ROME
Mi-ngaidiang Paul Chemajia
Chonglamsaat
Rome mi-ngaidiang larik hi tirton Paul in Jisu Christa inneisuoli 54-58 kum suungnga inmajia larik eii. Paul in Rome ma laleisimak, khawajarra hiwa chemajiahi Rome ma kaom Jihudi khat-um Jihudi ka-emak Christian ngai minchu mindik nasik-ah ileiminchoi chemajia kha eii. Hiwa chemajiahi ama'n Corinthna aomlaiya ileimajia chemajia kha eii. Khawajarra Paul in hiwa amajia nachu, phung rakip Jisu Christa kha ngamna rasu khat-um juirasu tia imajia kha eii (16:26).
Rome mi-ngaidiang Paul chemajia larik hi Christian rakip sik-ah amun rakip-ah khat-um apha rakip sik-ah arei kaom kha eii, ajarchu Paul in angtuk incheenna khat-um katha tak-ah sanminring nahi Jisu Christa makheiya nimumator tia namalarpi. Halli Paul in Jisu Christa chongkahoi kha Inzootna Maruo le naminjompi. Kasing kathei angjet in murruolsiak inthoa larik-ah arei kaomkhet alam khachu 1:16 eii, hinthoa injia, “Kei'n chongkahoi sik bit-ah injak mong, ajarchu hiwahi sanminringna munasik ah ka-ngamna mirakip sik-ah chu Pathian ranak kha eii, mansakhet ah Jihudi ngaisik halli zaatlop ngai sik um eii.” Rome (1-12) Mainsakhet khoithenna kha Pathian jarra inthuukthei eii, halli inni huuina khoithenna (13-15) hichu Christian ringkho-ah chuon tak-ah thosik minchuna angjet inchel kha eii.
Asuungnga kaom Chong
1. Paul in chemajia hi inphut na-ah mainsa khet-ah atheinuo-ah inrilsuok halli atudiangme inmajia tikha arilsuok (1:1-15)
2. Ama'n miring ngai jarra khat-um Jisu Christa makheiya sanminringna nimuthei tia amajia (1:16–11:36)
3. Hiwasuoa Paul in chuontho angjet ah Christian ngai ringnalam minchunna kha aleipeii (12:1–15:33)
4. Ama'n Rome koisuok suungnga kaom mi rakip diang inpaakna chong angjet ape-ah Rome larik hi minhek na anei (16)
1
1 Christa Jisu suok, tirton khat-um chongkahoi karilsik-ah Pathian in ikadang khat-um ikoi, Paul kei'n kimajia eii.
2 Chong inthiangnga lei-injia angnga, akasootthei aphamatiang Chong kahoihi Pathian in ama chongkachoi ngaidiang makheiya chong inkhitna-ah ileipeii ejei. 3 Khawa khachu ama sapa eini Pumi Jisu Christa jarra eii, ama miring taksa sik-ah David phungrui makheiya injuonei. 4 Halli ama inthiang Pathian changna khachu ama'n ranak kaneitak-ah kathi makheiya ahongring nakhan amahi Pathian sapa eii tia anaminmujei. 5 Ama makheiya Pathian in kei kadiang Christa sikbeiya tirton enasik-ah anapejei, khawakhachu Phungli zaat mi rakip ngaihi ngamna khat-um chongkajui tiang lamkeinasik eii. 6 Hiwahi Jisu Christa mi enasik-ah Pathian in ikoisuok ngai karra Rome ma kaom nangni-um ning-incheljei.
7 Khawajarra Pathian in iminriang ama ami inthiang kachang sik-ah ikoi Rome ma kaom nangni rakip sik-ah kiheimajia eii,
Nipa Pathian khat-um Pumi Jisu Christa diang makheiya, riangwai khat-um kadai kha nangnidiang omrase.
Minpaak nasik-ah Pathian Kani
8 Mansakhet-ah, Jisu Christa diangnga inphut nangni rakip sik-ah Ka Pathian kha kaminpaak, ajarchu nangni in-ngamna kha manmasituol rakip in innajetpi jei. 9 Pathian sapa chongkahoi karilna chungnga kamalung pumpuiya sepa katho, chong kadik karilna chungnga Pathian in sakhi eii, halli nangni rakip kana-ngaidon tihi Pathian in ajet. 10 Khale inruoiya Kei'n apha rakip-ah Pathian diang kanichak, Pathian lungdou e-inchu kahoitak-ah kei'n nangni koolla heiwa mator kate. 11 Ajarchu Ratha lamtiang rawaanhi nangnidiang napeya nangni kha naminngarnasik beiya kei'n nangni kha kanamuzootthei jei. 12 Khawa khachu, nangnili kei inngamna chungnga inkhat le inkhat nin-angrip tina malung insoknasik-ah kiril eii.
13 Ule naingai, aleiilaak zaatlop ngai karra ratha kikhoom angnga nangni karra-um ratha kikhoomhi kamanuom. Halli kei'n nangni koolla woi-angjet heiwanasik-ah kangaidon, takkha hiwa thonasik-ah kathamak khat-in anakhan tihi ngaidonru. Chuon 19:21
14 Ajarchu Greek li Greek ka-emak ngaidiang, kasing khat-um kamo ngaidiang halli hiwa mi rakip ngaidiang kei'n thodan kasuok loubaak kha kala-intuol. 15 Khawajarra kei'n Rome ma kaom nangni diang-um chongkahoi hi karilzoottheiya kaom.
Chongkahoi Ranak
16 Tichu, kei'n chongkahoi sik-ah injakmong, ajarchu hiwahi kangamna miring rakip in, sanminringna munasik-ah Pathian ranak kha eii, mansakhet-ah Jihudi ngaisik khat-um zaatlop ngaisik eii. Mk 8:38
17 Tichu Pathian in mi ngaikha amale akadik kha angtho thoa amin-eme tikha chongkahoi in amalar, halli hiwahi inphutna makheiya insuona katung inngamna jarra eii. Chong inthiangnga inleimajia angnga, “Pathian diangnga akadik imin eii mi seng-in inngamna khan inringsik eii.”* 1:17 inngamna dungjuiya Pathian diang kadik ah kaom in ringna aneisik eii, emakli Pathian diang kadik ah i-om dungjuiya inngamna ah aring sik eii.Heb 2:4
Manmasi ngai Thamakna
18 Miringngai manu khat-um inthamakna rakip halli inmani dikmakna lamma akadik kha minjetmak nasik-ah kakhar kapeii inmani chungnga Pathian raangna kha marwaan makheiya ajuomalar jei. 19 Pathian in inmani kha arachaak, ajarchu Pathian jarra angme jetsik kasuok rakip kha inmani diang aminmu jei, halli Pathian tak-innum inmani diang inthiangnga inlarpi jei. 20 Pathian in Manmasituol abool laiya inphut ama diangnga nimumatormak kul ngai khachu, hektik kaboi ranak khat-um ama Pathian changna omchan ngaihi inthiangnga nimujei, halli ama ibool rakip kha inmani'n injet, khawajarra hiwa mi ngai'n inlitthei nasik iteii ommak. 21 Inmani'n Pathian kha injet innum, Pathian kha khoya leithomu khat-um inmani'n leiminpaakmu. Khawa rathuulla inmani ngaidonna ngaikha anemna kaboi lei-ejei, halli inmani kamo malungroon kha kaziing in leisipjei. Eph 4:17,18
22 Inmani'n inti kasing kin-eii, takkha inmani kha ka-am khet inlei eii. 23 Akathi kaboi Pathian kha chubei intho rathuulla manmasi ngai kut-ah inbool kalathisik mi, wa emakli sa, emakli wonna intoot khouring ngai ramil kha chubei intho. Innidan 4:16-18
24 Han, Pathian in hiwa mi ngaidiang inmalungnga inngaidon kathamak inthozoot kha thonasik-ah azootpijei, halli inmani karra jakna kaomthei chuon ngaikha intho. 25 Inmani'n Pathian jarra akadik kha maleiseiya inminthuul, angrakip kaboolpa Pathian kha chubei thosik rathuulla ama kutbool phur ngaikha chubei khat-um sepa intho, Pathian hi kumsoot-ah minpaak sik eii. Amen.
26 Ajarchu inmani'n hiwa inthojarra, Pathian in inmani diang jakna kaomthei taksa imanuom kha apeii, halli a-ngai dungjuiya numeisale pasal in inlopsik kasuok taksa lamma inlopmuwa tho-ngai ka-emak numeisa li numeisa inlopjei. 27 Hiwa angnga pasal ngai innum numeisale inlopsik kasuok kha inlopmuwa pasal li pasal inlop-ah tho-ngai ka-emak jakna kaomthei chuonkha inkhatli inkhat diang intho, khawajarra inmani'n akadikmak chuontho chungnga rahoi kasuok rachaakna kha inmujei.
28 Ajarchu khawa mi-ngai'n Pathian jarra kadik jettheina kha inmalungnga dasik-ah manuommu, halli Pathian in inmani diang malung kathamak ipe kha eii, khawajarra inmani'n thomaksik chuonkha intho. 29 Halli inmani diang kathamak rakip in asipjei, khawa ngai khachu, kathamak, kakaraam, omchan kathamak, kara-ot, mikathat, insuol-inkhal, maleisei karil, khat-um inhal in aleisipjei, halli mi kathamak-ah karil, 30 khat li inkhat kathamak-ah karil, Pathian ka-enzootmak,† 1:30 Pathian ka-enzootmak, mi khoya kathomak; emakli Pathian ka-enzootmak khat-um mi khoya kathomak. mi khoya kathomak, atheinuoa inpaak, in-or, halli inliansak, kathamak thonasik-ah ka-entok, khat-um anu apa chong kajuimak, 31 katha kase kajetmak, chong inkhitna kamakoi, mi ngaidiang minriangna li maritna neimujei, 32 Halli inmani'n injet Pathian Dan in hinti, hinnakati chounkatho mi ngaikhachu kathi sik-ah rahoisuok, takkha inmani'n inmasonna inthobit ema-ah mi ngai'n hiwa chuon ngaihi inheithopha khannum inmani'n zootpina innei.