Mbeɗe sáka kuni fie 1 Kɔrɛ̰teri 5

Ɗáa nun pie ká ɗo sakra nzoɓ mbika lawri

1 Mì te suk-i lɛ, mì laa ɓayri ká nzoɓri ɓaa ya̰a ya̰a se tul-rì mii, fe ɗáa sahoy ɗo sakra ɓaarì. Mì laa mii, nzoɓ mbḭw ká sakra ɓaarì ku naa ziŋ má̰y bi-ɛ a ɗo ɗi ɗíki. Ɓa fe ɗáa ká nzoɓri ká i tuu Ŋgɛrɛwṵru ya hɔy kara, i maa ɓay ɗáa ya! 2 Ɓe nu ku hɔy kara, ì nda giri sùo-rì ká ɗi kɛlɛ! Ɓa fe ká ì ɗáa síe ká ɗi, a í naa nzoɓ fe ɗáa sahoy ká munu ku na ká sakra ɓaarì ɓa fal. Wa̰a, ì kɔ munu ya wṵ̌m lɛ woo? 3-4 A ɓi lɛ, ze mì ɗo sakra ɓaarì ya hɔy kara, ɓáy faa Tem Law Pie na, mì ɗaa ɓay ɓo tul nzoɓke na ɗɔɗ ro ɓáy riŋ Ŋgɛrɛmbay Zezu, rìi fe ká mì ɗo ziŋ rì mbḭw hɔy. Ì mbṵ kḭ ɓáy riŋ Ŋgɛrɛmbay naari ha̰ hṵrusuo-ɛ ka ɗo ziŋ rì. Ɓi hɔy kara mì zúɔ ziŋ rì ɓáy faa Tem Law Pie, 5 a ɓo, í naa nzoɓke ku na ká sakra nzoɓ mbika lawri, a í pɔ́ŋ ni ɓo nduo *Satan ɓay haŋa fe kɔn naysuo ká ɗo sùo-ɛ na ka ɓíɛ, a ha̰ tem sùo-ɛ ka zíŋ pam ɓáy nam ká Ŋgɛrɛmbay a yḭ́i a vi. 6 A ku wa̰a, fe ndáka giri sùo ɓa ḭi ɓáy lɛ woo? Ì kɔ, sim ɓay ɓáa nzoɓri ká mii: «Fe hew fe ká ndḭi munu hɔy i zukrike sṵm fe lɛ, ɗaa ha̰ sṵm na hew riw bele a ɗo hoɗoro» na wa̰a, ì kɔ munu ya lɛ woo? 7 Munu zu lɛ, ì naa fe hew fe ká ɓa nzoɓ fe ɗáa ya̰a na ká sakra ɓaarì ɓa fal, ɓay haŋa ɓo ì vi ɓa nzoɓri ká ì *taŋ kaɗ kaɗ. Ɓe nda̰w rɔɔ, ì ɗoko ɓa sṵm fe fie ká fe hew fe ti ɗi mbǎa na ɓáy. Ká ɓa tusuɛ lɛ, ì taŋ kaɗ kaɗ kḭ ro, ɓay ḭi lɛ, *Krisi na i i ni ɓa vuy *fe poy ká tina naari saa ɓil koy feya̰a. 8 Ɓe mini ze, náa ɗáari suoriya tḭ́i saa ɓil koy feya̰a na* ɓáy ŋgaw ká fe hew fe ká ɓa ɗáa law, ɓáy law mgbɔrɔ ti ɗi ya na. Roo lɛ, náa ɗáari suoriya ɓáy law ká taŋ kaɗ kaɗ ɓáy tusuɛ ɓay.

9 Ká ɓil mbeɗe ká mì ɗaa ha rì pola na, mì ɓaa ha rì mii, ì mgba bǎw ka zíŋ nzoɓ ɗáa nun pieri ya. 10 Roo lɛ, mì hii ɓay ɓáa ɓay se tul nzoɓri riw bele ká i ɓa nzoɓ ɗáa nun pieri, mase nzoɓ riiɓari, mase nzoɓ kɔ́kɔ nun feri, mase nzoɓ púo wṵruri ká tusiri key ya. Munu zu lɛ, ká ɓay yá̰m ri na, ndaɗ ɓay haŋa rì káw tusiri key mbǎa. 11 Tusuɛke lɛ, mì hii ɓay ɓáa ha rì mii: nzoɓ ká ɗi sùo-ɛ ɓa nzoɓ mbika law, rɔɔ a ɓa nzoɓ ɗáa nun pie nda̰w, mase nzoɓ kɔ́kɔ nun fe nda̰w, mase nzoɓ púo wṵruri nda̰w, mase nzoɓ tḭ́iri nzoɓri nda̰w, mase nzoɓ buo him nda̰w, mase koŋ riiɓa na, ì mgba bǎw ka ziŋ ni ya. Nzoɓ ká munu ku na, fe sṵm hɔy kara ì sáŋ sṵ́ŋake ziŋ ni. 12 Ɗáa ɓay ɓo tul nzoɓri ká i kɔ Zezu ya na wa̰a, ɓa peɗ ɓi lɛ woo? Ṵ́-uu, ɓa peɗ ɓi ya. Wa̰a, ɓa peɗ ɓaarì nzoɓ mbika lawri ká ɓay ɗáa ɓay ɓo tul nzoɓ taa ɓaarì ká i mbṵ tul kḭ na ya lɛ woo? 13 Ɓaarì na kḭ ze, ì naa nzoɓ law mgbɔrɔ na ká sakra ɓaarì ɓa fal munu ká mbeɗe Ŋgɛrɛwṵru ɓaa na. A ɓari nzoɓri ká i kɔ Zezu ya na, ɓa Ŋgɛrɛwṵru ze a ɗáa ɓay ɓo tul-ri.

*5:8 5.8 Nam suoriya tḭ́i saa ɓil koy na ɓa nam suoriya ká Ziɓri ɗaa ɓaŋguɔ ɓay kérke ɓay se tul tḭ́i ɓari saa ɓil koy ká tusiri Eziɓte. Ì kḭi mbeɗe Tḭ́i kɛlɛ 12.23-27.