1 Kamongome namba dopa langiya. 2 Makwa isa ingyuo karo kuku pyaa nare akali doko Isaraele wambunya iso karenge akali dupwa lao nembele lao pii lamaipi. Poropeta piimi lao, Namba Kamongo Mupwa Andake Wakasa dokome letamo lao lamaipi. Isaraele iso karenge akali dupwa nakama range dokona iki suu pyapala sipisipi dupwa yaki nyuo kaelyaminyi dokona nakama keta randa epara. 3 Nakama menana anju ipwange elyape doko nao komau kupinyi yambale ingyuo sipisipi imanjimi wapusi dupwa iki wapuo mena sipisipi angi pena pena pisi dupwa pyao kuiyuo naminyipape pyuo karaminyi. Dopa pyuo karapinyipape embame iso karalene wambu kandale dupwa yaki nyilyaminyi. 4 Embame porai napyamo karaminyi dupwa suu pyaa nao anga pyapyamo karaminyi dupwa pyuo nyii nao rete pipyamo dupwa yaki pyakami nao neta puminyi dupwa sukusa nyii nao pyuo karene. Dopa piri doko suu pyao wambu dupwa randa maiyuo karene. 5 Dopa pyuo sipisipi isingi akali yangilyamo dokona lao bolombalo lao waa keta pelyaminyi. 6 Dopa pyuo nambana sipisipi dupwa yuu kyau kukipi andakepe dupwana ralo pelyaminyi. Dopa pyuo bolombalo lao isa yuu peparaena puminyipa mendeme kando nyelana suu pyao kota nalyaminyi.

7 Dokona nakama sipisipi rapu pingi dupwa. Epapu dakepa namba Kamongo dokome aki pii mende langilini lao selapa. 8 Anatu doko namba kareyonoko karenge dokome langilyu. Dake doko mende lalyane lao soo nyelapa. Nambana mena sipisipi dupwa isingi dupwame iso kara namisa dokona lao suwa menape rae lenge dupwame pyapala nelyaminyi. Nambana sipisipi rapu pingi dupwame mena sipisipi dupwa anja karaminyi lao koto kandala paa napala nakama range yongo rapu pyuo karapala mena sipisipi dupwa suu pyaa nalyaminyi. 9 Dopa pyuo pelyamo dokona lao sipisipi rapu pingi dupwa nakama nambame apa langilini lao selapape. 10 Namba Kamongo Mupwa Andake Wakasa karenge kandale doko epapu nakamana yanda pimwai ingyuo pelyo lao panelyo. Nambana wambu dupwa epapu range nyepala nakamame yuu mendepe rapu pyakao karalapape lao jii naro. Nakamana yanenge dokonako suu pyao alisi minyuo karaminyi. Doko dee pii nalapape lao kararoko. Nambame nambana sipisipi dupwa nakamame dee pyao naa nalamisi lao kiiramo nyero leto, leya.

11 Namba Kamongo Mupwa Andake Wakasa karenge dokome sipisipi dupwa namba rangeme koto nyepala mondo lao rapu pyuo kararona lao nakama langilyu. 12 Mena sipisipi rapu pingi akali dokome bolombalo lao pelyaminyi dupwa nyuo elyambu pingi. Doko suu pyao randa epeyamo yuu muu wakale wakale dupwana bolombalo lao peyaminyi dupwana piso range nyuo eparo. 13 Yuu wakale dupwana kararami dupwa nyuo malu palyuo karo nambame nakambana yuu range dokona lanyuo eparo. Lanyuo epo dokopa nakamana yuu kyau dupwana range karo dee ipwa pona kuki dupwana pyambuo pirunupa nenge malu keyange dupwa nao kararami. 14 Nambame yuu kyau keyange nenge malu elyape singi dupwanape dee yuu anda lama lama rambi keyange singi dupwanape nakamba koo keta pali napala nao karena lao lama pyaro. 15 Namba range sipisipi rapu pingi akali ingyuo karapala nakama pau lao pisirami panda doko koto nyakamiru lao Kamongo Mupwa Andake Wakasa karenge dokome lapunu pilyamo. 16 Nambame isa pelyaminyi dupwa koto karo neta puu pao otasi dupwa nyuo lanyuo epo rete pira dupwa yaki pyakamyuo anga pyara dupwa lete nyuo pyuo kararo. Dopa pirunupape wambu rondo lasipi porai ingyuo karaminyipape dupwa pyao kokwa sinyi nembaro. Renge doko namba sipisipi rapu pingi ingyuo karo dokome rolae doko anjuku lao mee dopa piru ingilyamo.

17 Nambana wambu dupwa namba Kamongo Mupwa Andake Wakasa karenge dokome koo keyangepe yapalya yapana pyuo mena sipisipi memepe yapo liti pinya karo lao nakama dakepa langilyu. 18 Nakama dupwana lapome nenge nao karapala kando kaeyo nao malasi dupwa moko karo rambetaku pyanyi nembenge. Nakama ipwa keyange napala malasi dorena uki palyinyi nembenge. 19 Nambana sipisipi lapo dupwame nenge nakamame kalyuo parakwami dupwa nao ipwa uki palyisi dupwa nao kararami.

20 Epapu dakepa namba Kamongo Mupwa Andake Wakasa karenge dokome lao mena sipisipi porai ingyuo karaminyi dupwape porai ingya nao karaminyi dupwape pipala yapalya yapana pyuo laro lao langilyu. 21 Nakama mena sipisipi porai ingyuo karaminyi dupwame porai ingya nange dupwa yuu dokona kara nana lao pyao suu lao ralinyi nembelyaminyi. 22 Dopa pilyaminyi dokona nambana sipisipi dupwa kiiramo nyeronopa wakale dupwame nakama randa mende mai narami ingilyamo. Nambana sipisipi dupwa mendaki mendaki lao rolao lao dokopa koo keyangepe liti piru. 23 Nambame kiŋi mende nambana kendemande akali Dapiti yalende mairu. Mairunu dokome sipisipi peparaena rapu pingi mendaki doko ingyuo karapala baame mondo lao rapu pira. 24 Namba Kamongo doko nakamana Anatu ingyuo kararo dokopa kiŋi mende nambana kendemande akali Dapiti yale dokome nakama iso karara. Dopa lao lapunu pilyamo. 25 Mona seramopa koo keta pali nao kararami lao namba nakama pipya lao kana minayro. Mena suwape wambu nalana pingi dupwa yuu dokona pali nana lao pyao ralinyi nembaro dokopa nambana sipisipi dupwa yuu dokonape imwa dupwanape mondo lao palyuo kararami.

26 Dokopa nambame nakama kalya pinyi nembo yuu kyau poo pyasi dokona palyuo karena laro. Palyuo karo apunda ipyali lao maseraminyi dokopa nambame dupwa elyape keta pisinyi pyambuo apunda kulimbwanyi peyo mairu. 27 Mairunu dokopa nenge isa dupwa jingi lyuo yuu dokona nenge ando pira. Dopa piramopa nakama mendaki mendaki lao yuu renge dokona mondo lao palyuo kararami. Kararaminyi dokopa nambame nambana wambu kendemande pingi puu sane doko rokwaronopa namba Kamongo doko lyamo lao soo nyerami. 28 Wambu Anatu suu pyaa nange dupwame dee epo pyao bange dupwa lalyuo nyuo pii narami. Dee mena suwape wambu nalana pingi dupwame nakama pyao nao pii naramiko. Nakama mondo lao palyuo kararaminyipa mendeme nakama paka renge maiyuo pii narami ingilyamo. 29 Nambame yuu amenge pingi dupwa maiyuo nenge soo kakana pyuo pinya laro. Yuu muu wakale dupwame nakama kandanyi palyuo giyalya giyana pyuo lengenyili pyuo laa nana lao piru. 30 Wambu peparaena nambame Isaraele wambu dupwa kyawa minyilini doko nakama nambana wambu lao serami lao namba Kamongo Mupwa Andake Wakasa dokome lapusa pilyamo.

31 Nakama nambana sipisipi nenge jilyu dupwa nambana wambuŋu. Dee namba nakamana Anatu ingyuo dupwa nambana wambuŋu karoŋo lao namba Kamongo Mupwa Andake Wakasa dokome lapusa pilyamo.