Matius
Horok Lirna La'an
Yesus Nin man lernohi pakunohi ida ma naran Matius horok Lirna Wawa'an eniyeni (9:9-13).
Lolo horok eni Matius wakunu mouropo nahenia Makromod Lalap kikan Yesus namwali Rai laa ewi-ewi (Mesias), la an kukunohi nahenia Ai onne rai Daud Upun Anan. Lolo horok eni Matius napolu Yesus, rai Daud Anan rew'ira (1:1; 9:27; 12:23; 15:22; 20:30-31; 21:9, 15; 22:41-45). Nonolu lolo Nou Nonolu Makromod Lalap nou nahenia rai Daud upun anan ida namwali Rai laa ewi-ewi. Yesus na'akuku na'anokor nou onne ono Ai onne rai Daud Upun Anan. Nonolu nabi-nabi kukunohi inhawe ma namwali lere man mai, la Matius wakunu mouropo hi'ihehewi Yesus na'akuku na'anokor rir wanakunu onnenihe (1:22-23; 2:5-6, 15, 17-18, 23; 3:3; 4:14-16; 8:17; 12:17-21; 13:35; 21:4-5, 16; 26:31; 27:9-10).
Horok Ihin
1. Matius horok wanakunu mori Yesus noro Nin honowok dedesne (pnk. 1-4).
2. Yesus wakuku heri lolo wo'or (pnk. 5-7).
3. Yesus Nin hini'i wenewhe man ri kan dodo'onnala makun kukul Nin ke'eke'el an'anha man lap narehi (8:1-9:34).
4. Yesus wakuku Nin man lernohi pakunohi idaweli woro'o mene hopon hir laa loikaru Lirna Wawa'an ri (9:35-11:1).
5. Ha wo'ira ma namwali lolo noho Galilea kukul nahenia Yesus namwali Rai laa ewi-ewi (11:2-12:5).
6. Yesus nodi wanakunu naho'ok wakuku hi'ihehewi Makromod Lalap nodi molollo ri mormori (13:1-52).
7. Yesus Nin honowok nair lolo kota-kote ma aile noho Galilea (13:53-17:27).
8. Yesus wakuku Nin man lernohi hini'i wenewhe man wa'an ri man lernohi Ai hi'ie (pnk. 18).
9. Yesus nala'a laa kota Yerusalem wakuku ri nodi wanakunu naho'ok, la rakan Yerusalem rin kokala Ai noro wawa'an, la Yesus kuku sala Yahudi rir man panulu (pnk. 19-23).
10. Yesus wakunu inhawe ma namwali lere man mai (pnk. 24-25).
11. Yesus maki la mori wali'ur (pnk. 26-28).
1
Yesus upun a'an kanakarne
(Luk. 3:23-28)
1 Yesus Kristus upun a'an: Yesus eni rai Daud upun anan; Daud eni Abraham upun anan.
Yesus upun a'anhe nano Abraham rakan Daud kanakarne
2 Abraham na'ori Isak,
Isak na'ori Yakup,
Yakup na'ori Yehuda noro mo'oniwalinhe idaweli ida.
3 Yehuda na'ori Peres noro Zerah (woro'o eniyenihe inna naran Tamar)
Peres na'ori Hezron,
Hezron na'ori Ram,
4 Ram na'ori Aminadab,
Aminadab na'ori Nahason,
Nahason na'ori Salmon,
5 Salmon na'ori Boas (Boas eniyeni inna naran Rahab),* Rahab eniyeni man paku suwar noho Israel nin man koklolo na'inau woro'o lolo kota Yeriko.
Boas na'ori Obed (Obed eniyeni inna naran Rut),
Obed na'ori Isai,
6 la Isai na'ori Daud ma namwali rai Israel.
Yesus upun a'anhe nano Daud rakan lere Babel enihe kele Israel rodi laa rir nohe
Daud na'ori Salomo (Salomo eniyeni inna naran Batseba, la nonolu Uria hono ma namwalumedi).
7 Salomo na'ori Rehabeam,
Rehabeam na'ori Abia,
Abia na'ori Asa,
8 Asa na'ori Yosafat,
Yosafat na'ori Yoram,
Yoram na'ori Uzia,
9 Uzia na'ori Yotam,
Yotam na'ori Ahas,
Ahas na'ori Hizkia,
10 Hizkia na'ori Manasye,
Manasye na'ori Amon,
Amon na'ori Yosia,
11 la Yosia na'ori Yekonya noro mo'oniwalinhe lere Babel enihe keledi Israel, rodi laa rir nohe.
Yesus upun a'anhe nano lere manin Babel kele Israel rodi laa rir nohe rakan lere momori Yesus
12 Nano lere Babel enihe keledi Israel,
Yekonya na'ori Sealtiel,
Sealtiel na'ori Zerubabel,
13 Zerubabel na'ori Abihud,
Abihud na'ori Elyakim,
Elyakim na'ori Azur,
14 Azur na'ori Zadok,
Zadok na'ori Akim,
Akim na'ori Eliud,
15 Eliud na'ori Eleazar,
Eleazar na'ori Matan,
Matan na'ori Yakup,
16 la Yakup na'ori Yusup man ho Maria.
Maria eniyeni mori Yesus man rapolu Kristus.
17 Ende Yesus upun a'anhe nano Abraham rakan Daud, ku rewen idaweli wo'akka; nano Daud rakan lere manin Babel enihe keledi Israel rodi laa rir nohe, ku rewen idaweli wo'akka haenhi; nano lere Israel laa noho Babel rakan Yesus Kristus Nin lere, ku rewen idaweli wo'akka wali'ur.
Roh Kudus nodi molollo Maria ihin kemen penia mori Yesus
(Luk. 2:1-7)
18 Lere momori Yesus onneni lirna la'an hi'i heheni: Yesus inna Maria noro aman Yusup, ida ma naledi honorok aki ida me'e, maa ka ramkuru wuku makun. Roh Kudus nodi molollo Maria ihin kemen, penia nornoro raramne me'e. * Luk. 1:27 19 Maa, Yusup ka nauroin Roh Kudus nodi molollo Maria kemen makun, de an pene'ek Maria larlewenedi woro'ohe rira honorok aki ma namnehe na'alono me'e. Yusup eni ri man akin mou la namdudu, penia ai namhene wakunu nano'onyaka Maria lolo heri kalarna, de nanoin kalla namehin leke yon ho Maria me'e.
20 Alam ida nine, Yusup naho'ok nakail nina aki eniyeni mene namkuru la namarmi. Namlilinnohi Makromod Lalap Nin hophopon a'am raram mai nalhari kemen Yusup lolo nina namarmi na'aheni, “Yusup, Daud upun anan o, Tatana man minle Maria ihin kemen onne, Roh Kudus nina molollo, de yon mamka'uk more ho. 21 Rakan Maria nina lere alam nokor, an mori mo'oniyane. Lere onne waki naran Yesus, ono Ai penia man huri we'er Nin ri nano dohohale nin molollo.”
22 Onnenihe na'akeme namwali lekpananne na'akuku na'anokor inhawa Makromod Lalap na'aheniyedi lolo Nin nabi na'ahenia, 23 “Dernala! Maekrara ida ma kan ho makun nornoro raramne, de moriyana mo'oni ida. Tatan eniyeni rin waki naran Imanuel.”
Nano wanakunu Ibrani, naran ‘Imanuel’ napa'ahne, ‘Makromod Lalap aiyedi ik leken kalarna me'e.’ * Yes. 7:14
24 Yusup namake ne, lernohi inhawa man Makromod Lalap Nina hophopon a'am raram hohopon onneni, de ai nala Maria namwali hono, 25 maa noro Maria ka ramkuru wuku hehen nanumene rakan Maria moriyedi mo'oniyana onneni. Enla Yusup waki naran Yesus.