3
Haman mara sang Mordekai
1 Ais itu hal dong samua, ju raja Ahasuweros mau kasi tunju hormat sang Haman, andia Hamedata pung ana, yang jadi turunan dari Agag. Andia ko dia angka sang Haman lebe tinggi dari dia pung pagawe dong samua.✡ 1 Samuel 15:7-33 2 Raja ju parenta ko kalo Haman maso-kaluar di istana pung pintu maso, na, samua pagawe yang laen dong musti tikam lutut ko kasi tunju hormat sang dia. Ais, samua kasi tunju hormat bagitu.
Ma Mordekai sonde tikam lutut deng sonde kasi tunju hormat sang Haman.
3 Ais pagawe yang laen dong di istana pung pintu maso tanya sang Mordekai bilang, “Bapa! Akurang ko bapa sonde bekin iko raja pung parenta bagitu?”
4 Ju Mordekai manyao bilang, “Beta ni, orang Yahudi. Andia ko beta sonde bisa tikam lutut sang manusia deng barang songgo dong. Jadi beta sonde bisa tikam lutut sang Haman.”* Orang pintar dong bilang, mangkali Mordekai sonde mau langgar parenta dari Kaluar dari Masir 20:4-5 yang tulis bilang, “Jang ukir patong yang model ke benda yang ada di langit di atas, ko, bumi di bawa, ko, dalam aer. Jang tikam lutut sang dong, deng jang sémba sang dong. Te Beta ni, bosong pung TUHAN Allah ni, camburu, deng sonde mau ko bosong kasi tunju hormat sang apa-apa yang laen, lebe dari Beta...”
Dong buju-buju sang dia tiap hari, ma dia sonde mau dengar sang dong. Ais ju dong kasi tau sang Haman, ko mau lia kalo Haman kasi biar sang Mordekai bagitu, ko sonde.
5 Waktu Haman dapat tau bilang, Mordekai sonde mau tikam lutut deng sonde mau kasi tunju hormat sang dia, ju Haman talalu kakodok. 6 Ma Haman sonde puas kalo mau bunu bekin mati sang Mordekai sandiri sa. Te dia ju mau bunu bekin abis Mordekai pung bangsa Yahudi anteru di 127 propinsi yang raja Ahasuweros pegang parenta.
Haman ator siasat ko mau bunu samua orang Yahudi
7 Dalam bulan April, waktu raja Ahasuweros su pegang parenta 12 taon, Haman suru bilang, “Cari tau kasi beta, waktu yang pas ko kotong bunu bekin abis Mordekai pung bangsa Yahudi dong.” Ais dong hela lot di Haman pung muka, ko cari tau bagitu. Ju itu lot jato kaná di tanggal 7 Maret, taon muka.† Alkitab bahasa Ibrani tulis bilang, dong hela lot di bulan Nisan, andia bulan Maret-April iko kotong pung kalender. Itu lot kasi tunju bulan Adar, andia bulan Pebruari-Maret. Lia ju Ester 3:13. Ini samua jadi kira-kira taon 472 SM (Sebelum Masehi). Alkitab bahasa Kupang ni salin itu tanggal dong iko kotong pung kalender sakarang. Kalo ‘lot’, bahasa Ibrani bilang, pur (bentuk tunggal). Andia sampe sakarang, tiap taon orang Yahudi bekin pesta Purim (pur-im: bentuk jamak) ko inga ini carita yang Tuhan pake Ester deng Mordekai ko kasi salamat sang dong.
8 Ju Haman pi di raja Ahasuweros ko kokoe bilang, “Bapa raja yang mulia! Ada satu bangsa asing yang idop tasiar di bapa pung 127 propinsi samua. Ma dong idop tapisa dari samua. Dong ju sombong deng sonde mau bacampor deng bangsa laen dong di sini. Dong pung adat deng atoran beda dari samua suku-bangsa laen, dong ju sonde bekin iko bapa raja pung atoran dong. Sonde pantas kalo dong sonde mau hormat kotong pung atoran bagitu. Jadi ada lebe bae, bapa raja sonde usa kasi biar ko dong idop lai. 9 Kalo iko bapa raja pung mau, beta usul bagini: bapa raja susun satu surat parenta yang tulis bilang, samua rakyat yang laen dong musti kasi ancor abis ini bangsa yang tar laku-laku dong. Kalo bapa raja satuju, na, biar ko beta kasi sang bendahara yang urus bapa raja pung doi, 10.000 karong doi perak.‡ Alkitab bahasa Ibrani tulis bilang, “10.000 talenta”. Satu talenta pung barát, andia 34 kilogram. Andia Haman tawar ko kasi 340 ton doi perak! Ada orang yang pintar dong pikir bilang, jang sampe Haman mau dapa kambali itu doi samua, deng rampas ame harta dari orang Yahudi yang dia bunu dong. Ais pake itu doi dong ko bayar orang yang urus itu parkara dong.
10 Bapa raja bilang, “Neu.” Ais dia kasi kaluar dia pung cincin stempel dari dia pung jari, ju sarakan kasi sang Haman ko cap bekin sah itu surat parenta. (Haman tu, yang bamusu deng bangsa Yahudi dong. Dia tu, andia Hamedata pung ana, yang jadi turunan dari Agag.)
11 Ju raja kasi tau sang Haman bilang, “Itu doi dong, tarsará sang lu sa. Deng lu mau bekin apa sang itu bangsa tu, itu ju tarsará sang lu sa.”
12 Jadi tanggal 17 April, Haman kumpul ame raja pung juru tulis dong. Dong susun satu surat parenta iko parsís ke Haman suru sang dong. Dong tulis kasi tiap gubernor di tiap propinsi. Dong ju tulis kasi tiap bangsa deng suku pung tua-tua adat. Dong tulis iko tiap propinsi deng bangsa pung bahasa deng huruf dong. Tiap surat yang mau kaluar pake raja Ahasuweros pung nama, deng tanda cap dari raja pung cincin stempel sandiri yang dia su sarakan kasi sang Haman tu. 13 Ais dong kasi itu surat dong samua sang tukang bawa pasán dong ko mau lari bawa kasi itu surat pi itu 127 propinsi dong. Itu surat dong samua pung isi parenta yang sama bilang, “Pamimpin dong musti ator ko biar nanti tanggal 7 Maret, dong musti bunu bekin mati deng kasi ancor abis samua orang Yahudi, laki-laki-parampuan, kici-bésar, tua-muda samua. Orang yang urus itu parkara ju bole rampas ame orang Yahudi pung harta milik dong samua.” 14 Kalo itu surat dong su sampe di daꞌera, dong musti tulis ulang dia pung isi, ko biar rakyat di tiap propinsi deng bangsa bisa tau dia pung isi, ju siap-siap ko mau bunu bekin mati abis samua orang Yahudi pas dia pung hari.
15 Waktu raja parenta tukang bawa pasán dong ko pi bawa capát, ju dong langsung lari bawa kasi itu surat parenta pi samua tampa. Di kota Susa ju, dong tempel itu surat ko biar samua rakyat bisa tau. Ais ju raja dudu makan-minum deng Haman. Ma rakyat di kota Susa dong ada tabingung-bingung.
✡3:1: 1 Samuel 15:7-33
*3:4: Orang pintar dong bilang, mangkali Mordekai sonde mau langgar parenta dari Kaluar dari Masir 20:4-5 yang tulis bilang, “Jang ukir patong yang model ke benda yang ada di langit di atas, ko, bumi di bawa, ko, dalam aer. Jang tikam lutut sang dong, deng jang sémba sang dong. Te Beta ni, bosong pung TUHAN Allah ni, camburu, deng sonde mau ko bosong kasi tunju hormat sang apa-apa yang laen, lebe dari Beta...”
†3:7: Alkitab bahasa Ibrani tulis bilang, dong hela lot di bulan Nisan, andia bulan Maret-April iko kotong pung kalender. Itu lot kasi tunju bulan Adar, andia bulan Pebruari-Maret. Lia ju Ester 3:13. Ini samua jadi kira-kira taon 472 SM (Sebelum Masehi). Alkitab bahasa Kupang ni salin itu tanggal dong iko kotong pung kalender sakarang. Kalo ‘lot’, bahasa Ibrani bilang, pur (bentuk tunggal). Andia sampe sakarang, tiap taon orang Yahudi bekin pesta Purim (pur-im: bentuk jamak) ko inga ini carita yang Tuhan pake Ester deng Mordekai ko kasi salamat sang dong.
‡3:9: Alkitab bahasa Ibrani tulis bilang, “10.000 talenta”. Satu talenta pung barát, andia 34 kilogram. Andia Haman tawar ko kasi 340 ton doi perak! Ada orang yang pintar dong pikir bilang, jang sampe Haman mau dapa kambali itu doi samua, deng rampas ame harta dari orang Yahudi yang dia bunu dong.