1 Jerusaleme emba enda ingi porailyamo wane manja nao petenge dopale ingilyamo karenge doko

raeme kumuo kenane ketae palyuo karape.

Renge doko enda akalingimi yaki nyuo peyamopa baa wane malu manjiramopa

akali role pingi dokome wane mendasipa iki manjira.

2 Emba palirene komau anda doko andake ingyuo piri.

Pipala puu doko kaka soo pyuo pee lao pyasinju lape. Pinjingi isakulimi dupwa poraiyuo pimba pyare.

3 Embena yuu paki pakipi peparaena liti doko yuu neta yalele lao konda pyuo nyuo kalyape.

Dokopa wambu rara lapome dakepa yuu nao palaminyi dupwa

embena wambu dupwame nyerami.

Yuu taone apa silyamo dupwa dee wambumi palyuo kete pyarami.

4 Emba dee kamba elya nyii nare ingilyamo dokona pakame kumuo kara napipi.

Dee mendeme emba nyuo isa palya narami.

Enda akalingi kanda soo nyepala yulu mondo lao pii napala elya nyuo petengenyili pyuo petee kande dopako pyuo parende daa.

Enda waiya ingyuo kale paka paka leyamo peteene kande dokona kame sere.

5 Bange peparae pyuo wasiyamo doko embena akalingi mendeke ingyuo karara.

Dokona lao Kamongo Porai Wakasa letamano doko banya kingi dokosa lenge.

Isaraele wambunya Anatu poo pyasi dokome nakama nyiso kyawa lete nyera.

Doko baa yuu muu peparaena mupwa ingyuo karamo.

6 Isaraele emba enda mapwae

akalingimi role pyaa nalyamosa randa nyingi dopale ingilyamo.

Dopa pipyamopape Kamongome emba range kapu kyuo ipu lao kee lapala lao,

7 Yuu mange kuki lama nakama mee yaki nyuo kaeyapunu pipyaŋa.

Dee nambame mona andake retapunu dokome range nyero.

8 Namba imbwayo dokona yuu gii kuki lama nakama mata jiyu.

Dopa piyunupape nambame nambana mona retenge renge doko lasaka pyuo karalu kararo, lao

Kamongo emba pyuo nyilyamo dokome letamo.

9 Wamba Noa kareyamo dokopa

ipwame piyunu dopaleme mende pii naro lao lalu lao leyo.

Dee epapu nakama kando imbu singi manja nao

dee koo dupwana kando nakama koo pingiŋi laope randa jii narona lao lao lalu lao leto.

10 Yuu kyau kuki andakepe dupwa poro lao para.

Dopa piramopape nambame nakama mona retelyo doko ota nalu nara.

Nakama keta mona kyuu lao seraŋa lao lao kana minyuo leto pii doko minyaro.

Kamongo nakama mona retelyamo dokome dopa letamo.

O Jerusaleme taone randako nyingi kapa mende piri ingya nange dake.

Emba mendemepe mona minyarambwa narami ingilyamo.

Dokona lao nambame kana bange nyingi rungi rungi pingi dupwame nakamana isa susa reto dee kamba wasakaro.

12 Dopa pipala namba nakamana anda ketae londe dupwa kana kone keyange dupwame pyakapala

dee nakamana kame kambu dupwa kana isare ingyuo rao kui kui lasi dopaleme pyakao

dee kana kame awali lao palenge doko kana golome wasisi wambumi nyuo kinginya piso kalya pingi bange dokoreme pyakao piru ingilyamo.

13 Namba rangeme embena wambu dupwa mana lamaikapala

mona seramopa yulu peparaena kapa palyuo pena lao piru.

14 Rolaena renge dokome emba porainyi pyambwara.

Moŋo emba keta peyo lengepe paka rengepe dupwana emba kyawa minyaramo karare.

15 Mendeme emba nyuo kuinya palyuo pyalana piramo doko

Nambame suu pyaa naro dokona rangeme suu pilyu ote lao pira.

Mendeme baa emba yanda pimwaiyuo kararamo doko isa para ingilyamo.

16 Nambame yanda kakupi isareme kiso poraiyuo wasingi akali doko

nambame akali dopale inginyi pyambuyu.

Nambame dopako pyuo ami dupwame yanda kakupi wasisi dupwa nyepala wambu pyao kumakala penge doko

inginyi pyambuyu.

17 Dopa pyuo piyunu kaku dokona mendeme emba keta yalya nara lyakande.

Emba koo keta palyuo larami dupwa lao rolakamyuo karare.

Nambana kendemande dupwa arapunya palyuo reto kararonopa

nakamana yanda pimwai anamasi minyuo kararami,