1 Chʉ'ʉ, Pablo, Silana'me Timoteo ie chʉ'o tocha saomʉ mʉsanʉkonare, Tesalónica vʉ'ejoopo pa'inare, Dios mai Ja'kʉna'me Maire Paakʉ'te Jesucristo'te cuasakuanupʉ'te. Ũcuaʉji mʉsanʉkona rekoñoã re'oja'che pa'iche'te cho'okaiʉna re'oja'che pa'ijʉ̃'ʉ.

2 Mʉsanʉkonani ũcuanʉkore cuasajʉ pojojʉ Dioni si'arʉmʉ, “Re'orepamʉ, Ja'kʉ”, chiijʉ sẽekaijʉ pa'inaa'me chʉkʉna. 3 Jã'aja'ñe i'kajʉ Mai Ja'kʉ Diore cuhama'ñe ija'che sẽenaa'me chʉkʉna:

—Ja'kʉ, repana Tesalónica pa'ina mʉ'ʉre cuasanajejʉ re'oja'chechi'a cho'onaa'me. Pãi oijʉ chekʉnare rʉa re'oja'che cho'okainaa'me repana. Ũcuachi'a mʉ'ʉ chʉ'o cuasache jo'kasoma'ñe ũcua cuasajʉ, repanare mʉ'ʉ pa'icheja sajachere pojojʉ cha'ajʉ pa'ime —Jã'aja'ñe Diore sẽejʉ pa'inaa'me chʉkʉna.

4 Chʉkʉna majapãijana, Dios mʉsanʉkonare oiʉ chẽa paache masime chʉkʉna. 5 Mʉsanʉkona pa'icheja pa'irʉmʉ chʉkʉna Jesucristo'te cuasache kʉachʉ'o chʉ'varʉmʉ chʉ'ochi'a peoche i'kamanesinaa'me. Diopi Ũcuaʉ Rekochoji cho'okaiʉna Repaʉ chʉ'ore masi kʉajʉna asa chẽa, “Ie chʉ'o ũcuarepaa'me”, chini teana asa chẽasinaa'me mʉsanʉkona. Jã'aja'ñe cho'o, chʉkʉna mʉsanʉkonare Dioni cuasaa'jʉ chini re'oja'che cho'okaiche masime mʉsanʉkona.

6 Dios Rekochoji cho'okaiʉna Ũcuaʉ chʉ'ore pojojʉ asa chẽa pa'ijʉ rʉa cu'ache cho'ocojñonata'ni chʉkʉna pa'iche'te ña chẽa Maire Paakʉ pa'icheja'che pa'inajejʉ re'oja'che pa'inaa'me mʉsanʉkona.

7 Jã'aja'ñe pa'ijʉ chekʉnare Diore cuasanare re'oja'che pa'ijʉ ñonaa'me mʉsanʉkona. Mʉsanʉkona pa'icheja Macedonia cheja pa'inare, icheja Acaya cheja pa'inare ũcuachi'a re'oja'che pa'ijʉ ñonaa'me mʉsanʉkona. 8-9 Mʉsanʉkona re'oja'che pa'ijʉ Diore masi cuasajʉ Maire Paakʉ chʉ'o mʉsanʉkona chʉ'vache Macedoniana'me Acaya cheja pa'inachi'a masima'me. Chekʉchejña pa'ina peore masime mʉsanʉkona pa'iche. Masinajejʉ chʉkʉnapi mʉsanʉkona pa'iche'te kʉato, ija'che i'kanaa'me repana: “Tesalónica pa'ina Dioni masi cuasajʉ re'oja'che pa'iche asanajejʉ masinaa'me chʉkʉna”, chiinaa'me. “Pablo, Silana'me Timoteo sani ñajʉna repacheja pa'ina ña pojoasome repanare. Repana chʉ'vasi'e Dios chʉ'o asa chẽa repacheja pa'ina te'ena aperʉmʉ rupʉ tʉ̃osiva'nare, ‘Dioa'mʉ ikʉ’, chiijʉ pojojʉ pa'isina jo'kaso, churata'ni Diorepaʉni Si'arʉmʉ Pa'ikʉni cuasajʉ jovo Repaʉ chiiche'te cho'okaijʉ pa'ijʉasome. 10 Ũcuachi'a Dios Mamakʉ'te Jesure cʉnaʉmʉpi caje pa'iʉ jũniso tãcojñoʉna Dios Vasosi'kʉni cha'ajʉ pa'ijʉasome repana, Repaʉ'te cuasanarechi'a vati toa saiche Ʉ̃sejaʉni”, chiinaa'me repana.