1 Nambana Kurisene yango dupwa. Nakama porai ingyuo Kamongona arapu dokona dapale ingyuo karalapape lao langilyu. Namba nakama mona reto kondalyo. Namba keta yulu keyange pyuo pisaminyi dokona rae wakasa maiyuo nakama lakandelyo.

2 Enda Yotiapa Sindikipa nakamba Kamongona arapu dokona Kurisene kakingi ingyuo karalapape lao poraiyuo langilyu. 3 Dokona ingyuo nambana yulu role pyao pingi akali embame enda lama dolapo nyisakare. Enda dolapo porayapala namba role pyao yulu andake waili pii dokona raeyo lao kareyama. Kelemene dee nambana yulu mendare pingi akali lapo Anatunya letena renge buku dokona kingi pyasi palamo dupwa opetae waili pii raeyo lao kareyamako.

4 Kamongona arapu dokona karo yuu peparae rae maiyuo karalapape. Rae wakasa maiyuo karo pipwape lao dee kamba leto.

5 Nakama wambu yango dupwa kando rambi rambi lao kararami. Kamongo baa repeta usale epara ingilyamo. 6 Mona nembo kara nalapape. Nakama yano piramo kararami dokona nakamana ateŋa dokome Anatu piso selapape. Dopa pyuo baa piso soo dokopa mona kare kare sangyu lao pipape. 7 Koraisa Yesupa pako kararami dokopa Anatunya mona kyuu lao singi renge mee wambu dupwa soo gisa nange dokome nakamana mona andape suu pingi dokonape kame pyuo minyara.

8 Pii renge dakeme lao oto leto. Yulu keyange wambu kando epe singi dupwana iki suu pyao karalapape. Angi dupwape, suu pingi rolaepe yulu rolaepe koo pali nange dupwape au pisi dupwape mona palenge yulu dusipa iki suu pyale pyale pyuo karalapape. 9 Yulupi piipi namba keta mana nyiyami dupwa iki pyuo karalapape. Anatu mona kyuu lao singi renge jingi dokome nakama pipya role pyao karara.

10 Namba Kamongopa pako karo renge dokona rae andake mailyu. Nambame nakama yuu wamba rekya lapala epeyo kande doko suu pyao ene alembole bange lapo nyiso jimi. Nakama namba kame soo kaeyami lao laa nalyo. Nakama nanesale karapala bange lapo jerami kata mende pali naya. 11 Namba pendewa ingyuo karapunu dokona pii mende daa. Bange mendasipa iki silyamosa namba mee rae maiyuo karenge.

12 Namba wamba yuu lapo lopo karo, yuu lapo bange malu siyasa kareyo dokona renge mende mana nyiyu. Doko lopo karowape sikya piramopa karowape bange sera panda bange see naramopa namba mee rae maiyuo kararo ingilyamo. 13 Koraisa baame namba porainyi pyambuyasa yulu peparaena lao mona kuki palyuo karenge.

14 Namba randa nao kareyo dokona nakama nyiso yulu ama keyange wakasa piyami leto. 15 Yuu wamba kanda soo waili pii lamaiyuo karo dokopa yuu Masetonia karapala mendasa peyo. Dokopa nakama Elyambu Pingi wambu Pilipai karenge dupwame iki namba nyisiyami doko range silyaminyi. Namba kapa kareyonopape randa nyiyunupape nakamame iki namba nyiso kareyami. 16 Namba Tesalonaika kareyo yuu gii dokopa yuu mendaki iki nyisapala kaeya nayami. Dee kambako nyisiyami. 17 Nakama bange jilyaminyi renge dokona iki rae mai nalyo. Nakamana yulu keyange wambo yake panda para lyasili. Bange malu konda pyuo jiminyi dokona kapa karo. 18 Bange malu kamame konda pyuo jiminyi dokona kapa karapala sangyu lao pepa dake isingi pyao jilyu. Ipaporaitasa baame nakamana bange jiminyi dupwa peparae namba nyipunu dokome epapu mende namba yangya nara ingilyamo. Anatu kyaa pyuo rendamu pingi mailyaminyipa kando nyuo rae maiyuo pingi doko. 19 Nambana Anatumi baa bange malu retenge dokome nakama bange yangyaramo dupwa peparae Koraisa Yesu keta isingi jera. 20 Namwana Rakange Anatu dokona lao kingi ketae pyambuo lakando karalu kararama. Doko kinyi.

21 Anatunya wambu Koraisa Yesu keta karenge dupwa peparae yako lao leto. Kurisene yango lapo nambamoo pipya role pyao karamwano dupwame opetae yako letaminyiko. 22 Anatunya wambu dae petenge dupwa peparaemoome dee kiŋi akalinya yulu pyakamyuo karenge dupwamoome yako letaminyi.

23 Kamongo Yesu Koraisana mona keyange palyuo ipingi renge nakama peparae keta palena lao leto.