Pablo Ilabogus Jesúsgin-kwenamalad-Tesalónicagin-pukmaladga Karta Palmijad
2 Tesalonicenses
Tegin Pablo kwenadgan-Tesalónicagin-pukmaladga karta palmisgu, apkajal Pablo Pab-Purpa-Nuedbal karta-pid-palmisbal. Wedin iti-karta. Imi teun kwenadgan-Tesalónicagin-pukmalad ebinzhasmal Jesúsde iti-napche pato kannan nonibal. Tenal teun Jesús ampa owed, ampa taklejul. Al Pablo chogzhajun Pab-Jesús ampayo iti-napche kannan tageddu, immal-chogbo kuenabgwel. Kepegin tulemal-pel-kwapa pela-pela Pab-ebenonimalo, tegin tule-pul-iskana nononibalo. We tuledin Cristo-chunchunnadzhulid. Tegin Jesús iti-napche kep noniko.
Tenal teun kwenadgan-Tesalónicagin-pukmalad-wal-walgwen yapa arpamal. Al Pablo kwenadganga chogzhabal: “Pemal keg-chulgu arpaged-wilubmal aga tukin aga akwegal.” Pitomalgu.
1
1 Imi antin-Pablo, Silvano tegin Timoteo, anmal-walapágwad pemal Tesalónicagin Pab Tummadbal tegin Pab-Jesucristobal-nanimaladga karta wis palmijimal.
2 Imi Pab-Tummad-anmal-pab tegin Pab-Jesucristo pemalga immal-nuegan imakelen, nabirin, tegin ulubgin akalzhul-itogal pemal-imakelen, nabirbalin.
Pab-Jesús kannan tanikil, peyedzhe tule-iskana-oturdakoed
3 Jesúsgin-kwenamalad, imi anmalgin chii pemalga pane-pane Pabga tog-nuedi choggal. Tenal pemal Pabbak yer nanedimaladbal, wedin, ib-nueddo. Tenal pemal pane-pane pul-pule Pab-Jesúsgin-penzhulidgin tunkunatapmal, tegin pemal pane-pane pul-pule aga emal-emal pilaledgin tunkunatapmalbal.
4 Tenal tulemal chabzhul pemal-imas, tegin tulemal peyedzhe pemal-owiosmalbal. Tenal pemal Pabgin-penzhulidbal yabli unnigusmal. Al anmal Pab-Jesúsbak-nanimalad-pukmalad-ilbal pemal-nug-okannodimal.
5 Al pemal-Pab-neg-takmaidga-wilenanimaladbal mag taklenoni Pab pemal-chujadbal ib-nued imas. Tegin pemal-wilenanimaladbal mag taklenonibal, pemal Pab-neg-takmaidgin megwed-wilubmalmo.
6 Imi Pab Tummad, tule-napírragwad. Tenal Pab Tummad peyedzhe tule-pemal-owiosmalad-owiononimogo. 7 Tenal Pab Tummad wileged-akar pemal-onomalo tegin anmal-onomalmogo.
Imi an-pemalga-chogzhiidyob Pab-Jesús-kannan-tanikoedgin kep kunoniko. Tenal Pab-Jesús Pab-neg-akar aga angel-kannaleged-nikmaladbak cho-abalgin tanikil, 8 Pab-Jesús sapejul tule-Pab-Tummad-wichulmalad tegin tule-e-kaka-nuegan-itojulmalad-oturdako.
9 Tenal tule-Pab-wichulmalad-oturdaleged pal kwen pelguojul. Tegin we tulemal Pab-maidzhe kwen togojulmal, tegin Pab-kannaleged-yer-takleged-immal-imanaid, kwen takojulmalbalo.
10 ¿Inkwa an-chogzhadyob kuo pe ebinzhe? Nabir. Imi Pab-Jesús kannan tanikil, tule-ebak-akenanimaladbal peyedzhe otummoledi-kuo. Tegin tule-Pab-Jesúsgin-pel-kwapa-ibzhemalad Pab-peyedzhe-immal-nuegan-imajadbal weob pakal peimalo.
Tenal anmal pemalga Pab-Jesús-igalgin chunmasgu, pemal Pab-Jesúsgin penguszhulmal. Al pe kwenadgan-pimaladbak pe yer itononimalmogo.
11 Al anmal pemalga pane-pane Pabzhe kolaldamal, Pab ebak-yer-nanedii pemal-takelen, nabirin. Tegin Pab-e-kannalegedgin pemal-ib-nued-peigujiidyob pemalga imakelen, nabirbalin, tegin pemal Jesúsgin-penzhulidbal immal-imabi-kunaid, Pab pemalga immal imakelen, nabirbalin.
12 ¿Ibiga anmal weob pemalga Pabzhe kolmal pe ebinzhe? Nabir. Imi Pab Tummad tegin Pab-Jesucristo aga wilejakwa tule-taked-wilubzhulinadbal wilejakwa tule-taknonimal. Al Pab pemalbal otummoledi-kuo, tegin pemal Pabgin otummoledi-kumalmogo.