18
Song blanga Deibid wen imbin win
Deibid, det wekinmen blanga YAWEI bin sing dijan song langa im wen imbin seibum im brom King Sol en ol im enamimob.* Ridim det stori langa 2 Sem 22:1-51.
1 YAWEI, brabli trubalawei mi laigim yu.
Yu na meigim mi strongbala.
2 YAWEI oldei lukaftumbat mi,
jis laik wen ai go langa seifwan haus,
En wen mi oldei abum trabul,
mi oldei go langa im,
dumaji im jis laiga strongbala ston weya ai gin blandim miselp brom main enami olabat.
Main God oldei maindimbat mi wen ai go langa im,
en im oldei seibum mi brom main enami olabat jis laik det shild weya oldei stapam enibodi brom kilim sambodi.
3 Wen mi jingat langa YAWEI im oldei seibum mi brom main enami olabat.
Wal wi kaan preisimbat enibodi, oni YAWEI det trubala God.
4 Aibin abum bigis trabul, en aibin gulijap dai, dumaji main enami olabat bin raidaran langa mi.
Imbin jis laik solwoda bin raidaran langa mi redi blanga binijimap mi.
5 Deth bin ebriweya raidaran langa mi.
Imbin jis laik det greibyad bin redi blanga gajulum mi.
6 Bat aibin jingat langa YAWEI det trubala God.
Aibin jingat langa main God blanga album mi.
En imbin irrim mi deya langa det seikridwan pleis blanga im,
en imbin irrim langa mi wen aibin jingat langa im blanga album mi.
7 Wal ola graun bin sheiksheik.
Nomo lilbit ola graun ebriweya bin mubmub,
dumaji God bin gitwail langa im enami olabat.
8 Imbin jis laik imbin meigim smok kamat brom im nos,
en imbin jis laik imbin meigim brabli hotwan faiya kaman brom im mawus weya garra barnimap im enami olabat.
9 Imbin jis laik imbin breigimap det skai ontop,
en imbin kamdan garram dakwan klaud andanith langa im fut.
10 Kwikbala imbin kaman jis laik imbin flai garram det speshalwan einjul blanga im,
en imbin trebul langa det win jis laik imbin abum wing.
11 Imbin jis laik imbin gaburrumap miselp garram det dakbala klaud,
en det reinklaud ful garram woda bin raidaran langa im,
12 en ola laitining bin flesh en ola heilston bin buldan,
en det brabliwan lait blanga im bin shain thru detlot klaud.
13 Afta na YAWEI bin jingat brom ontop jis laiga thanda,
en ebribodi bin irrim det brabli haibala God bin jingat,
14 en brabliwei imbin bidim detlot enami blanga im.
Imbin jis laik imbin shudum olabat garram bo en erro en meigim olabat ranawei.
Imbin jis laik imbin tjakamdan laitining langa olabat en meigim olabat go ebriweya.
15 Wen YAWEI bin gitwail langa im enami olabat, dei kaan blandim miselp brom im, dumaji im brabli strongbala.
En wen imbin jingat, im strongwan wed bin kadimat det solwoda blanga shoum ola meinwan pat weya holdimap dijan wel.
16 Wal YAWEI bin irrim mi wen aibin jingat langa im blanga album mi,
en imbin jis laik imbin pudumdan im bingga brom top en gajulum mi,
en imbin pulumat mi brom det trabul weya aibin abum.
17 Imbin seibum mi brom ol detlot enami blanga main.
Imbin seibum mi brom ol detlot strongbala pipul hu nomo bin laigim mi.
18 Wen aibin abum det trabul, ol detlot pipul bin oldei trai en gajulum mi.
Bat YAWEI det trubala God bin oldei maindimbat mi.
19 Imbin oldei album mi wen aibin abum det trabul,
en imbin seibum mi, dumaji imbin gudbinji langa mi.
20 Wal YAWEI bin gudbala langa mi, dumaji mi oldei bulurrumbat det raitwei blanga im.
En imbin tok gudbalawei langa mi, dumaji ai garram klinwan bingga, en nomo bin dum enijing rong.
21 Aibin oldei duwit langa det lowa blanga YAWEI det trubala God,
en ai nomo bin tenim miselp brom main God.
22 Aibin oldei jinggabat ol detlot lowa blanga im,
en ai nomo bin gibit bekboun langa det lowa blanga im.
23 En im sabi mi jidan nomo garram enijing rong.
En im sabi ai nomo oldei dumbat nogudbala ting.
24 En blanga tharran na imbin gudbala langa mi, dumaji aibin oldei bulurrumbat det raitwei blanga im,
en im sabi ai nomo bin dum enijing rong.
25 Wal YAWEI, yu na det trubala God,
en yu oldei jidan trubala langa detlot pipul hu jidan trubala langa yu,
en yu oldei gudbala langa detlot pipul hu jidan nomo garram enijing rong.
26 Yu oldei gudbala langa detlot pipul hu jidan gudbala.
Bat yu oldei nogudbala langa detlot pipul hu jidan nogudbala.
27 En yu oldei meigim detlot pipul hu meigim miselp haibala jidan lobala.
Bat yu oldei seibum detlot pipul hu nomo meigim miselp haibala.
28 Wal YAWEI, yu na det trubala God,
en yu jidan jis laiga lait blanga mi.
En wen mi jidan nogudbinji,
im jis laik mi jidan langa dakbala pleis.
Bat yu oldei andimwei det dakbala en meigim mi jidan gudbinji.
29 En nomeda main enami olabat bigmob, bat stil yu oldei meigim mi strongbala blanga fait langa olabat.
En nomeda olabat brabli strongbala, bat stil yu oldei gibit mi pawa blanga bidim olabat.
30 Wal ol yumob pipul, det wei blanga God im brabli gudwan,
en yumob gin trastim detlot wed weya imbin tok.
YAWEI im jis laiga shild blanga detlot pipul hu askim im blanga album olabat.
31 Wal nobodi God. Oni YAWEI na God.
En oni im na garram pawa blanga maindimbat wi.
32 Im na oldei meigim mi strongbala,
en im na oldei opinimap det wei blanga mi,
33 en im oldei kipum mi seifwan wen mi ran kwikbala langa hil kantri wulijim det diya,
en im oldei meigim mi kipgon jidanbat seifwan langa haibala pleis.✡ Heba 3:19
34 Ai sabi hau blanga fait langa main enami olabat en bidim olabat,
dumaji YAWEI na bin lenim mi blanga fait.
35 Wal YAWEI, yu na det trubala God,
en yu oldei lukaftumbat mi en seibum mi brom main enami olabat.
Yu na bin oldei album mi en meigim mi haibala,
36 en yu nomo bin larram main enami olabat grebum mi,
en yu nomo bin larram mi buldan du.
37 Aibin oldei ranimap main enami olabat raidap aibin gajimap olabat.
Ai nomo bin oldei stap raidap aibin binijimap olabat.
38 Aibin oldei bidim olabat brabliwei,
en aibin oldei meigim olabat lus,
en dei kaan gidap en fait langa mi igin.
39 Wal YAWEI, yu na bin oldei meigim mi strongbala blanga fait langa main enami olabat en bidim olabat,
40 en yu na bin oldei meigim olabat ranawei brom mi wen deibin oldei luk mi kaman,
en aibin oldei binijimap ol detlot enami main hu nomo bin laigim mi.
41 Deibin oldei jingat blanga sambodi blanga album olabat en seibum olabat brom mi.
Bat nobodi bin seibum olabat.
Deibin jingat langa yu,
bat yu nomo bin irrim olabat.
42 En aibin oldei bastimap olabat jis laiga wekinmen weya im bastimap graun en det win blowimwei det das.
Aibin oldei pudumbut langa olabat jis laik weya ola pipul pudumbut langa mad langa roud.
43 Wal YAWEI, yu na det trubala God,
en yubin seibum mi brom detlot pipul wen deibin wandi kilim mi ded,
en yubin meigim mi jidan king blanga ola najalot traib du weya ai nomo bin sabi olabat.
44 Loda streinja pipul oldei kaman en baudan lida langa mi blanga shoum rispek langa mi,
en wen mi tok langa olabat, dei oldei duwit langa mi.
45 En wen detlot streinja pipul hu jidan main enami olabat irrim mi tok, dei oldei bradin langa mi,
en dei oldei gibap en kamat brom det pleis weya deibin blandim miselp.
46 Wal wi garra gibit preis langa YAWEI det trubala God hu jidan laibala.
Oni im na wi garra meigim haibala,
dumaji im na oldei maindimbat mi.
Im jis laiga strongbala ston weya ai gin blandim miselp brom main enami olabat.
47 Im na oldei peiyimbek main enami olabat.
Im na bin meigim mi jidan bos blanga ola pipul,
48 en im na bin seibum mi brom ola pipul hu nomo laigim mi.
Wal YAWEI, yu na det trubala God,
en yu na bin meigim mi bidim main enami olabat,
en yu na bin oldei lukaftumbat mi wen enibodi bin wandi kilim mi ded.
49 Wal blanga tharran na ai garra preisimbat yu neim en dalimbat ola pipul langa ebri kantri blanga yu,
en ai garra singim song blanga preisimbat yu ebridei.✡ Rom 15:9
50 God bin meigim mi jidan king,
en imbin oldei meigim mi bidim main enami olabat,
en imbin oldei shoum mi haumatj im laigim mi,
en im garra kain langa main femili olabat olagija.