1 Aarivo mwinyi mmote ari wiitthiwaaye Ananiiya, muukhaawe aari wiitthiwa Safiira, na-yo khuzanyisa nshapa laya. 2 Ye khusiilana na muukhaawe yoori nzurukhu opule ahilawane wooshi olawa owenkha maaswihaapa wooshi, khuthuula nkina khupweha opule nkina muukhaaya khulawana wa maaswihaapa.

3 Aphano, Pheeturu khumuuzela Ananiiya yoori: “Weyo, wanlikhelela toovi sheetwani oozokaka nrooho mwawo mpakha weeyo ofiyelela ohata Rooho Ttakatthiifu na khujivithela nzurukhu wuuzanyisiyeeyo nshapa lawo? 4 Niri talili khalaari nshapa lawo? Wala paata ya wuuzanyisa nzurukhu aya khawarina weeyo enu omwennyewe? Khi eti ewuupuwelisiye oretta vitthu nkhama epo niini? Weeyo apho ohooni yoori wawaahata anaatamu, ila wanhata Nnyizinku.”

5 Paata ya Pheeturu wiisha olupa mattakhuzi apale, Ananiiya eetta ofwa attaaphale. Atthu ooshi apale aari omoonaaye na aari osiilaaye mattakhuzi aya apale khwiiya awoova. 6 Khuta atthu khunkafwani khusala alawa onzikha.

7 Eviriyeevo woora mittatthu muukhaawe khuteela weekesa ojuwa etthu emuuliyeeyo mannawe. 8 Pheeturu khumuuzela yoori: “Nkahaya nkakuuze nzurukhu muuzanyisiyeeyo nshapa lenu pi otthuupo?”

Muukha otule khujipu yoori: “Pi otthuupo.”

9 Pheeturu khumuuza yoori: “Epo za niini mweeyo osiilana yoori mootoote Rooho ya Mbwana? Atthu apo oniwoonaaye vamilako apho pi atthaapo anzikhiyeeyo mannawo, alawa oozikhe na-weyo.”

10 Kharipuzeena attaaphale, na-ye etta ofwa. Khuthuuliwa khulawa khuzikhiwa mpawa wa mannawe. 11 Atthu ooshi a khuntti etile yaari onlottaaye Nnyizinku khwiiya awoova na apale ooshi aasiiliyeeyo vitthu epo zaarettikhaniyeezo.

12 Minjuza za waatta zaari orettikhanaazo vakatthi wa atthu zaari orettiwaazo pi maaswihaapa. Atthu ooshi apale onkhupaliyeeyo Yinsa aari okusanyeya nlipantta laajekiyeeyo ti Seleyimaana. 13 Atthu akina etta woova okusanyeyana yo, ila atthu enkeene aari owaattottopela maaswihaapa apale. 14 Atthu omwamini Yinsa khusala atepa weekezeleya waaya alume mpakha aakha, 15 khufiyelela atthu akina awaathuula alwele n'oowaapweha ntarikhi awaatthiiye vanrepa ama voolili yoori nenkawu Pheeturu amana avirikha, yo owaapatthe mwiifuli awe. 16 Aari ota atthu enkeene theenya oolankha miti mikina za waattamela Yeruzaleemu awaatisika alwele aya na apale aari ohoochiwaaye pi majini: ooshi khusala eeya oovonisiwa.

17 Aphano, nttunkhulu a mahaakhimu na ashirikhaaya ooshi mpakha na atthu ooshi a khuntti ya masatukhi khuwaata nrima. 18 Khuruma yoori okholiwa maaswihaapa khuwaafukela nkalapooso. 19 Aphano osikhu wa siikhu ethiitile, nlayikha la Nnyizinku khufukula milako za kalapooso khuwaasarulela vaje, 20 khuwooza yoori: “Mwilawe nnyupa wa Nnyizinku, mwilawe mwawaasomise atthu monkoni wa ohaayi opu mpheya.”

21 Maaswihaapa khushututela mattakhuzi apale ooziweeyo ti nlayikha ntthile, n'oocha khulawa mpakha vaje wa nyuupa ya Nnyizinku, khwaaza owaasomisa atthu. Aphano nttunkhulu a mahaakhimu a tiini na ashirikhaaya khuwaakusanya atthu na anamalokozela a tiini ooshi a Ezirayeele, khuruma olawa olaziwamo maaswihaapa apale nkalapooso. 22 Anamweekesela apale a kalapooso, n'oofiya nkalapooso khuhiwaasikanimo, khuruti n'oota khusala alupa yoori: 23 “Khaniwaasikaneenimo na nasikana kalapooso ya eri etthiipile naafukiyeezo na vaje aarivo anamweekesela akina, ila vakatthi nifukuliyeeyo milako khuhiimo hatha ntthu.” 24 Paata ya atthunkhulu apale, anamweekesela a nyuupa ya Nnyizinku na atthunkhula a mahaakhimu osiila mattakhuzi apale, yo khwiiya ooshanka mwaasa woohijuwi nanna eettettiyeezo maaswihaapa apale.

25 Wakathi otthuupule khutavo ntthu aari olupaaye owoozaka yoori: “Atthu apale mweeyo mwawaatthiyeeyo nkalapooso, miiyo kawaasikana vaje wa nyuupa wa Nnyizinku eettaka owaasomisa atthu.” 26 Khulankha anamweekesela na nttunkhulu aya khuweettela khusala awaatiisa, woohiwaalazili hatha kuvu, maana aari woova ovonyiwa pi atthu apale aari owaasomisaaye.

27 Khuwaalawana nnyupa aari othukumanaamo atthunkhulu yoori oozeliwe ti nttunkhulu wa mahaakhimu. 28 Khuwooza yoori: “Fweeyo khanaawuuziyeni yoori mwihirutele owaasomisa atthu mattakhuzi monkoni wa nzina nttho. Ila mweeyo khusala mwivira mwisomisaka Yeruzaleemu yooshi na olikha toowo mwintakha onilokoveza fweeyo ofwa wa ntthu aya oto.”

29 Pheeturu na ashirikhaawe khujipu araka: “Ti yooshapweya yamwanzo onshututela Nnyizinku zayita anaatamu! 30 Nnyizinku wa apapa zetthu ansisimula Yinsa nkhapuri, othuuto mweeyo mwankhomeliyeeyo vansalapa khumuula. 31 Ila Nnyizinku antta phantte ya nkhono-nlume awe khumwinkha ofwalume na khunretta wiiya namusuru yoori atthu a Ezirayeele apatthe othupwiya na opokherele nswammaha wa twampi zaya. 32 Fweeyo n'aamashahiti a vitthu zaya epo, vamote na Rooho Ttakatthiifu, etile Nnyizinku owenkhiyeeyo apale aninshututelaaye.”

33 Paata ya maaswihaapa olupa matthakhuzi apale, yo khwiiya okafilikha khusala atakha owoola. 34 Aarivo mfwarizeewu mmote aari wiitthiwaaye Kamaliyeele, aari namanozela wa kano na aari ntthu wooshitahiwa pi atthu a waatta. Ye khulankha khweemela vakatthi wa afwalume apale, khulupa yoori maaswihaapa asuruleliwe vaje khapula vattitthiiru. 35 Khuwooza attunkhulu azaawe apa yoori: “Mweeyo atthu a nti ya Ezirayeele, mwiiyane ophoole na vitthu mwintakhaazo owaarettela apo. 36 Khwa siikhu ziviriyeezo nyumani aapuweleliye ntthu aari wiitthiwaaye Thewuda aari ojilupezaaye wiiya mfwalume, aarina atthu aari onlottaaye oofiya miiya nne. Aphano ye khuuliwa, atthu awe apale aari onlottaaye khuhiisheli hatha vahali ooshi khumwazeya. 37 N'oofwa ye aapuweleliye nkina wa Kalileya aari wiitthiwaaya Yuuda, wakathi atthu aari waatikhiwaayo yoori alawe anthawule mfwalume, oto atthu enkeene aakhupaleliye onlotta, ila na-ye khuuliwa anamalottela awe ooshi khumwazeya. 38 Apho, kiniwuuzani yoori atthu apa awiri mwiwaarettele hatha etthu, mwiwaalikhe alawe maana nkhama shawuri za ntthu na khaazi ya ntthu khinrupaza ehiisheeni. 39 Ila nkhama ti ya Nnyizinku, mweeyo khaninteela wiishisa, amana mwitakha oretta toowo mwinshittanana Nnyizinku.”

40 Attunkhulu apale khukhupalela mattakhuzi apale alupiyeeyo Kamaliyeele, khuruma okhuweliwa maaswihaapa apale yoori avire nnyupa, khujaphiwa khuuri yoori ahirutela olaleya hapari za Yinsa, nawiisha khulikhiwa.

41 Maaswihaapa apale khusaruwa ari woofurahi mwaasa woohukhumweliwa olaleya nzina la Yinsa. 42 Yo khuhilikhi khusala avira alaleya wakhula siikhu nnyupa wa Nnyizinku na nyuupa khwa nyuupa, woohilikhi olupa Yinsa ti Al-Masiihu.