན༌ འོད༌དི༌ ཕོ༌ཉ༌ ཨིན༌ཟུན༌ ཏང༌ང༌ནོག༌། 15 ཏེ༌ནེ༌ ཤེ༌ཏན༌ནི༌ ཡོག༌པོ༌གུན༌ནིའང༌ ཁོ༌རང༌གུན༌ དྲང༌པོ༌ ཞབ༌སྟོག༌པ༌ ཨིན༌ཟུན༌ ཏང༌ཁན༌བོའེ༌ཀ༌ ང༌དང༌གུན༌ ཧ༌ལས༌གོ༌ཤེས༌ མ༌ནོག༌། སྟིང༌ཇུག༌ག༌ ཁོང༌གུན༌ལ༌ ཁོ༌རང༌གུན༌ནི༌ ལས༌ ངན༌པ༌ ཅོས༌ཁན༌གུན༌ལ༌ འོས༌པའེ༌ ཆད༌པ༌ ཕོག༌ག༌ནོག༌།
པ༌འུ༌ལུའི༌ མི༌ཚེའེ༌ ནང༌ང༌ བར༌དོ༌གུན༌།
11:16 ནེ༌ 33
16 ངའེ༌ ཡང༌སྐྱར༌ ཟེར༌རད༌, འི༌ཟུག༌ སྤེ༌ར༌ ཏང༌ཅེས༌པོའེ༌ ངའ༌ སམ༌བ༌ མེད༌ཁན༌ཞིག༌ ཨིན༌ནོག༌ མ༌སམ༌ཤིག༌། གལ༌ཏེས༌ ཁྱོ༌ཞ༌གུན༌ནི༌ ཏེ༌ཟུག༌ སམ༌ནའང༌, ངའེ༌ ང༌རང༌ངི༌ སྐོར༌ལ༌ ཙ༌པིག༌ མང༌ང༌ ཕོ༌སོ༌ ཅོ༌ ཟ༌ནེ༌, ངའང༌ ཉོན༌ཤིག༌ ཀ༌ཟུག༌གི༌ ཁྱོ༌ཞ༌གུན༌ནི༌ མི༌ སམ༌བ༌ མེད༌ཁན༌ཞིག༌ག༌ ཉན༌ནད༌། 17 ཞན༌ འི༌ཙོགས༌སི༌ ཕོ༌སོ༌གུན༌ གཙོ༌བོའེ༌ ཆོགས༌ནེ༌ ཡོང༌ང༌ མ༌ནོག༌, ཨིན༌ནའང༌ ངའེ༌ སམ༌བ༌ མེད༌ཁན༌ཞིག༌ ཙོགས༌ལ༌ སྤེ༌ར༌ ཏང༌ངད༌། 18 ཏེ༌གུན༌ནི༌ ཁོ༌རང༌གུན༌ནི༌ ཇིག༌རྟེན༌ནི༌ཀ༌ བྲས༌བུ༌ ཐོབ༌ཁན༌གུན༌ནི༌ སྐོར༌ལ༌ ཕོ༌སོ༌ ཅོས༌ པ༌སང༌ ངེའང༌ ཅོ༌ཨིན༌། 19 ཁྱོ༌ཞའ༌ ཀོ༌རིན༌ཐི༌ མ༌ཤི༌ཀ༌པ༌གུན༌ མ༌ ཤེས༌རབས༌ཅན༌ ཨིན༌ པ༌སང༌ ཁྱོ༌ཞ༌གུན༌ནི༌ ཐད༌པོ༌ ཉམ༌པོ༌ ཏེ༌ སམ༌བ༌ མེད༌ཁན༌ནི༌ ལོབ༌པོན༌གུན༌ནའང༌ ཆམས༌ཏེ༌ ཨིན༌ན༌? 20 ཁྱོ༌ཞ༌གུན༌ ཝང༌ངི༌ ཡོག༌ག༌ སྲུལ༌ཁན༌, ཡ༌ ཡོད༌ཁན༌ ཚང༌མ༌ ཀོགས༌ཏེ༌ ཁྱེར༌ཁན༌, ཡ༌ ཕན༌ཐོགས༌ ལེན༌ཁན༌, ཡ༌ ཀྲག༌པོ༌ ལྟན༌ཁན༌, ཡ༌ གྲམ༌ལྕག༌ ཏང༌ཁན༌ ཚང༌མའང༌ ཁྱོ༌ཞ༌གུན༌ནི༌ སྲན༌ཏེ༌ དུག༌དུག༌། 21 འི༌ཙོགས༌སི༌ ལས༌གུན༌ ཅོ༌ཅེས༌སི༌ ནང༌ང༌ ང༌ཞ༌གུན༌ མངས༌ཏེའང༌ འུ༌ཐུགས༌ ཨིན༌ཁན༌བོ༌ ཤད༌ཅེས༌ལ༌ ང༌རང༌ ཁྲེལ༌ལ༌ རག༌། ཨིན༌ནའང༌ གལ༌ཏེས༌ ཏེ༌གུན༌ནི༌ ཁོ༌རང༌གུན༌ནི༌ སྐོར༌ལ༌ ཕོ༌སོ༌ ཅོ༌ཅེས༌སི༌ ཧམ༌པ༌ ཅོ༌ན༌, ངའེ༌ ང༌རང༌ངི༌ སམ༌བ༌ མེད༌ཁན༌ ཙོགས༌ལ༌ སྤེ༌ར༌ ཏང༌ཁན༌བོའེ༌ཀའང༌, ཕོ༌སོ༌ ཅོ༌ཅེས༌སི༌ ཧམ༌པ༌ ཅོ༌ཨིན༌།
22 ཁོང༌གུན༌ ཨིབ༌རི༌པ༌ ཨིན༌ནོག༌ག༌? ངའང༌ ཨིན༌། ཁོང༌གུན༌ ཨིས༌ར༌ཨེལ༌པ༌ ཨིན༌ནོག༌ག༌? ངའང༌ ཨིན༌། ཁོང༌གུན༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌ག༌? ངའང༌ ཨིན༌། 23 ཁོང༌གུན༌ མ༌ཤི༌ཀའེ༌ ཞབ༌སྟོག༌ ཞུ༌ཁན༌ ཨིན༌ནོག༌ག༌? ༼ཏ༌ ངའེ༌ ཟེར༌ཁན༌ དང༌ ཟེར༌ཅེས༌ ཚང༌མ༌ མི༌སྙོན༌པའེ༌ ཟེར༌ཁན༌ ཙོགས༌ ཚོར༌ཅེན༌༽ ཨིན༌ནའང༌ ངའེ༌ མ༌ཤི༌ཀ༌ ཏེ༌གུན༌ནི༌ སང༌ མང༌ང༌ ཞབ༌སྟོག༌ ཞུས༌ཏེ༌ ཨིན༌: ངའེ༌ ཁོང༌གུན༌ནི༌ སང༌ ལས༌ མང༌ང༌ སྲན༌ཏྲེ༌ ཅོས༌པིན༌, ལན༌ མང༌པོ༌ ཙོན༌ཁང༌ངི༌ ནང༌ང༌ ཀགས༌, རྩི༌ མི༌ཉན༌ཅེས༌སི༌ རྟལ༌ལྕག༌ གྱབས༌, ལན༌ མང༌པོ༌ ཤི༌ཅེས༌སི༌ ཉེ༌མོའ༌ ལེབ༌། 24 ལན༌ ལྔ༌ ཏུས༌སྐབས༌ སོ༌སོའེ༌ ནང༌ང༌ ཡ༌ཧུ༌དཱ༌པའེ༌ སྤོན༌བོ༌གུན༌ནི༌ ཆོགས༌ནེ༌ ངའ༌ རྟལ༌ལྕག༌ 39 གྱབ༌ཅེས༌སི༌ ཆད༌པའང༌ ཕོག༌། ‡ 11:24 འི༌ རྡུང༌ཚུལ༌ ཇིགས༌ནང༌ཅན༌བོའེ༌ མི༌ མང༌པོ༌ཞིག༌ ཤི༌ཅུགས༌། 25 ལན༌ཕོག༌ སུམ༌ ངའ༌ བེར༌ཀ༌ རོམ༌པོ༌ ཉམ༌པོ༌ རྡུངས༌, ལན༌ཅིག༌ ངའ༌ རྡོའ༌ གྱབས༌ཏེ༌ སད༌ཅེས༌ ཅོས༌, ལན༌ སུམ༌ ངའ༌ ཡོད༌ཁན༌ནི༌ གྲུ༌ཟིང༌བོ༌ ཆགས༌ཏེ༌ ཆུའི༌ ནང༌ང༌ ནུབ༌, ཡང༌ ངའ༌ ཉི༌མ༌ དང༌ ཚན༌ཞིག༌ གྱ༌ཚོའེ༌ ཆུའི༌ ནང༌ང༌ ལུས༌། 26 མ༌ཤི༌ཀའེ༌ ཕིའ༌ ངའེ༌ འི༌ བར༌དོ༌གུན༌ ཁུར༌པིན༌, ལན༌ མང༌པོ༌ མ༌ ཐག༌རིང༌ངི༌ ཡུལ༌གུན༌ལ༌ བེས༌ལ༌ སོང༌པིན༌, ངའ༌ ལྩངས༌པོ༌ དང༌ ཅག༌པ༌ གུན༌ནི༌ ཇིགས༌པ༌ བྱུང༌, ངའ༌ ང༌རང༌ངི༌ མི༌ ཡ༌ཧུ༌དཱ༌པ༌ མ༌ཚད༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཀ༌ནེའང༌ ཇིགས༌པ༌ བྱུང༌། གྱལ༌ས༌, ཐང༌སྟོང༌, ཡང༌ ཚོ༌གུན༌ནི༌ ནང༌ངའང༌ ངའ༌ ཇིགས༌པ༌ མང༌པོ༌ བྱུང༌, ཡང༌ ཟུན༌མ༌ ཏད༌པ༌ཅན༌གུན༌ནི༌ ཀ༌ནེའང༌ ངའ༌ ཇིགས༌པ༌ བྱུང༌། 27 ངའེ༌ ཏུས༌ རིང༌མོ༌ ལས༌ སྲན༌ཏྲེ༌ ཅོས༌པིན༌, ཚན༌ མང༌པོ༌ཞིག༌ ཉིད༌མེད༌པ༌ ལུས༌, ལན༌ མང༌པོ༌ སྟོག༌རི༌ དང༌ སྐོམས༌རིའ༌ ལུས༌ཏེ༌ ཟ༌རྒྱུ༌ མེད༌པིན༌, ཡང༌ གོན༌རྒྱུ༌ མང༌པོ༌ མེད༌པ༌ དྲང༌མོའང༌ ཡོངས༌།
28 ཏེ༌གུན༌ནི༌ཀ༌ ནན༌མ༌ ཆོས༌ཚོགས༌ ཚང༌མའ༌ ཏད༌པའེ༌ ནང༌ང༌ ཀ༌ཟུག༌ཤིག༌ ཡོད༌གྲོ༌ སམས༌ཏེ༌, ངའ༌ ཞག༌ཏང༌ ཚེར༌ཁ༌ ཡོངས༌། 29 ཁྱོ༌ཞ༌གུན༌ནི༌ ཕྲོའ༌ ཏད༌པའེ༌ ནང༌ང༌ ཤེད༌མེད༌ ཨིན༌ཁན༌གུན༌, ངའ༌ ཧ༌གོའ༌རག༌། ཏད༌པ༌ཅན༌གུན༌ དྲང༌པོ༌ མན༌ཁན༌ནི༌ ལམ༌མི༌ཀ༌ ཁྲིད༌ཁན༌གུན༌ནི༌ཀ༌ ངའ༌ མ༌སྲན༌ཏྲེ༌ སྲོ༌ རག༌།
30 གལ༌ཏེས༌ ངའ༌ ཕོ༌སོ༌ ཅོ༌གོས༌ན༌, ཏེ༌ནེ༌ ངའེ༌ ཏན༌ཏན༌ལ༌ ང༌རང༌ འུ༌ཐུགས༌ ཨིན༌ཁན༌བོའེ༌ཀ༌ ཕོ༌སོ༌ ཅོ༌ཨིན༌། 31 ང༌དང༌གུན༌ནི༌ གཙོ༌བོ༌ ཡེ༌ཤུའི༌ ཡབ༌ དཀོན༌མཆོག༌, ཏུས༌གྱུན༌ སྟོད༌པའེ༌ འོས༌པ༌ ཐོབ༌ཅེས༌ ཨིན༌ཁན༌བོའེ༌ ངའེ༌ ཏེ༌གུན༌ ཟུན༌ མ༌ཏང༌ཁན༌བོ༌ ཁྱེན༌ན༌ ཛད༌ད༌ནོག༌། 32 ང༌ དཱ༌མེས༌ཁས༌སི༌ གྱལ༌སའེ༌ ནང༌ང༌ ཡོད༌ ཟ༌ནེ༌, གྱལ༌པོ༌ ཨ༌རི༌ཏས༌སི༌ ཀའ༌ལོན༌ ནི༌, གྱལ༌སའེ༌ སྒོ༌གུན༌ནི༌ཀ༌ ངའ༌ ཟུམ༌ཅེས༌སི༌ ཕིའ༌ སྲུངས༌ཁན༌གུན༌ བོར༌ཏེ༌ དུག༌པིན༌། 33 ཨིན༌ནའང༌ ཁོ༌ དང༌ ཁོའེ༌ སྲུང༌ཁན༌གུན༌ནི༌ ཀ༌ནེ༌ ཤོར༌ཅེས༌ལ༌, ངའ༌ ཙེ༌པོ༌ཞིག༌གི༌ ནང༌ང༌ གྱལ༌སའེ༌ རྩིག༌པའེ༌ ནང༌ང༌ ཡོད༌ཁན༌ནི༌ ཀར༌ཁུང༌ གྱུད༌ཏེ༌, ཐུར༌ལ༌ ཕབས༌།