1 Falɛ ku lɛ, mì kɔ fe mgbam mbḭw ká ɗo yer tḭi saa bawda maambii. Ka ɗo ɓáy tḭw ɓa duɔ, tul ɓa tɔnɔ say. Taguɓa mbay guɓa tul tḭwkeri ku na mbḭw mbḭw riw bele. Ká nzaa pol-ri mbḭw mbḭw bele na, i vbie riŋ tḭ́iri Ŋgɛrɛwṵru ze ɗo ɗi* 13.1 Ká ɓil sewke na, mbay Rɔmri mbi riŋ ká ɓa taa Ŋgɛrɛwṵru ɓo tul-ri a í hii ɓay haŋa nzoɓri rùo ri munu ká ŋgɛrɛwṵru ɓari. Ɓe mini ze i tḭ̌irike Ŋgɛrɛwṵru.. 2 Fe mgbamke ká mì kɔ ni na rìi ɗaɗakli, ɓal-ɛri rìi ɓal tawa̰ra, nzi-ɛ rìi nzáa mbaki. Nay saŋ na ha̰ ni ŋgɔŋɔ ɓe, kariŋgaw mbay ɓe, ɓáy bawda hṵrusuo ɓay ɗáa fe. 3 Fe mgbamke ku na, tul-e mbḭw ká sakrake ha̰wri na, rìi fe káʼa ziŋ nṵɔ ká i ni ɗo ɗi, roo lɛ, nṵɔke ku na nzɛ. Nzoɓ tukɛlɛri riw bele na tuku ri ha ri ɗo yer a í ɗuu fal-ɛ. 4 I ruo nay saŋ na, ɓay ḭi lɛ, ka ha̰ hṵrusuo ha̰ fe mgbam na. I ruo fe mgbam na nda̰w í ɓaa mii: «Nzoɓ ve nda̰w rɔɔ hṵrusuo-ɛ rìi taa fe mgbamke na lɛ? Nzoɓ ve nda̰w rɔɔ, a máa rúu ziŋ ni lɛ?»

5 Báyḭi lɛ, Ŋgɛrɛwṵru pɔŋ faa ha̰ fe mgbam ká ɗo yer na ɓaa ɓay siika sùo ɓeri, ɓáy ɓay tḭ́iri ni, a ha̰ ni hṵrusuo ɗáa peɗ few síŋ niŋ pa̰rɛ siɗi† 13.5 Ì kḭi FKT 11.2.. 6 Ka mgbuɗa nzi-ɛ a tḭiri Ŋgɛrɛwṵru nda̰w, tḭ́iri riŋ-ɛ nda̰w, zaɗ káw ɓe ká nulue nda̰w, rɔɔ ɓari riw bele ká i ɗaa puo ká ɗi nda̰w pi. 7 Ŋgɛrɛwṵru pɔŋ faa ha̰ ni ruu ziŋ nzoɓri ká i ɗo ɓoɗ ɓa taa ɓe Ŋgɛrɛwṵru na a haw yṵm ká tul-ri. Ka ha̰ ni hṵrusuo ká tul sa̰w ka̰niri riw bele nda̰w, sa̰w nzoɓri riw bele nda̰w, nzaa ɓayri riw bele nda̰w, rɔɔ ɓáy nzoɓri ká sa̰w puo ɓari ɓoɗ ɓoɗ riw bele nda̰w pi. 8 Lɛɛ, nzoɓ tukɛlɛri riw bele na, i ruo fe mgbamke na; ɓa ɓari huo-ri ká i ɗaa riŋ-ri ɗo ɓil mbeɗe pam pola ɗɔɗ nda̰w rɔɔ tusiri ɗo ɓáy na ze i ruo ni ya. Mbeɗeke ku na, ɓa taa Vu Baɗu ká i i ni ɓa *fe poy.

9 Nzoɓ ká ɗo ɓáy suku láa ɓay lɛ, ka laa ɓay ká ɗo key! 10 Nzoɓ ká Ŋgɛrɛwṵru ɗaa ni ɗo ɓay tul hul sal lɛ, i mgbaka ni naa hul sal na kḭ. A nzoɓ káʼa ɗaa ni ɗo ɓay tul maamii lɛ, i ika ni ɓáy maamii na kḭ. Ɓe ze ɓa sa̰w síe haŋa nzoɓ taa Ŋgɛrɛwṵruri i sṵu law-ri a í ɗo tul mbika law.

11 Falɛ ku lɛ, mì kɔ fe mgbam kḭ ká ɗo yer ká tḭi na ɓáy buɗ saa siri. Ka ɗo ɓáy tḭw ɓa siɗi rìi tḭw vu baɗu, roo lɛ, ɓay ɓáa ɓe ɗo munu ɓa taa nay saŋ na. 12 Ɓe na, hṵrusuo titire fe mgbam riw bele ɗo sùo-ɛ, a ɗáake peɗ ɓáy riŋ-ɛ ha̰ nzoɓ tukɛlɛri ruo titire fe mgbam, ɓe ká nṵɔ ɗo sùo-ɛ rɔɔ a nzɛ na. 13 Ka ɗaa bawda fe saŋri; ka ɗaa ha̰ huu kara ɗì saa nulue a ɓo tusiri ká nun nzoɓri riw bele. 14 Ɓáy faa fe saŋri káʼa ɗaa ɓáy riŋ titire fe mgbamke na, ka ǔlake nzoɓ tukɛlɛri ká tusiri key. Ka ɓaa ha ri mii: «Ì mbuo fe rìi titire fe mgbam na ɓay ɗáake mbay ɓo tul-e, ɓe káʼa hu-huɗ nṵɔ maamii, rɔɔ a fil na.» 15 Ka ziŋ hṵrusuo ɓay haŋa ɔ̰mi ha̰ fe ká i mbuo rìi titire fe mgbam na, ɓay haŋa ɓo, fe ká i mbuo na ka ɓaa ɓay, a i nzoɓri riw bele ká i hii ɓay rúo ni ya na. 16 Fe mgbam ká ɗo yer ká tḭi saa siri na mbi nzi-ɛ ha̰ nzoɓri riw bele, ze i ɓa na ŋgɛrɛri, mase leɗri, nzoɓ feziŋari mase nzoɓ kṵkuri, koyri mase nzoɓri ká i kaw ɓáy tul-ri kara, i te surum ɗo nduo hoɗo ɓari, mase nzaa pol-ri. 17 Nzoɓ ká surum key na ti sùo-ɛ ya lɛ, ka maa ɓay híe fe ya nda̰w, a maa ɓay mbika fe a hie ziŋ nzoɓ ya nda̰w pi. Surumke ku na ɓa riŋ fe mgbam ká ɗo yer na, mase kḭiŋa suy fe ká maa kḭ ɓáy riŋke‡ 13.17 Ká ɓil sewke ku na, vu maa ɓay mbḭw mbḭw ká ɓil alfabe gɛrɛk na, ɗo ɓáy suy fe kḭiŋa ɓe kḭiŋa ɓe. Ɓe ze, zaɗka i ɗaa suy vu maa ɓay riŋ nzoɓ nde kḭ lɛ, vi ɓa suy fe ká maa kḭ ɓáy riŋ nzoɓke..

18 Ɓe ze ɓa sa̰w síe haŋa nzoɓ taa Ŋgɛrɛwṵruri i ɗo ɓáy nun nzɛm. Nzoɓ ká ɗo ɓáy fe kɔ́kɔ lɛ, a máa ɓay ndáy suy fe ká maa kḭ ɓáy fe mgbam ká ɗo yer na, ɓay ḭi lɛ, suy feke ku na, maa suy nzoɓ. Súyke na ɓa isɔɗ sɔɗ yie ɓáy síŋ yie pa̰rɛ yie (666).