1 སྤུན༌གུན༌ ཏུས༌ མང༌པོའེ༌ སྔུན༌ལ༌ ང༌ཞའེ༌ ཕ༌མེས༌པོ༌གུན༌ རི༌སྟོང༌ངི༌ ནང༌ང༌ ཁོར༌ཨིན༌ དུག༌ཁན༌ནི༌ སྐོར༌གུན༌ ཁྱོ༌ཞའེ༌ ཞེད༌ མི༌ཞེད༌ཅེས༌པོ༌ ངའེ༌ དོད༌པ༌ ཨིན༌། ཁོང༌ ཚང༌མའ༌ སྲིན༌ནི༌ ལམ༌ལྟན༌ཏེ༌ ཚོའེ༌ སྐྱིལ༌ནེ༌ ས༌སྐམ༌མི༌ཀ༌ གྲུལ༌ཏེ༌ ཨིན༌པིན༌། 2 སྲིན༌ནི༌ ཡོག༌ག༌ ཡང༌ གྱ༌ཚོའེ༌ ནང༌ནེ༌ གྲུལ༌ཁན༌, ཁོང༌གུན༌ལ༌ མོ༌ཟེས༌སི༌ གྱབ༌ནེ༌ གྲུལ༌ཅེས༌ལ༌ ཁྲུས༌ སལ༌ལ༌ ཛད༌ཏེ༌ ཨིན༌པིན༌། 3 ཁོང༌ ཚང༌མའེ༌ དཀོན༌མཆོག༌གི༌ ཛད༌པ༌ གྱུད༌ཏེ༌ སལ༌ལ༌ ཛད༌ཁན༌ནི༌ ཏ༌གི༌ མན༌ན༌ ཟེར༌ཁན༌བོ༌ ཟོས༌། 4 ཁོང༌ ཚང༌མའེ༌ བྲག༌གི༌ ཀ༌ནེ༌ བིང༌ ཅུག༌ག༌ ཛད༌ཁན༌ ཐུག༌ཉིད༌དི༌ ཆུ༌བོ༌ ཐུངས༌། ཁོང༌ ཚང༌མའེ༌ ཁོང༌གུན༌ ཉམ༌པོ༌ སྐྱོད༌ཁན༌ནི༌ ཐུག༌ཉིད༌དི༌ བྲག༌བོའེ༌ ཀ༌ནེ༌ ཐུངས༌ ཀ༌བོ༌ ནི༌ མ༌ཤི༌ཀ༌ ཨིན༌པིན༌། 5 ཏེ༌ནེའང༌ ཁོང༌ མང༌ཆེའ༌ ཉམ༌པོ༌ དཀོན༌མཆོག༌ ཐུག༌ཉེས༌ས༌ མ༌ཛད༌, ཡང༌ ཁོང༌གུན༌ནི༌ ཟུགས༌པོ༌ རི༌སྟོང༌ངི༌ ནང༌ང༌ ཁྲེས༌སྟོར༌ སོང༌ཏེ༌ ཨིན༌པིན༌།

6 ང༌དང༌གུན༌ནི༌ ནང༌ང༌ ཁོང༌གུན༌ནི༌ ཅོས༌ཁན༌ ཙོགས༌སི༌ དོད༌པ༌ ངན༌པ༌གུན༌ མི༌ཡོང༌ཅེས༌སི༌ ཕིའ༌, ང༌དང༌གུན༌ལ༌ སྤང༌པུད༌ད༌ ཏེ༌གུན༌ བྱུང༌ ཅུག༌ག༌ ཛད༌ཏེ༌ ཨིན༌ནོག༌། 7 ཏེ༌བོའེ༌ཕིའ༌ ཁོང༌གུན༌ནི༌ ཅོས༌ཁན༌ ཙོགས༌ལ༌ སྐུན༌དྲ༌གུན༌ལ༌ ཆོས༌ མ༌ཅོ༌ཤིག༌, ཀ༌ཟུག༌གི༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌ "ཁོང༌གུན༌ནི༌ ཅོས༌ཁན༌ནི༌ སྐུན༌དྲ༌, སེར༌རི༌ བ༌ལང༌བོའ༌ རྩི༌ཝ༌ ཅོ༌ཅེས༌སི༌ ཕིའ༌, མི༌གུན༌ སའེ༌ཀ༌ དུགས༌ཏེ༌ ཟའ༌ཅེས༌ དང༌ ཆང༌ ཐུང༌ཅེས༌ གོ༌ཟུགས༌, ཡང༌ ཁོང༌གུན༌ ལངས༌ཏེ༌ སྕོད༌པ༌ ངན༌པའེ༌ རྩེས༌གུན༌ ཏང༌ཨིན༌ སྐྱིད༌པོ༌ ཅོས༌།"* 10:7 ཨི༌ཇིབ༌ནེ༌ བིངས༌ཏེ༌ ཆའ༌ཁན༌ནི༌ སྤེ༌ཆའེ༌ 32:6 8 ང༌དང༌གུན༌ ལུས༌བྲེལ༌ ངན༌པའེ༌ ནང༌ང༌ དྲེས༌ མ༌གོས༌, ཀ༌ཟུག༌ ཁོང༌ ཁ༌ཅིག༌གི༌ ཅོས༌, ཀ༌བོའེ༌ ཁོ༌རང༌གུན༌ནི༌ ཕྲོ༌པ༌ 23,000 ཏེན༌ན༌ ཞག༌ག༌ ཤི༌ཅུགས༌།

9 ང༌དང༌གུན༌ནི༌ མ༌ཤི༌ཀའ༌ ཚོད༌ལྟ༌ མ༌གོས༌, ཀ༌ཟུག༌གི༌ ཁོང༌ ཁ༌ཅིག༌གི༌ ཅོས༌ ཡང༌ བྲས༌བུ༌བོ༌ ཏུག༌རུལ༌གུན༌ནི༌ ཐམས༌ཏེ༌ ཁོང༌གུན༌ ཤི༌ཏེ༌ ཨིན༌པིན༌། 10 ཡང༌ ཁོང༌ ཁ༌ཅིག༌གི༌ ཅོས༌ཁན༌ ཙོགས༌ལ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ འུ༌སྐྱོང༌གུན༌ནི༌ གྱབ༌གལ༌ལ༌ བ༌ག༌བོ༌གེ༌ ཤད༌ མ༌གོས༌, ཅིའ༌ཟེར༌ན༌ སྲོག༌ ལེན༌ཁན༌ནི༌ ཕོ༌ཉའེ༌ ཁོང༌གུན༌ མེད༌ཁན༌ ཅོས༌ཏེ༌ ཨིན༌པིན༌། 11 ང༌དང༌གུན༌ནི༌ ཕིའ༌ སྤེ༌ཞིག༌གི༌ ཚུལ༌ལ༌ ཏེ༌ ཚང༌མ༌ ཁོང༌གུན༌ལ༌ བྱུངས༌ཏེ༌ ཨིན༌པིན༌། ཐའ༌མའེ༌ ཏུས༌སི༌ ནང༌ང༌ དུག༌ཁན༌ནི༌ ང༌དང༌གུན༌ལ༌ སྤང༌པུད༌ཅེས༌སི༌ ཕིའ༌, ཏེ༌གུན༌ བྲིས༌ཏེ༌ ཨིན༌ནོག༌།

12 གལ༌ཏེས༌ ཁྱོ༌ཞ༌ ཏད༌པའེ༌ ནང༌ང༌ སྟན༌པོ༌ ཡོད༌ སམ༌མད༌ན༌, གྱེལ༌ མི༌གྱེལ༌ཅེས༌སི༌ ཕིའ༌ ཤང༌ ཅོ༌ཤིག༌། 13 ཨིད༌ཏུ༌ ཅོ༌ཤིག༌ ཁྱོ༌ཞ༌གུན༌ནི༌ སྡིག༌པ༌ ཅོ༌ཅེས༌སི༌ དོད༌པ༌བོ༌ ཞན༌ མི༌གུན༌ལ༌ ཡོད༌ཁན༌བོའེ༌ སང༌ སོ༌སོ༌ཞིག༌ མ༌ནོག༌། ཡང༌ དཀོན༌མཆོག༌ ནི༌ ཨིད༌ཤེས༌ཅན༌ ཞུགས༌ཏེ༌ ཨིན༌ནོག༌, ཁོང༌ངི༌ ཁྱོ༌ཞ༌གུན༌ལ༌ ཚོད༌ལྟའེ༌ ཁུ༌རུ༌བོ༌ ཁྱོ༌ཞ༌གུན༌ནི༌ ཁྱུད༌དི༌ སང༌ མང༌ང༌ཞིག༌ ཁུར༌ ཅུག༌ག༌ མི༌ཛད༌། ཁྱོ༌ཞ༌གུན༌ ཚོད༌ལྟའེ༌ ནང༌ང༌ ཆ༌ ཟ༌ནེ༌, ཁོང༌ངི༌ ཟོད༌པ༌ ཉམ༌པོ༌ ཏེ༌བོ༌ ཁུར༌ཉན༌ཅེས༌སི༌ ལམ༌ ཁྱོ༌ཞའ༌ ལྟན༌ན༌ ཛད༌ཨིན༌།

14 ཏེ༌བོའེ༌ཕིའ༌ ངའེ༌ སྤུན༌གུན༌, སྐུན༌དྲ༌གུན༌ལ༌ ཅོལ༌ཅེས༌ནེ༌ ཤོར༌ཏེ༌ སོང༌ཤིག༌། 15 ཁྱོ༌ཞ༌གུན༌ སམ༌བ༌ཅན༌ནི༌ མི༌གུན༌ ཨིན༌ནོག༌། ངའེ༌ ཟེར༌ཁན༌གུན༌ དྲང༌པོ༌ ཨིན༌ནོག༌ག༌ ཡ༌ མ༌ནོག༌ ཁྱོ༌ཞ༌རང༌ངི༌ ཐག༌ཅོད༌ཤིག༌།

16 ཏང༌པོ༌, དམ༌པའེ༌ སོལ༌རས༌སི༌ ཏུས༌ལ༌ དོན༌སྐྱོག༌གི༌ ནང༌ང༌ ཡོད༌ཁན༌ནི༌ རྒུན༌ཆང༌བོའ༌ ཅིན༌ལབས༌སི༌ ཕིའ༌ ཞུས༌ཏེ༌ ཐུང༌ང༌ཅིག༌, མ༌ཤི༌ཀའེ༌ སྐུ༌ཁྲག༌གི༌ ནང༌ང༌ དྲེས༌ཏེ༌ མ༌ནོག༌ག༌? ཡང༌ ཏ༌གི༌བོ༌ ཅག༌ག༌ཅིག༌, ང༌དང༌གུན༌ མ༌ཤི༌ཀའེ༌ སྐུ༌ཟུགས༌སི༌ ནང༌ང༌ དྲེས༌ཏེ༌ མ༌ནོག༌ག༌? 17 ང༌དང༌གུན༌ མང༌པོ༌ཞིག༌ ཡོད༌ནའང༌, ང༌དང༌ ཚང༌མའེ༌ ཏ༌གི༌ ཅིག༌གི༌ ཀ༌ནེ༌ ཟའ༌ནོག༌, ཀ༌བོའེ༌ ང༌དང༌གུན༌ ཟུགས༌པོ༌ ཅིག༌ ཨིན༌ཁན༌བོ༌ ལྟན༌ན༌ནོག༌།

18 ཉིས༌པ༌, ཨིས༌ར༌ཨེལ༌པ༌གུན༌ནི༌ སྐོར༌ལ༌ སམ༌བ༌ ཏོང༌ཤིག༌། ཁོང༌གུན༌ ཆོད༌ཁྲི༌ཀ༌ སྲོག༌ཆོད༌ལ༌ ཕུལ༌ཏེ༌ ཡོད༌ཁན༌གུན༌ ཟོས༌ཏེ༌ ཅི༌ ཁོང༌གུན༌ ཅིག༌གྲིལ༌ མི༌རུག༌ག༌? 19 ཅི༌ ངའེ༌ སྐུན༌དྲ༌གུན༌ལ༌ སྲོག༌ཆོད༌ལ༌ ཕུལ༌ཁན༌ནི༌ ཟན༌གུན༌ནི༌ ནང༌ང༌ རིན༌ ཡོད༌, ཡ༌ ཏེ༌ སྐུན༌དྲ༌གུན༌ ངོས༌པོའེ༌ དཀོན༌མཆོག༌ ཨིན༌ནོག༌ ཟེར༌ཏེ༌ ཨིན༌ནོག༌ག༌? 20 མན༌ མ༌ནེ༌ མན༌།

ངའེ༌ ཟེར༌རད༌ འི༌ སྲོག༌ཆོད༌གུན༌ རྡུད༌གུན༌ལ༌ ཏངས༌ཏེ༌ ཨིན༌ནོག༌, དཀོན༌མཆོག༌ག༌ མ༌ནོག༌། ཡང༌ ངའེ༌ ཁྱོ༌ཞ༌གུན༌ རྡུད༌གུན༌ནི༌ ཕྲོའ༌ དྲེས༌ མི༌དྲེས༌ཤེས༌སི༌ དོད༌པ༌ བོར༌རད༌། 21 ཁྱོ༌ཞའེ༌ གཙོ༌བོ༌ ཡེ༌ཤུའི༌ དོན༌སྐྱོག༌ དང༌ རྡུད༌གུན༌ནི༌ ཀོ༌རེ༌ ཉིས༌ཀོའེ༌ ནང༌ནེ༌ ཀ༌ཟུག༌གི༌ ཐུང༌ཨིན༌? ཁྱོ༌ཞ༌གུན༌ནི༌ གཙོ༌བོ༌ ཡེ༌ཤུའི༌ དོན༌ཏང༌ དང༌ རྡུད༌གུན༌ནི༌ ཁར༌ཇི༌ ཉིས༌ཀོ༌ ཀ༌ཟུག༌གི༌ ཟེན༌? 22 ཅི༌ ཏེ༌ཟུག༌ ཅོ༌ཅེས༌པོ༌ནེ༌ ཁྱོ༌ཞ༌གུན༌ནི༌ གཙོ༌བོའ༌ ཐུགས༌སྲོ༌ ཞངས༌ཤུགས༌ཏེ༌ མ༌ནོག༌ག༌? ཅི༌ ང༌དང༌གུན༌ ཁོང༌ངི༌ སང༌ ཤེད༌ ཆེའ༌ ཨིན༌ནོག༌ག༌?

23 ཁྱོ༌ཞའེ༌ ཕྲོ༌ནེ༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, "ངའེ༌ ཅི༌ཞིག༌ ཅོ༌ནའང༌ གྲིག༌ག༌ནོག༌", ཨིན༌ནའང༌ ཅི༌ཚང༌མ༌ ཁྱོ༌ཞའེ༌ ཕིའ༌ ཟང༌པོ༌ཞིག༌ མ༌ནོག༌། ཡང༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, "ངའེ༌ ཅི༌ཞིག༌ ཅོ༌ནའང༌ གྲིག༌ག༌ནོག༌", ཨིན༌ནའང༌ ཅི༌ཚང༌མ༌ ཕན༌ཐོགས༌ཅན༌ཞིག༌ མ༌ནོག༌། 24 ཁྱོ༌ཞ༌རང༌ ཅིག༌པོའེ༌ ཕན༌ཐོགས༌སི༌ ཕིའ༌ མ༌སམ༌མ༌ ཞན༌ཡང༌ སྤུན༌གུན༌ནི༌ ཕན༌ཐོགས༌སི༌ ཕིའ༌ སམ༌བ༌ ཏོང༌ཤིག༌།

25 ཁྱོ༌ཞ༌གུན༌ནི༌ ཁྲོམས༌སི༌ ནང༌ང༌ ཤ༌ ཀ༌ཟུག༌ཤིག༌ ཐོབ༌བད༌ནའང༌ ཟོ༌ཤིག༌, ཏེ༌གུན༌ སྐུན༌དྲ༌གུན༌ལ༌ ཆོད༌པ༌ ཕུལ༌ཏེ༌ ཨིན༌ན༌ མན༌ སམས༌ཏེ༌ སྙིང༌ངི༌ ནང༌ང༌ ཐེ༌ཚོམས༌ ཅོས༌ཏེ༌ ཏྲི༌ཝ༌ མ༌ཏྲི༌ཤིག༌། 26 ཅིའ༌ཟེར༌ན༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, "ཇིག༌རྟེན༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ གཙོ༌བོའེ༌ ཨིན༌།"† 10:26 སུང༌གུར༌རི༌ སྤེ༌ཆའེ༌ 24:1

27 ཏད༌པ༌ མེད༌ཁན༌ནི༌ མི༌ཞིག༌གི༌ ཁྱོ༌ཞ༌གུན༌ལ༌ གོང༌ཟན༌ལ༌ ཡོང༌ ཟེར༌ན༌, གལ༌ཏེས༌ ཁྱོ༌ཞ༌གུན༌ ཆ༌ཉིན༌ ཡོད༌ན༌, གྲོན༌ཤོག༌པོ༌ ལེན༌ཤིག༌། ཁྱོ༌ཞ༌གུན༌ལ༌ ཅི༌ཞིག༌ ཏང༌ནའང༌ ཟོ༌ཤིག༌། ཏེ༌གུན༌ སྐུན༌དྲ༌ ཆོད༌པ༌ ཕུལ༌ཏེ༌ ཨིན༌ན༌ མན༌ ཟེར༌ཏེ༌ ཏྲི༌ཝ༌ མ༌ཏྲི༌ཤིག༌། 28 ཨིན༌ནའང༌ གལ༌ཏེས༌ སུ༌ཞིག༌གི༌, "འི༌ ཤ༌བོ༌ སྐུན༌དྲ༌ ཕུལ༌ཏེ༌ ཨིན༌" ཟེར༌ཏེ༌ ཤད༌ན༌, ཏེ༌ནེ༌ ཤད༌ཁན༌ དང༌ ཁོའེ༌ སེམས༌སི༌ ནང༌ང༌ ཐེ༌ཚོམས༌ མི༌སྐྱེ༌ཅེས༌སི༌ ཕིའ༌ ཏེ༌བོ༌ མ༌ཟ༌ཤིག༌། 29 ངའེ༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ སམ༌ཁན༌ མན༌པ༌, ཏེ༌ ཤད༌ཁན༌ནི༌ སེམས༌སི༌ ནང༌ང༌ སམ༌ཁན༌བོའེ༌ ཕིའ༌ ཟེར༌ཏེ༌ ཨིན༌། ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, "ཞན༌མ༌ཞིག༌གི༌ སམ༌ཅེས༌པོའེ༌ ཞས༌ཏེ༌ ཅི༌ཕིའ༌ ངའེ༌ ང༌རང༌ངི༌ རང༌ཝང༌ངི༌ ནང༌ང༌ གག༌སྐྱིལ༌ ཡོང༌ཅུག༌ཨིན༌། 30 ཡང༌ གལ༌ཏེས༌ ངའེ༌ དཀོན༌མཆོག༌ག༌ ཟའ༌ཅེས༌སི༌ ཕིའ༌ ཐུག༌རྗེ༌ཆེ༌ ཞུ༌ན༌, ཏེ༌ནེ༌ ཅིའ༌ ངའེ༌ ཐུག༌རྗེ༌ཆེ༌ ཕུལ༌ཁན༌ནི༌ ཟན༌བོའི༌ཀ༌ སུ༌ཞིག༌གི༌ ང༌ སྐྱོན༌རྗོད༌ ཅོ༌ཨིན༌?"

31 ཏེ༌ནེ༌ ཏེ༌བོའེ༌ ལན༌ལ༌, ཁྱོ༌ཞ༌གུན༌ ཟའ༌ནའང༌, ཡ༌ ཐུང༌ནའང༌, ཡ༌ ཅི༌ཞིག༌ ཅོ༌ནའང༌, ཏེ༌ ཚང༌མ༌ གཙོ༌བོའེ༌ ཟིར༌རྗིད༌དི༌ ཕིའ༌ ཅོ༌ཤིག༌། 32 ཁྱོ༌ཞ༌གུན༌ནི༌ ཅི༌རིག༌ ཅོའད༌ནའང༌, ཏེ༌བོའེ༌ ཡ༌ཧུ༌དཱ༌པ༌ ཡ༌ ཡ༌ཧུ༌དཱ༌པ༌ མན༌ཁན༌གུན༌ ཏད༌པའེ༌ ནང༌ང༌ ཡོང༌ཅེས༌སི༌ ནང༌ང༌ གག༌སྐྱིལ༌ མ༌གྱུར༌ཤིག༌, ཡ༌ དཀོན༌མཆོག༌གི༌ ཆོས༌ཚོགས༌སི༌ ནང༌ང༌ ཡོད༌ཁན༌གུན༌ལ༌ སྡིག༌པ༌ ཅོ༌ མ༌ཅུག༌ཤིག༌། 33 ངེའང༌ ང༌རང༌ངི༌ ཅི༌ཞིག༌ ཅོ༌ནའང༌, ཚང༌མ༌ལ༌ ཐད༌ཅུག༌ཅེས༌སི༌ རྩོན༌གྲུས༌ ཅོའད༌། ངའེ༌ ང༌རང༌ངི༌ ཕན༌ཐོགས༌སི༌ ཕིའ༌ མན༌པ༌, ཞན༌མ༌ མང༌པོའེ༌ ཕན༌ཐོགས༌སི༌ ཕིའ༌ ཅོའད༌། ཁོང༌གུན༌ ཏད༌པའེ༌ ནང༌ང༌ ཡོང༌ཅེས༌སི༌ རེ༌ཝ༌ བོར༌ཏེ༌ ངའེ༌ ཏེ༌གུན༌ ཅོའད༌།