1 Chipindi icho Mala na Nuhu na Hogila na Milika na Tiliza, wandele wa Selofehadi, wakwenhuka habehi. Nayo Selofehadi kakala mwana wa Hefeli, mwana wa Gileadi, mwana wa Makili, mwana wa Manase mwana wa Yosefu. 2 Wawo wema haulongozi wa Musa na haulongozi wa mkulu wa nhambiko Eleazali na haulongozi wa walangulizi wose wa mting'hano, hanhu ha kwingilila hana dihema da Mulungu. Walonga, 3 “Tati yetu kadanganika muichuwala, hakalile muna dibumbila da waja wowailumbile kumuhasanya Mndewa Mulungu muna dibumbila da Kola, mbali kadanganika kwa uhasanyi wake mwenyewo na heleke mwana wa chilume. 4 Habali zina da tati yetu disegezigwe muna ulukolo lwake kwaviya heleke mwana wa chilume? Ching'he uhazi hamwe na ndugu wa tati yetu.”

5 Musa kazigala mbuli zawo kwa Mndewa Mulungu. 6 Mndewa Mulungu kamulongela Musa, 7 “Mbuli yowolonga wandele wa Selofehadi ni kweli, weng'he uhazi hamwe na ndugu wa tati yawo, wasole uhazi wa tati yawo. 8 Walongele Waisilaili kuwa munhu yoyose yadanganike bila kuleka mwana wa chilume, mwanage wa chike kezakwing'higwa uhazi wake. 9 Na one yahawa kabule mwana wa chike, wezakwing'higwa ndugu zake wa chilume. 10 Na one yahawa kabule ndugu wa chilume, uhazi wake wezakwing'higwa tati zake wakulu hebu tati zake wadodo. 11 Na one tati yake kabule sekulu hebu mdodo, uhazi wake kezakwing'higwa ndugu yake wa habehi, nayo kezahazi fana uhazi wake. Dino dizakuwa lagilizo na ndagilizi kwa Waisilaili, fana Mndewa Mulungu viyamulagilize Musa.”

12 Mndewa Mulungu kamulongela Musa, “Kwela kuna umulima uno wa Abalimu na uilole isi yoniweng'hile Waisilaili. 13 Na uhaiwona, weye iviya kwizadanganika fana viyadanganike ndugu yako Haluni, 14 kwaviya muleka kunitegeleza mbuli yangu kuna ichuwala cha Sini. Haja mting'hano wose howalongelele kusonhela niye kuja Meliba. Hamunitendile fana yelile haulongozi wawo viwalondile weng'higwe mazi.” Meliba ni nzasa ya mazi ili Kadeshi kuna ichuwala cha Sini.

15 Musa kamulongela Mndewa Mulungu, 16 “Weye Mndewa Mulungu, Mulungu wili mwanduso wa ugima wose, umsagule munhu wa kuwalongoza wanhu wano, 17 yondayawalongolele na kuwalongoza muna zimbuli zawo zose, muladi wanhu wa Mndewa Mulungu sekewawe fana ng'hondolo welibule mdimi.”

18 Mndewa Mulungu kamulongela Musa, “Msole Yoshua mwana wa Nuni, munhu yeli na muhe wa Mulungu mgati yake na umwikile mkono wako. 19 Umwimize haulongozi ha mkulu wa nhambiko Eleazali na mting'hano wose, umwing'he sang'hano iyo. 20 Umtende yawe mulangulizi hamwe na weye muladi Waisilaili wose wamtegeleze. 21 Nayo kezakwima haulongozi wa mkulu wa nhambiko Eleazali, yeye kezamulongela voyolondeka kwa uhumizo wa Ulimu na Sumimu haulongozi wa Mndewa Mulungu, Eleazali kezawalongoza Yoshua na Waisilaili wose muna zimbuli zawo zose.” 22 Musa katenda fana Mndewa Mulungu viyamulagilize. Kamsola Yoshua na kumwimiza haulongozi wa mkulu wa nhambiko Eleazali na mting'hano wose. 23 Maabaho kamwikila makono kwa kumtenda yawe mulangulizi, fana Mndewa Mulungu viyamulagilize Musa.