3
1-2 Sa̰wke mini ze, zaɗka ɓuru kaw kpṵru taŋ láa soro ɓay ɓaarì, a ɓúru maa ɓay íki law ɓúru ká ɗi mbǎa na, ɓuru mbi nzaa ɓuru ɓay píe Timote se luo-rì, a pɔŋ ɓuru ká siɗi key laa lɛ, ɓuru káw Atɛn huo ɓuru. Ɓe Timote na ka ɓa yṵ naari, a ɓa bǎw peɗ Ŋgɛrɛwṵru káʼa ka-káa Ɓay Kere ká se tul *Krisi. Ɓuru pie ni ɓay haŋa ni ka vǎa ɗaa wa̰ra ɓo ɓil law-rì ha rì ŋgɔ́ŋke ká ɓil mbika law ɓaarì, 3 ɓay haŋa ɓo, ɗáa nun tuɔ síe ká tḭi tul-rì timbɛɗɛ key na, ka láŋ mbika law nzoɓ mbḭw ká sakra ɓaarì ku ya. Ɓaarì sùo-rì kara ì kɔ ta-taŋ nda̰w, kḭri ɗáa nun tuɔ síe ká mini key na, ɓa fe ká Ŋgɛrɛwṵru ha̰ faake ɗo ɓay tul naari. 4 Tusuɛke lɛ, ɓáy nam ká ɓuru kaw ziŋ rì kɔɓ rɔɓay na, ɓuru ɓaa ha rì mii, fe ɗáa nun tuɔ síe a tḭ́i tul naari, a lɛ, fekeri tḭi na kḭ. Ɓa fe ká ì kɔ ta-taŋ nda̰w ro. 5 Sa̰wke mini ze, munu ká mì maa ɓay íki law-i ɓay kǎwke kpṵru ya na, mì pie Timote ɓa luo-rì ɓay láake soro mbika law ɓaarì, ɓay ḭi lɛ, mì ɗaa hḭɛ ká ɓil law-i mí ɓaa mii, kɔ ya lɛ, ŋgɛrɛtemndaya lie law-rì ha̰ peɗ ká ɓuru ɗaa ká luo-rì pola na ɗo ɓa fe ká gɔr hɔy.
6 Roo lɛ, timbɛɗɛ key ká Timote yḭ̀i saa luo-rì a vi luo ɓuru key ɓáy ɓay kere, a lo soro ɓay ká se tul mbika law ɓaarì ká ì ɗo tul-e ɓaŋguɔ kpaɗara, ɓáy ini ká ì mgba ziŋ kḭ na ha̰ ɓuru laa. Ka ɓaa ha̰ ɓuru mii, ì ker ɓay se tul ɓuru ɓaŋguɔ, a kɔn kɔ́kɔ ɓuru kara ɗáa rì lok lok munu ká ɓuru kara, kɔn kɔ́kɔ rì ɗaa ɓuru munu nda̰w na. 7 Ɓe ze yṵ ɓururi, ká ɓil kɔ́kɔ sɛkɛ fe ɓururi riw bele, ɓáy fe law sɛkɛri riw bele ká tḭi tul ɓuru na, zaɗka Timote ví lo soro mbika law ɓaarì ká ì ɗo tul-e ɓaŋguɔ ha̰ ɓuru laa na, ɗaa ha̰ law ɓuru huo ɓuru mgbalak. 8 Ɓa tusuɛ kḭ, munu ká ì mgba mbika law ɓaarì ŋgɔ-ŋgɔŋ í zuɔ ziŋ Ŋgɛrɛmbay na, timbɛɗɛ key law ɓuru nda siri fṵɔ ha̰ ɓuru kaw ɓáy kere! 9 Ɓuru ɗáa mina ze ɓay ɗáa taambɔl ha̰ Ŋgɛrɛwṵru ɓay tul bawda suoriya ká ɓuru ziŋ ɓay tul-rì ká pol-e na lɛ woo! 10 Suŋ ɓáy ɓisie na, ɓuru ɗaa nzaa ɓay kere ŋgɔ-ŋgɔŋ ɓay haŋa ni ka mgbúɗa faa ha̰ ɓuru vǎa kɔ rì, a ɓúru kíɛ rì ɓie feri ká tɔ̀ŋ ká ɓil mbika law ɓaarì na* 3.10 Pol tḭi ɗul saa Tesalonik ɓay tul Ziɓri ká i hii ɓay ika ni. Sa̰wke ze ka kǐɛke ri titire feri ká se tul mbika law hɔy. Ɓe ze ka hii ɓay yḭ́i se luo-ri ɓay kíɛ ri ɓie feri ká tɔ̀ŋ ká ɓil mbika law na..
11 Ndaɗ ɓay haŋa Bǎa naari Ŋgɛrɛwṵru kḭ sùo-ɛ ɓáy Ŋgɛrɛmbay naari Zezu, ka† 3.11 Nzoɓ ɗáa mbeɗe key na, ka ɓaa ɓay se tul Ŋgɛrɛwṵru ɓáy Zezu Krisi ɓa nzoɓ ká mbḭw. léke faa ha̰ ɓuru se ɓúru vǎa kɔ rì ɓa kḭ! 12 Ndaɗ ɓay haŋa Ŋgɛrɛmbay ka ha̰ ini ká ì mgba ziŋ kḭ, rɔɔ í mgba ziŋ nzoɓri riw bele nda̰w na, ka ká̰y tul kḭ ɓa pola pola ha̰ ni maa ɓáy ini ká ɓuru mgba ziŋ rì. 13 Ɓe nda̰w rɔɔ, kaʼa haŋa rì hṵrusuo ha rì vi ɓa nzoɓri ká *taŋ kaɗ kaɗ taŋ ɓay ká ɗo tul-rì ká nun Bǎa naari Ŋgɛrɛwṵru ɓáy nam ká Ŋgɛrɛmbay naari Zezu a ví ɓáy nzoɓri riw bele ká i ɓa taa ɓe‡ 3.13 Ká zaɗ ni key na, nzoɓ ndáy ɓay ha̰nɛri ker mii, Ŋgɛrɛmbay Zezu a ví ɓáy leɗ nzaapeɗ ɓeri riw bele.. Amɛm! Ndaɗ ɓay haŋa ni ka ɗo munu na kḭ!
*3:10 3.10 Pol tḭi ɗul saa Tesalonik ɓay tul Ziɓri ká i hii ɓay ika ni. Sa̰wke ze ka kǐɛke ri titire feri ká se tul mbika law hɔy. Ɓe ze ka hii ɓay yḭ́i se luo-ri ɓay kíɛ ri ɓie feri ká tɔ̀ŋ ká ɓil mbika law na.
†3:11 3.11 Nzoɓ ɗáa mbeɗe key na, ka ɓaa ɓay se tul Ŋgɛrɛwṵru ɓáy Zezu Krisi ɓa nzoɓ ká mbḭw.
‡3:13 3.13 Ká zaɗ ni key na, nzoɓ ndáy ɓay ha̰nɛri ker mii, Ŋgɛrɛmbay Zezu a ví ɓáy leɗ nzaapeɗ ɓeri riw bele.