4
At'u a Mulungu mandangira hat'u ha kuoya
1 Bai cho kilagane arichoika Mulungu dzulu za at'u kwangira haryahu hat'uhe ha kuoya, kichereko hatha vivi. Kwa vizho nafudzimanyirire, p'ore angine enu mukakosa kwangira kuko. 2 Kwani uwo uv̱oro udzo wa hat'u ha kuoya wambirizwa kwa o akare ehu dza zho Uv̱oro Udzo urizhohubiriwa kwehu siswi. Ela uv̱oro uwo k'auafwahire kit'u, mana mawambirwa ela k'amaukuluhirire. 3 4:3-5 Zabu 95:11Ela siswi fukuluhirao, nikwangira kahi za haryahu hat'u ha kuoya. Ela ao mario k'amakuluhirire, Mulungu mwenye wanena akiamba,
“Nalaha kwa k'oro za kwangu, kukala,
‘K'amandangira ng'o haryahu hat'u hangu ha kuoya.’ ”
Mulungu wanena vivi, ingahokala kaziye ya kutengeza hat'u ha kuoya were waigonya kare hangu kuumbwa kwa urumwengu. 4 4:4 Mwan 2:2Kwani Maoro, gananena dzulu ya yo siku ya fungahe. Ganaamba, “Mulungu wahenda kazize akizimarigiza, na siku ya fungahe akioya.”
5 4:5 3:11Kidza Maoro gananena kaheri hat'u hangine na kuamba, “K'amandangira bule haryahu hat'u hangu ha kuoya.” 6 Aryahu at'u a kwandza kuhubiriwa Uv̱oro Udzo wa kwangira haryahu hat'u ha kuoya, k'amadimire kwangira, kwa kukala k'amamusikirire Mulungu. Ela vikara, kwa kukala cho kilagane cha Mulungu kichere lwazu, 7 4:7 3:7-8; Zabu 95:7-8iye waika siku nyingine kwa at'u mangire, iriyo ni “Rero.” Bada ya muda mure, iye wanena kukirira na muthawali Daudi kahi za Maoro gadzigohadzwa kare, akiamba,
“Rero musikiraho mumirowe,
sihendeni singo nyomu.”
8 4:8 Kumbu 31:7; Josh 22:4Kwani kalaho Joshua waalongoza o at'u hatha akiangiza haryahu hat'u ha kuoya, Mulungu k'akanenere dzulu za siku nyingine bule. 9 Kwa vizho bai, kusere na siku ya kuoya kwa at'u a Mulungu. 10 4:10 4:4Kwani kila andiyengira kahi za kuoya kwa Mulungu, andaoya kula kwa kazize zosi, here Mulungu arizhohenda kula kwa kazize. 11 Kwa vizho bai, nafujeze here zhadimikikazho, fwangire kahi za haryahu hat'u ha kuoya, ili kwamba hasikale na mut'u hatha mumwenga, andiyekosa kwangira kwa ut'u wa kuko kutsamusikira Mulungu.
12 4:12 Isa 49:2; 55:11; Jere 17:10; Joh 12:48; Aefe 6:17; 1 P'et 1:23; Ugun 1:16Kwani neno ra Mulungu ri moyo na rina nguvu, rinarya kukira mushu wa kurya kosi-kosi. Rinadunga kahi za mioyo yehu na maroho gehu, na kwangira-ngira kahi za vilungo zhehu zhosi, kahi za misoza na mudhetso, na kumanya maazo na nia za mioyo yehu. 13 K'akuna chumbe chochosi kiricho ndani-ndani zhomu, hatha Mulungu akale k'adima kuchona. Iye anaona kila kit'u, mana kwakwe iye vit'u zhosi vi halamu na vinaoneka lwazu. Kidza fundakwenda hukanenet'o dzulu za mahendo gehu gosi mbere za kwakwe iye.
Jesu ndiye Mulombi mubomu
14 4:14 5:8; 8:1; Mulombi mubomu: 2:17-18; 3:1; 5:1, 4-6; 7:24-28; 8:3; 9:7, 11Bai, funa mulombi mubomu zhomu, Jesu Masihi, Mwana wa Mulungu, ariyekwenda kuko mulunguni ariko Mulungu. Kwa vizho ro kuluhiro huriro naro kwakwe nafurigwire kurunya. 15 4:15 2:18; 5:2; 7:26; 9:12; 1 Joh 3:5Iye mulombi wehu, be ni mulombi ariye anafuonera mbazi kahi za unyonge wehu. Kwani wajezwa kwa kila ngira, dza zho fujezwazho siswi, ela k'ahendere dambi bule. 16 4:16 10:19Kwa vizho nafukisongerere kihi cha endzi cha Mulungu mwenye nema hasiho woga. Haho hundadima kuhokera mbazi na nema, vit'u vindizhofwaviza wakathi hukikala huna haja nazho.
4:3 4:3-5 Zabu 95:11
4:4 4:4 Mwan 2:2
4:5 4:5 3:11
4:7 4:7 3:7-8; Zabu 95:7-8
4:8 4:8 Kumbu 31:7; Josh 22:4
4:10 4:10 4:4
4:12 4:12 Isa 49:2; 55:11; Jere 17:10; Joh 12:48; Aefe 6:17; 1 P'et 1:23; Ugun 1:16
4:14 4:14 5:8; 8:1; Mulombi mubomu: 2:17-18; 3:1; 5:1, 4-6; 7:24-28; 8:3; 9:7, 11
4:15 4:15 2:18; 5:2; 7:26; 9:12; 1 Joh 3:5
4:16 4:16 10:19