SEKARAYA
Buku Sekaraya dakena pii lama ingyuo pyasi palamo.
1. Rombo 1-8 Ee kana 520 W.K. piso pao ee kana 518 W.K. dokona akali Sekaraya dokome nolako pii leyamo dusipa pyasi palamo. Pii dasipa Anatu lao suu piyamo doko akali Sekaraya keta pii repa repa piyamo baa soo nyiya. Pii dokona yuu taone Jerusaleme doko mondo laraminyi wamba singinyili pyuo sera dokope tembole anda doko kamba pirami dokope dee Anatu baame banya wambu dupwa koo yapanyi nembo mona enenge palyuo nyeramo dokope dee Yesunya yuu gii eparamo dokope dusipana lao palamo.
2. Rombo 9-14 Yesu baame mee wambu peparae dupwa lete wai pyao iso kararamo waili pii dusipa dee yuu wambarae dake kaeyo yuu enenge Anatu baame au pinya pyambwaramo waili pii dusipa pipala pyasi palamo.
9
Rengya Kiŋi Epo Kararamo Doko
9 Yuu Sayone wambu nakama rae rae maiyuo karalapape.
Jerusaleme wambu dupwa rae maiyuo pii porakai lalapape.
Nakamana kiŋi doko epapu nakama keta epelyamo kandalapa.
Banya yanda pimwai anamasi minyuo isa palyuo epelyamo.
Dopa pyuo ipyamopape baa pau lao epo donge dokona piso epelyamo.
Donge ikyane kumwambona dokona piso epelyamo.
10 Kamongome dopa letamo.
Nambame yanda pingi mena oseme ipyuo penge uliuli Isaraele
dokona singi dupwa nyuo nembo
Jerusaleme rae yanda pela piso penge mena ose dupwa nyuo nembo piru.
Yanda walakape minyuo yanda pilyaminyi dupwa nyuo uki aki minyinyi nembaroko.
Nakamana kiŋi dokome yuu muu dupwana wambu mona kyuu lao seramo palena lao pira.
Kiŋi baame ipwa kota Metiteraniane piso iso pao Kumungi Ipwa dokona para.
Ipwa Yuporisa dokona piso iso pao yuu yakepe pinjingi dolapona suu lara.
Anatunya Wambu Enenge Ingyuo Kararami Doko
11 Kamongome dopa letamo.
Nakamame mena pyao kiso jiyaminyi dokona ranjama isa peyamo dokome
nambana kana minyuo lalu lao leyono pii doko kapa wai wara pisi sipyamosa
nambame nakamana wambu dupwa karapusi ingyuo
ipwa naa nao yuwale kameyana koko palaminyi dokona kiiramo nembaro.
12 Nakama karapusi palyuo kareyaminyi dupwa epapu keyange mende epara lao silyaminyi dokona kapu kyuo anda ipupwape.
Nakama yuu kapa manda rao kararaminyi dokona kapu kyuo ipupwape.
Kama yasuko naminyi dokona lao
nambame nakama elyape keta pyambuo yano pyao dee konda pyuo nyiso piru lao langilyu.
13 Nambame Juta wambu dupwa aminya yanda dopale ingyuo nyuo minyuo
Isaraele dupwa walekyana mende ingyuo minyuo piru.
Sayone akali dupwa yanda pingi wua ingyuo nyuo minyuo Girisi akali dupwa pyaro.
14 Dokopa Kamongo baa banya wambu kararami dokona ketae epo maro lara.
Lapala banya walekya dupwa yuu pele pingi dopale ingyapala waiya lao pyara.
Dopa pyuo dokopa Kamongo Mupwa Andake Wakasa dokome bikuli pii lao
baa sipurapala kopa apupi rakapana dokona donorena piso pao yanda pyala panya yanda kata epara.
15 Kamongo Porai Wakasa dokome banya wambu dupwa kyawa minyaramopa
nakambame yanda pimwai dupwa pyao anda bui nao kokwa serami.
Nakamame ipwa biya napala lete lao aa mambope pyao
yanda papala yanda pimwai dupwana ranjama kulimbwanyi nembo pyarami.
Pyaraminyipa nakama mena pyao kiso mailyaminyi dokopa ranjama lyuo epo pelyamopa pere retapala kamuo nyuo kulimbuo
kana pyare lasinya pisingi dopale ingyuo epo para.
16 Yuu gii doko pyaka seramo dokopa mena sipisipi rapu pingi dokome randa epelyamopa banya sipisipi dupwa nenge rekya lao kyawa lete nyinginyili pyuo
Kamongome banya wambu dupwa kyawa lete nyera.
Dopa pyuo nyeramo dokopa nakama banya yuu dokona
bange lepo lepo pingi dopale ingyuo kararami.
17 Yuu doko ama keyange wakasa ingyuo au pyuo sera.
Dokopa wanyane wambu dupwa witi jingipi waene ipwangepe dupwa napala ando poraiyuo kararami,
lao Kamongo dokome Sekaraya keta leya.