1 Nawiisha Yuuda ottakhula, Yuusufu khusala oojeela ojilipisela. Khuwooza akarumeyaawe ooshi olaavo, khuhiivo hatha ntthu ajijuwisaka attwiize. 2 Ye khusala alila anyakulaka mpakha khufiyelela osiila Amisuri, hapari epile khufiya wamfwalume Firawuuna.

3 Ye khuwooza attwiize yoori: “Miiyo ki Yuusufu! Nkahayani, paapa ori haayi?” Attwiize khuhisala awahi onjipu mwaasa yoori aari ooshanka channu.

4 Khuwooza attwiize yoori: “Mwisusele apha kiriivo.” Yo khunsusela khuwooza yoori: “Miiyo ki Yuusufu, otule mwaamuuzanyisiyeeyo khutaniwa Misuri. 5 Apho mwihishanke wala mwihishowerane mwaasa wookuuzanyisa khutaniwa okhuno. Ila Nluku eettiye okilokozisa yoori muusuru nafusi zenu. 6 Zavira nyaakha miwiri za jala mmamiti mphule ila zasala theenya nyaakha mithaanu atthu ahinteelaaye olima wala wuurula. 7 Nluku akiperekha vakatthi venu mweeyo yoori kuusuru ohaayi eenu muulumwenku mphu na apa anttelaaye ovokoliwa.

8 Khahiyo mweeyo mwikiperekhiye okhuno, ila Nluku ti ye akiperekhiye, khukiretta wiiya nkhama paapa wa Firawuuna, na nttunkhulu wa vaje vawe na tuniya ya Misuri. 9 Mwaakuve mwirutele wapaapa mwamuuze yoori: Mwanenu Yuusufu alupa yoori: Nluku akinkha ottunkhulu wa Misuri yooshi. Ate okhuno, ahirupaze! 10 Mwite mwiikhale nti wa Gosheni kharipu na-miyo, mweeyo na atuulwenu, aaneenu, pwittipwitthi zenu, mompe zenu, na vitthu zenu zooshi mwiriinaazo. 11 Ottuukho kisala kiwinkhani etile enuuhithajiyaanini, mweeyo na vaje venu na zooshi mwiriinaazo yoori mwihihoowe, maana zasala nyaakha epi mithaanu za jala.

12 Mweeyo mwinikoona na maasho enu, na ttwiiyaku Bejami onikoona, yoori khweele ti miyo kinlupaaye mattakhuzi apa. 13 Mwilawe mwamuuze paapa owahi kiriina Misuri na zooshi epile mooniyeezo. Apho mwaakuve mwilawe mwantiise ottuukhuno.”

14 Yuusufu khumpatikha ttwiiye Bejami khusala alila, na-ye Bejami khumpatikha khusala alila. 15 Nawiisha khuwaapejari attwiize ooshi khusala alila. Attaapho attwiize phi awahiyeevo ottakhula na-ye.

16 Hapari epile khumfiyela Firawuuna, yoori attwiize Yuusufu ata. Firawuuna n'oosiila khwiiya wootuveliwa vamote na akarumeyaawe. 17 Aphano Firawuuna khumuuza Yuusufu yoori: “Owooze attwiizo: Athuule nyama zaya arutele tuniya ya Kanaani. 18 Amweettele papeenu na ajamaazenu ooshi ate okhuno. Miiyo kintta owenkha puuro swaafi mmuti mphu, yoori asala aja vitthu zootuva zinruweriwaaye nttumphu.

19 Athuule mikukutta za Misuri ethiiti aweettele aanaaya, aakhaaya na papeenu. 20 Mwihiiyane hatha shaakha na mali zenu zooshi mwiriinaazo, maana vitthu zooshapweya za tuniya yooshi ya Misuri zinttela wiiya zeenu.”

21 Aana a Yaakhumpa khuretta etthiipile. Yuusufu khuwenkha mikukutta nkhama etthiipile aalupiyeezo Firawuuna, khuwenkha vitthu-zooja ntarikhi alawaka. 22 Wakhula ntthu khumwinkha kuwo pheeya ila Bejami khumwinkha miiya ttatthu za nzurukhu wa feeta na kuwo thaanu pheeya. 23 Khuperekha apuuru khumi zipakhiriye vitthu zaariiwo Misuri zootuva yoori alawe enkhiwe papaawe, khuperekha theenya apuuru khumi zipakhiriye tiriku na phaawu na vitthu kiina za akhipa yoori asala aja ntarikhi. 24 Nawiisha, khuleezana na attwiize yo khulankha khusala alawa, ye khuwooza yoori: “Mwihishowerane ntarikhi.”

25 Yo khulankha Misuri khusala alawa Kanaani wa papaaya Yaakhumpa. 26 N'oofiya khumuuza papaaya yoori: “Yuusufu nalelo ori haayi, nttunkhulu wa Misuri yooshi!” Yaakhumpa n'oosiila khuzileya mwaasa woohaamini. 27 Ila nawuuziwa mattakhuzi apale aalupiyeeyo Yuusufu, na khoona mikukutta epile aaperekhiyeezo yoori zilawe zanthuule papaawe, rooho yawe khutamo. 28 Yaakhumpa khulupa yoori: “Mwanaka ori haayi! Kintta olawa kamoone kihinafwe.”