JOHN
Inni Huuina Chemajia
Chonglamsaat
2 John chemajia hi tirton John in Christa inneisuonuk kum 90 pheiwei ileimajia eii. John apumtak in larik kamajiapa ka-eii tia malarmak, khawa rathuulla ama'n upa inkhat ka-eii tia alei inkoi. 2 John na nimu chong rakip ngaihi John dungjuiya Chongkahoi suungnga nimu chongngai khale innaitheiya nimu. Arei etheiya John chemajia ah nimuchu, Jisu'n inkhatli inkhat inriangru iti Jisu chongpeii kha ama niminriang halli achongpeii ngai nijui tina eii (2 John 1:5-6, John 15:9,10). John in John dungjuiya Chongkahoi khat-um chemajia inthum ngai 1 John, 2 John, 3 John hi ama'n Ephesus ah aomlaiya inmajia eii tia ingamna.
John in hiwa chemajia hi inkadang numeisanu khat-um hiwa numeisanu sangai diang irilpi kha eii. Ama'n koisuok diang iril ka-ang eii. John in hiwa chemajia amajiana ajarchu koisuok diang masokna khat-um kadikmak ocha ngaidiang chongmakhaina eii.
Asuungnga kaom Chong
1. Hiwa chemajia hi John in tu-ngai sikme tia amalar halli chemajia karalaangsik ngaidiang minpaakna amalar (1:1-3)
2. Koisuok diang masokna khat-um kalokkhet chongpeii kha inmani diang minjet tharna anei (1:4-6)
3. Halli inmani diang kadikmak kaminchu ocha ngai jarra chongmakhaina (1:7-11)
4. Insuona chong (1:12-13)
1
1 Upa ka-eii—
Kei'n, inthiangnga kiminriang Pathian ikadang numeisanu li ama sangai diang,* 1:1: numeisanu li ama sangai: hiwa hi koisuok khat-um ami ngai tina kha eii (ateelmun 4,5 ah nimu) halli keibit emong takkha akadik kajet mirakip innum nangni kha innaminriang. 2 Ajarchu akadik kha einidiang aom halli einidiang hektik kaboiya aomchaksik eii.
3 Apa Pathian khat-um Asapa Jisu Christa'n riangwai, minriang khat-um kadai ngaihi kadik li minriangna ah einita erase.
Kadik li Minriang
4 Apa Pathian in einidiang inajuopeii chongpeii dungjuiya nangni ningsa lekkhat in kadik ah inringnga inom tihi kajetpha khan kei'n angtuk rokna kineime. 5 Minriang kaom numeisanu, Atuun makheiya inphut eini rakip inkhatli inkhat inriangtui tia kei'n kanani. Hiwahi kei'n nangnadiang akathar chongpeii kimajia emak, takkha hiwa chongpeii hichu inphutna makheiya einidiang kaleiomsa kha-eii. Jn 13:34; 15:12,17
6 Minriang tinachu hi eii; eini rakip ama chongpeii ngaikha chongkajuiya niringsik eii. Inphutna makheiya nangni'n ning ijet ama chongpeii khachu, nangni'n inriangnga ningringsik eii.
7 Maleisei karil angjet manmasituol pumpuiya inleengnga inomjei, Jisu Christa kha miring taksa ah ajuo-inlar tia kazootmak miring rakipkha maleisei karil khat-um Christa Inhalpui mi in-eii. 8 Khale inruoiya eini† 1:8: eini: larik lekkhat achu nang. chuonleitho rakipkha mangmaknasik insingthei inlang omru, halli nangni'n chan kha kasip ah ningmusik eii.
9 Atu ka-ang Christa minchunna makheiya kajuimak khat-um hiwahi rakaanna kasi mi kha, Pathian kalakeiluutmak mi in-eii. Halli atu ka-ang hiwa minchunna ah karing mi kha, Apa khat-um Asapa inni-reella kakeiluut mi kha in-eii. 10 Halli atu ka-ang in hiwa minchunnahi choileiya nangnadiang aheiwa inchu, inmani kha nangni inna leikeiluut maru, halli “Kadai in naompuirase” iti chong hium tipimaru. 11 Halli atu ka-ang in inmani kadon mi kha inmani kathamak chuontho khan ama innum ithopui suom ejei.
Ahekna Chong ngai
12 Kei'n nangnidiang kimajiazoot khachu katamtak aom, takkha kei'n cheii li muk ah majiasik hi manuommong, khawa rathulla kei'n nangni ngai rakip najuopha ah meel li meel inmu ah inbiaksik tia inngamna kada, khawa e-inchu eini rokna hi pui tungjeite.
13 Niminriang numeisanu sangai'n‡ 1:13: Niminriang numeisanu sangai'n: Hiwa kamajiapa koisuok suungnga kainchen mi lei echa tiya aminjet. inmani inpaakna kha nangnidiang inhei mathuon.