Ⅰ Hikee hinoom, Yéesu naayeno kakalaŋan pakan paka ti ekumpaan ya enfakat ya eti Pútuun pa niŋ káatuunanii ekooŋan ya éesuume ya. Ñíhampaatiin puwaaseena pa pakati Pútuun pa niŋ pikalaŋana hilim ha heesiiŋanee ha niŋ pakakee ñíhampaatiin nkácolii. Ⅱ Nkasokoo: “Sok unii ti enkeyme kayine ayyem ti íhinu enkuu, ayme awwufanuu kayine enkuu?”

Ⅲ Yéesu naañahanii: “Inci lompo taakaataak kacakan. Nisokam: Ⅳ Ayme ápoñii Saŋ-Patis pátise, Pútuun pa fo pakan paka?”

Ⅴ Nkayeno piteŋenool, nkasokoolo: “Niŋ unaa usokaa Pútuun pa púpoñiyoo, afaasok unaa: 'Weyme uwune níyinanutoo?' Ⅵ Pale nuusokaa pakan paka kápoñiyoo, kayoŋ ka púlooŋ efikimuk unaa niŋ pukumpa, kamma nkíyinane nii Saŋ ayaamakoola.” Ⅶ Fiye, nkañahanoo: “Umíit ayme ápoñii Saŋ íhinu pátise.”

Ⅷ Yéesu naañahanii: “Inci lompo etisok aluu ti enkeyme kayine inci iyyem ti íhinu enke fiye.”

Ⅸ Fiye, Yéesu naasok hícantiitu eehe pakan paka: “Taakaataak akee áyiin eesuke kaakitoo, náaluwaas ko pakakee píhina, naakaay kaakaawool keefiyye. Ⅹ Ta hisaatu ha níhituuniye ta, naapoñ akee ti pimiikan pa pakateyoo pati píhina pa kati kawufanoo putum pa piteyoo ti pasaatal pa. Pale píhina pa nkasap amiikan a nkayaanoo sipeesoo ñaanii. Ⅺ Ati kaakit ka nene apoñ akee amiikan, pale aŋuu lompo píhina pa nkasapoo, nkateñaloo, nkayaanoo sipeesoo ñaanii. Ⅻ Nene apoñ amiikan áhaaciyenu, píhina pa nkasapoo, nkakuumoo, nkayaanoo. ⅩⅢ Fiye, ati kaakit ka naasok: 'Puume inci nkaakaay íhinu? Inci fapoñ añiinam aŋa inci íllafiye ya manti kátuuloo.' ⅩⅣ Pale ta píhina pa nkaŋantanoo ta nkateŋenool nkasok: 'Aha aŋa akaakaay ya hitoonu kaakit ka, umukoo ancuk kaakit ka kiyeniyaa kutuunaa.' ⅩⅤ Nkáfulanoo ti kaakit ka, nkamukoo.”

Fiye, Yéesu naasok: “Puume ati kaakit ka naakaakaayii íhinu? ⅩⅥ Afáakey naamuk píhina pa, naawufan kaakit ka pakakee.” Ta pakan paka nkásiye ta eehe nkasok: “Alímaati eehuu timpi hitaako!” ⅩⅦ Yéesu naasincanii naasok: “Ti hilim ha hiti Pútuun pa, eeheyme pakiical empe mpusoke:

ⅩⅧ “An óo an éenowii ti énankiin eyyuu áfaapucaloolo, an óo an aŋa néenowii teyoo afaatuncaloolo.”

ⅩⅨ  Pikalaŋana hilim ha heesiiŋanee ha niŋ ñíhampaatiin puwaaseena pa pakati Pútuun pa, nkámeyi nii poko kawune Yéesu naasok hícantiitu eehe. Nkálafiyoo hicoku tokotoko pale nkafe kayoŋ ka.

ⅩⅩ  Pikalaŋana hilim ha heesiiŋanee ha niŋ ñíhampaatiin ña nkatah kunuuwii meemak ti Yéesu, nkapoñ mikelecoola teyoo kéehine faŋii nii pakan keecoonoole. Nkálafi hikuucuyoo ti pákupaloo, kati kacokoo nkawufanoo ati hikaw ha hiti mah ma. ⅩⅪ Nkacakanoo eehe: “Ahámpaatiin, unii úmeyimeyi nii ánkupkup nkalaŋan pucoonool ciit, niŋ fúlaa toko aasincanantoo ti sicaw, pale ti pánipani ya ankalaŋan pakan paka pítin pa piti Pútuun pa. ⅩⅫ Sok unii: Cooneecoon fo kiteekit upucooy kúncoo ya Sesaal, amansa ya enfakat a ati Room?”

ⅩⅩⅢ Pale Yéesu náameyi nii hikuucuyoo nkayaake, naasokii: ⅩⅩⅣ “Níyisanam kaahit kiti mañ, puhooŋu niŋ caacaw ayme kayem toko?” Nkañahanoo: “Sesaal.” ⅩⅩⅤ Yéesu naasokii: “Ooto, niwufan Sesaal waah wa uteyoo, inniwufan Pútuun pa waah etempo.” ⅩⅩⅥ Fiye, hátikin pakan paka kayinaatoo hicoku ti pákupaloo, nkaŋaŋo ti pañahanaloo nkakemanool kem.

ⅩⅩⅦ Pakakee Pusatusaay nkákey ti Yéesu (poko nkasok nii keekete ka étikalitoonii). Nkacakanoo: ⅩⅩⅧ “Ahámpaatiin, Móyiis akiicaakiic ti hilim ha heesiiŋanee ha nii: 'Niŋ áyiin asayaa naaket peetaakut añii, atuwoo añaŋaa hitoonu aal a, naataak neyoo epuuk keekaakaay piyeno pakati púnuwoo eekete ya.' ⅩⅩⅨ Fiye, intaako ti miin moonool pákayiin isak niŋ pákasupak, áhampaatiin a naasa aal, ataakut añii, naaket. ⅩⅩⅩ Asúpiyenu ya naatoon aal a, ataakut añii, naaket. ⅩⅩⅪ Aháaciyenu ya lompo naatoonoo. Fo lompo incuke, ti isak ya niŋ pákasupak paka nkatoonoo, nkaket peetaakut neyoo añii. ⅩⅩⅫ Ti pikelan aal a lompo naaket. ⅩⅩⅩⅢ Fiye, hinak ti pilito pa ti eket ya, aal a aŋuu ati ayme, páawoo isak ya niŋ pákasupak paka púlooŋ kasayoo?”

ⅩⅩⅩⅣ Yéesu naañahanii: “Ti púlunta pa piti fíyooy, pakan paka nkasasa nkanimo. ⅩⅩⅩⅤ Payenka Pútuun pa mpusoke ka nii poko kanape kati kalitanee ti eket ya nkakin ti púlunta pa peeyem pa ti ékey etikasa, etikanimo. ⅩⅩⅩⅥ Etínekayini eket, kaatuko kacukaacuk nii pumaleekoo pa, ekina ewune etikasa etikanimo. Poko epuuk Pútuun kamma nkalitanee ti eket ya. ⅩⅩⅩⅦ Móyiis náayisan picaaŋ cataŋ nii keekete ka éfikalitoonii. La sokee la ti hilim ha hiti Pútuun pa kiti cífita ca ceecoke ca apan cisowiit, naayonkal Ateeteyo 'Pútuun pa piti Abraham, Pútuun pa piti Isaak, Pútuun pa piti Jakob.'✡ 20:37 Efúlii 3:6,15-16 ⅩⅩⅩⅧ Pútuun pa pineetaat piti keekete ka pale piti keeloŋe ka, kaatuko ti Pútuun pa an óo an oopa kaloŋa.”

ⅩⅩⅩⅨ Pakakee ti pikalaŋana hilim ha heesiiŋanee ha nkasokoo: “Ahámpaatiin, áakupaa pitempo tak!” ⅩⅬ Kaatuko nene káhaañiitoo kacakan hikee hilim.

ⅩⅬⅠ Yéesu naasokii: “Weyme uwune pakan paka nkasok Eenucee ya ati Pútuun pa, añii ati Dawid? ⅩⅬⅡ Dawid himuumoo asokaasok ti pakiical pa piti kícimu ka:

ⅩⅬⅣ “Dawid himuumoo nayonkaloo 'Ateeteyo', puume Eenucee ya áfaayini piyeno añii ati Dawid?”

ⅩⅬⅤ Ta pakan paka púlooŋ nkayeniyoo ta káasiitan, Yéesu naasok pinapana pa pakateyoo: ⅩⅬⅥ “Níwasum pikalaŋana hilim ha heesiiŋanee ha. Poko, nkálafilafi kaamuusool niŋ kúsool kenfakat, nkálafi lompo kapinkakicanee pinapnap ti kíliŋ ka. Poko nkayeno ti kúkon ka keenape ka ti púluumuma pa niŋ ti hili ha henfakat ha. ⅩⅬⅦ Poko lompo nkacaakool piyaaŋat pa payenka pákayiinii keekete ka, kapicoop waah wa uteyii púlooŋ. Apan niŋ kayeniyaa kaluum nkafiyo kati kacokee nii pakan keenape. Pútuun pa efipisapii pihaŋ pakakee paka.”