1 God, garram melabat ronwan irriwol wibin lisin ola stori brom melabat femili olabat.

Yubin dumbat ola gudbala ting brom longtaim.

2 Yu na bin andimwei ola najalot pipul brom det kantri,

en yubin meigim yu ronwan pipul jidan deya na.

3 Blanga yu pipul olabat nomo bin fait garram olabat spiya blanga teikoba det kantri.

Dei nomo bin win garram olabat ronwan pawa,

bat garram yu strongbala pawa yubin album olabat.

Dumaji yubin deya garram olabat, yubin shoum olabat haumatj yubin laigim olabat.

4 Yu na main king en yu main God.

Yu na bin album yu pipul win,

5 en garram yu pawa na melabat oldei bidim ola enami blanga melabat.

6 Ai nomo trastim main bo en erro,

o main bigwan naif blanga seibum mi.

7 Bat yu na bin seibum melabat brom melabat enami olabat,

en yu na bin bidim ol detlot pipul hu nomo bin laigim melabat.

8 Oni blanga yu na God melabat garra oldei toktokbat,

en melabat garra oldei preisim yu neim en gibitbat yu theingks olagijawan.

9 Bat yubin gibit melabat bekboun na, en yubin larram ola enami kaman en bidim melabat.

Yu nomo go garram melabat amimob enimo.

10 Yubin meigim melabat ran brom melabat enami olabat,

en deibin deigidawei ola ebrijing blanga melabat.

11 Yubin larram melabat gitkil wulijim ship,

en yubin jandimwei melabat langa ola difrinwan kantri.

12 Yubin gibitwei yu ronwan pipul olabat blanga lilwan prais,

jis laik deibin tjipwan.

13 God, ol detlot traib weya nomo weship yu bin luk wanim yubin dum langa melabat,

en olabat mokimbat en laflaf langa melabat.

14 Yubin meigim detlot najalot traib toktok blanga melabat.

Olabat sheikim miselp hed en tok nogudbala ting langa melabat.

15-16 Mi oldei jidan garram sheim olataim.

Det sheim gaburrumap mi brabliwei brom irrimbat ola nogudwan wed weya main enami olabat oldei toktok blanga mi, en ol detlot hu nomo laigim mi.

17 Ol dislot ting na bin hepin langa melabat, nomeda melabat nomo bin fogedabat yu o breigim det strongwan pramis weya yubin meigim garram melabat.

18 Melabat nomo bin tenawei brom yu, en melabat nomo bin libum det roud weya yu shoum melabat.

19 Bat yubin jis libum melabat langa ola wailwan enimul.

Yubin libum melabat langa brabli dakbala pleis.

20 If melabat bina stap weshipbat melabat God,

en stat preipreibat langa najawan drimin,

21 yu bina faindat en sabi streidawei,

dumaji yu sabi ebrijing weya melabat jinggabat langa melabat main.

22 Bat dijan im langa yu bingga weya melabat gitkil olataim.

Dei tridim melabat jis laik ship weya im redi blanga gitkil.✡ Rom 8:36

23 Yu weikap na YAWEI! Wotfo yu silipsilipbat?

Yu gidap!

Yu nomo gibit melabat bekboun olagija.

24 Wotfo yu haidim miselp brom melabat?

Nomo fogedabat melabat pein en trabul.

25 Melabat buldan langa graun.

Melabat leidan langa das. Wibin lus.

26 Kaman en album melabat.

Kaman en seibum melabat.

Dumaji yu kipgon laigim melabat, yu seibum melabat.