Galesia
Nga Girigiringa ala Pol Fana Siosi Lo'oo 'i Galesia
La Pol 'e giria nga buka lo'oo fana nga ta'a na gila tagoto'o na gule'e lefu 'i Galesia. La Pol ngaia 'e fa'ananauaga suria la Jisas Kraes, ma 'ame aburu mola 'i buri na ngaia 'e leka fa'asiga, gila ka eta 'agila abulo fana longonga fana nga kwaifa'ananaunga matari'a. Tani ta'a ni kwaifa'ananaunga kotokoto gila nigi no'ona 'i Galesia, ma gila ka iiria Kristin 'agila kwaria lofona wane ma gila leka mola suria Tagi ala Moses fana 'agila odo 'i na'ona God.
Tafe'ua ma la Pol ngaia 'e iiria te'e fito'onga ala Jisas ne'e kwatea nga ta'a gila odo 'i na'ona God. Ma nga Anoe 'ola Abu ngaia ne'e faate'enia dauru ta'a na God. Lo'onga suria nga tagi ngaia 'ame to'omia 'ani fa'aodoa wane 'i na'ona God.
Ni 'ola taringa'i 'ubulana buka lo'oo:
Fata le'ale'anga (1:1-10)
La Pol ngaia nga Wane ni Kwairiinga kwala'imori (1:11—2:21)
Kwailaeta'afiinga na God (3:1—4:31)
Kwaitalainga na Anoe 'ola Abu (5:1—6:18)
1
1-2 Nga girigiringa lo'oo fa'asia 'inau la Pol, ma ta'a ni futanga ala Kraes na'a gila to'oru fe'eni nau 'i lo'oo, famooru ta'a na mooru 'ubulana siosi na gule'e lefu lo'oo 'i Galesia. Nau nga Wane ni Kwairiinga ala Jisas. Ta'a gila 'ame firi nau fana taunga'inga lo'oo. Tafe'ua la Jisas Kraes fe'enia God, nga Ma'ana lo'oo 'e tata'ea la Jisas fa'asia nga maenga, gaa'a na gala firi nau fana taunga'inga lo'oo.
3 Nau ku fo'a fana God nga Mama'a adauru fe'enia la Jisas Kraes nga Alafa 'ani kwatea kwailaeta'afiinga ma nga aloalonga famooru.
4 La Kraes 'e lo'o suria nga kwaisiriinga na God nga Mama'a adauru maka kwatea 'ingaia 'i talana fana nga rianga 'adauru fana 'ani rube 'adauru fa'asia nga abulonga 'ame le'a 'e aula fofona fanua lo'oo 'i wado na alata lo'oo. 5 Nau ku siria 'agoru fa'aba'ita God furifuri! Kiu.
Te'e Kwairiinga momola ne'e Le'a
6 Nau ku 'alefo no'o na nga 'ola lo'oo moru agea, tofuna ngaia 'ame aburu mola ma moru ka bulota'i no'o fa'asia God ne'e firi 'amooru suria nga kwailaeta'afiinga ala Kraes, ma moru bi'i bulota'i fana 'amoru tagoto'o na nga kwaifa'ananaunga matari na tani ta'a ngaa'i gila iiria 'ania nga Kwairiinga Le'a. 7 Tafe'ua ma nga kwaifa'ananaunga no'ona ngaia Kwairiinga Le'a kwala'imori suria la Kraes 'amoe. Tani ta'a ngaa'i gila ngadaa manata lamooru, ma gila ka irito'ona bulosilana nga Kwairiinga Le'a lo'oo suria la Kraes. 8 Ma gwa'a 'ameeru 'amoe ma enselo fa'asia 'i langi 'ani kwaifoula'i 'ania ta kwaifa'ananaunga ne'e matari'a fa'asia 'olataa na'a 'imeeru meru kwaifoula'i 'ania famooru 'i na'o, 'ingaia to'omia no'o fana God 'ani 'ui 'ania 'ubulana eele ne'e nunula ma 'e sia sui la'u. 9 'Ilaka'u 'i nau ku iiria 'e sui no'o mai 'i na'o, ma 'aku iiria la'u mola famooru: Lauta ta wane 'ani foulange'enia ta kwaifa'ananaunga ne'e matari'a fa'asia nga 'olataa lo'oo moru tagoto'o ai 'e sui no'o, ngaia to'omia fana God 'ani 'ui 'ania wane 'ilo'oori 'ubulana eele ne'e nunula ma 'e sia sui la'u.
10 Alata nau ku iiria alafuunga lo'oori, nau ku sia agea mola fana fa'abaole'alana nga ta'a. 'Amoe! Mai nau ku siria 'aku fa'abaole'a God 'i talana. Lauta nau ku siria fa'abaole'alana ta'a, 'ino'ona ma 'inau wane ni taunga'inga ala Kraes 'amoe.
La Pol 'e alafuu suria alata la Jisas 'e firia fana kwaifoula'inga
11 Ta'afutanga ala Kraes, nau ku iiria te'amooru, nga Kwairiinga Le'a lo'oo nau ku kwairii ai, ngaia 'ame 'ita mai fa'asia nga ta'a. 12 Nau ku 'ame ngaria la'u mola fa'asia nga wane, ma ta wane 'e 'ame fa'ananau nau mola 'ania. Tafe'ua ma la Jisas Kraes ne'e kwatea no'o fagu alata ngaia 'e faata'i fagu.
13 Mooru moru longoa te'efou no'o suria nga to'orulagu mai 'i na'o, alata laka'u 'inau ku to'oru suria falafala 'i Jiu. Mooru moru longoa la'u mola laka'u nau ku malangadaa nga siosi na God 'e ba'ita, mai nau kua irito'ona fana tagalange'enilai. 14 Nau ku tegela 'e lo'onga suria nga kwaifa'ananaunga ameeru 'i Jiu ma nga falafala na wawarifu meeru. Ngai lo'oo nau ku riufia aulalana ni wane alakwa na'a gila toto'o fe'eni nau.
15 Ma gwa'a ka 'ino'ona, 'i na'ona mai nau ku bi'i futa, God ngaia 'e firi nau no'o fana taunga'inga aana suria kwailaeta'afiinga aana. Na alata ngaia 'e firia, 16 God ka aile'a fana faate'enilana nga Wela aana fagu, fana 'inau 'aku foulange'enia nga Kwairiinga Le'a Lo'oo suria la Jisas fana ta'a gila 'ame Jiu. Ma alata God 'e faate'enia Wela aana fagu, nau ku 'ame leka no'o te'ana ta wane fana ngaia 'ani fa'ananau nau. 17 Nau ku 'ame leka 'ala'a fani Jerusalem fana agasilana nga ta'a na'a gila Ta'a ni Kwairiinga 'ina'ogu. Nau ku leka mola fana gule'e lefu 'i Arabia, sui mai nau kua ori la'u mola mai fana 'i Damaskas. 18 Ma buri na oru farisi nau ku bi'i leka fani 'i Jerusalem fana 'aku agasia la Pita, mai nau ku to'oru fe'enia suria nga akwale'e ma'e gani ma nima ai. 19 Mai nau ku agasia la'u mola la Jemes, nga wane burina nga Alafa, tafe'ua mai nau ku 'ame agasia tani Wane ni Kwairiinga ngaa'i la'u.
20 Ma ni 'ola lo'oo te'efou nau ku giria kau famooru ni 'ola kwala'imori te'efou lo'oo no'o. God 'e su'aai naku 'ame koto.
21 'I burina, nau ku leka la'u mola fana gule'e lefu 'i Siria ma 'i Silisia. 22 Na alata no'ona, nga ta'a na gila tagoto'o ala Kraes 'ubulana gule'e lefu 'i Judea, gila 'ame su'a mola agu. 23 Gila su'a mola na nga alafuunga lo'oo tani ta'a ngaa'i gila alafuu 'ania suri nau 'ilo'oo, “Nga wane laka'u ne'e irito'ona ngada lameeru 'ina'o, alata lo'oo, ngaia 'e kwairii no'o 'ania nga Kwairiinga Le'a Lo'oo suria la Kraes na ngaia 'e irito'ona fana ngadalai 'ina'o.” 24 Ngai lo'oo, gila ka baatafea no'o la God fana 'olataa lo'oo Ngaia 'e agea fagu.