1 Rix ri rix achel ch'utik valc'ua'l, nintz'ibaj-e re' chive, richin chi man ti'en mac, pero si c'o jun nika pa jun mac, c'o Jun ri nich'o chikato'ic chuvech ri Dios,* Ro. 8:34; 1 Ti. 2:5; He. 7:25. y ri' ja ri Jesucristo ri choj pa ruvi' ronojel. 2 Ja rija' ri xyo'ox chuvech ri Dios chi sipanic richin xcamises pa kaq'uexel richin x-an perdonar ri kamac,* Jn. 1:29; Ro. 3:25; 1 Jn. 4:10. y man xe ta ri kamac roj, ja jun quimac conojel vinak choch'ulef. 3 Y si nika'an ri nu'ij ri ru-mandamientos* Jn. 14:15. ri Jesucristo, chiri' nik'alajin-vi chi keteman ri runo'oj. 4 Si c'o jun nu'ij: Yin veteman runo'oj,* 1 Jn. 3:6. nicha', y xa man nu'on ta ri nu'ij ri ru-mandamientos, xa jun tz'ucuy tzij,* 1 Jn. 1:6. y man uc'uan ta roma ri kitzij. 5 Jac'a ri (rajovabel, ru-amor) ri Dios tz'akat nik'alajin pa ránima ri nibano ri nu'ij ri ruch'abel.* Jn. 14:23. Y tok quiri' nika'an, chiri' nik'alajin-vi chi xa jun kabanon riq'uin ri Dios.* 1 Jn. 4:13. 6 Ri ni'in chi man nuya' ta can chi xa jun ránima rubanon riq'uin rija',* Jn. 14:23. nic'atzin nik'alajin chi ri ruc'aslen achel rubanic ruc'aslen ri Jesucristo.* Mt. 11:29.

7 Vacami c'a, rix ri junan kaniman ri Jesucristo iviq'uin, ri nintz'ibaj-e yin chive, man c'ac'ac' ta chi mandamiento.* 1 Jn. 3:11; 2 Jn. 5. Re' xa can yo'on-vi-pe pan ivi' xe pa na'ey, roma ri mandamiento re' ja mismo ri ch'abel ri ivac'axan-pe xe pa na'ey. 8 Pero c'o che'el nika'ij chi ri mandamiento re' c'ac'ac',* Jn. 13:34. roma xk'alajin c'ac'ac' ruchuk'a' riq'uin ri Jesucristo y quiri' mismo iviq'uin rix. Quiri' nin-ij chive, roma ri k'eku'n ja nuc'ol-e-ri' y ri kitzij sakil nik'alajin chic.* Jn. 1:9; 8:12; Ro. 13:12; Ef. 5:8.

9 Xa achique na ri ni'in chi uc'uan roma ri sakil, y c'a itzel na nutz'et jun chic ri junan quiniman ri Jesucristo riq'uin,* 1 Jn. 3:10, 16. jari' retal chi c'a uc'uan na roma ri k'eku'n. 10 Ri yerojo' ri junan quiniman ri Jesucristo riq'uin, kitzij chi uc'uan roma ri sakil, y man nu'on ta ri nibano chique ch'aka' chic chi niquil jun roma chi niquixutuj can ri Jesucristo.* Jn. 11:9; 2 P. 1:10. 11 Jac'a ri itzel nitz'eto jun ri junan quiniman ri Jesucristo riq'uin, xa uc'uan roma ri k'eku'n, y pa k'eku'n nibin-vi, y nis-ta reteman achique lugar benak-vi,* Jn. 12:35. roma ja ri k'eku'n tz'apiyon ri ruvech.* 2 Co. 4:4.

15 Man ti'e ivánima pa ruvi' ri roch'ulef,* Stg. 1:27. nis-ta pa ruvi' ri achique c'o chuvech, roma si c'o jun ni'e ránima pa ruvi' ri roch'ulef,* Stg. 4:4. jari' retal chi man nrojo' ta ri Katata' Dios pa ránima. 16 Roma ronojel ri achique c'o choch'ulef, ri man utz ta ri nurayij ri ka-cuerpo,* Ro. 13:14; Ef. 2:3. ri man utz ta ri nurayij ri kavech, y ri nikana-ki' chi can c'o kak'ij, ronojel re' man riq'uin ta ri Katata' Dios petenak-vi, xa richin ri roch'ulef. 17 Y ri roch'ulef xa niq'uis y ronojel ri man utz ta ri yerayix chuvech.* 1 Co. 7:31. Jac'a ri nibano ri nrojo' ri Dios, xtic'uje' ruc'aslen richin jumul.* Sal. 125:1.

18 Rix ri rix achel ch'utik valc'ua'l, jare' ri ruq'uisbel tiempo xukila',* Ro. 13:11; 1 Ti. 4:1. y rix ivac'axan chi xtipe jun ri xticataj chirij ri Jun ri takon-pe chucolic rutinamit ri Dios.* Mt. 24:5; 2 Ts. 2:3. Y vacami eq'uiy ri quiri' ecatajnak-pe, y romari' keteman chi rojc'o chic chupan ri ruq'uisbel tiempo. 19 Rije' chikacojol roj ri kayo'on kánima riq'uin ri Jesucristo xe'el-vi-e, pero rije' man jun bey xquiya' cánima riq'uin. Xa ta xquiya' cánima riq'uin, man ta xe'el-e chikacojol. Pero xe'el-e richin xk'alajin-pe* 1 Co. 11:19. chi man conojel ta ri yec'uje' chikacojol niquiya' cánima riq'uin.

20 Jac'a rix c'o (ruk'ejon, ruk'ijon) pan ivánima* Is. 44:3. ri Jun ri can lok'olaj vi,* Jn. 14:26; 16:13. y romari' iveteman chic ronojel ri nic'atzin chi nivetemaj. 21 Man roma ta chi man ta iveteman ri kitzij tok nintz'ibaj re' chive, man quiri' ta, xa roma iveteman chic,* 2 P. 1:12. y roma iveteman chi nis-ta jun tz'ucun tzij petenak riq'uin ri kitzij.

22 Y, ¿(achique, achucu'x) ri' ri tz'ucuy tzij? Ri' ja ri ni'in chi mana-ta ri Jesús ri takon-pe chucolic rutinamit ri Dios.* 1 Jn. 4:3; 2 Jn. 7. Ri ni'in quiri', nicataj chirij ri Jesucristo y nuya' can rij chuvech ri Katata' Dios, y chuvech ri Ruc'ajol. 23 Xa achique na jun ri nuya' can rij chuvech ri Ruc'ajol ri Dios, nis-ta ri Katata' Dios c'o pa ránima. Jac'a ri nuk'alajrisaj-ri' chi ruyo'on ránima riq'uin ri Ruc'ajol ri Dios, ja jun ri Katata' Dios* Jn. 14:7. c'o pa ránima.

24 Romari' rix, tic'uje' jumul pa tak ivánima ri ch'abel ri xivac'axaj xe tok xinimaj ri Jesucristo. Roma si nic'uje' jumul pa tak ivánima ri ch'abel ri xivac'axaj xe tok xinimaj, man xtiya' ta can chi xa jun ivánima ibanon riq'uin ri Ruc'ajol ri Dios y riq'uin ri Rutata'.* 2 Jn. 9. 25 Y rija' c'o rusujun can chike, y ri' ja ri c'aslen ri richin jumul.* Jn. 17:3.

26 Ronojel re' nintz'ibaj-e chive, coma ri vinak ri niquicanoj achique ta niqui'en richin niquisetz ino'oj.* 2 Jn. 7. 27 Jac'a rix, man jun bey xtel-e iviq'uin ri (k'ejon, k'ijon) pan ivánima roma ri Jesucristo, y romari' man nic'atzin ta chi c'a c'o na jun nitijon ivichin. Ri (k'ejon, k'ijon) pan ivánima, jari' ri nic'utu ronojel chivech* Jn. 14:26; 16:13. y can kitzij vi ri nuc'ut y man tz'ucun ta tzij. Romari' tibana' achel ruc'utun chivech, jumul xa jun ivánima tibana' riq'uin ri Jesucristo.

28 Y vacami c'a, rix ri rix achel ch'utik valc'ua'l, man jun bey tiya' can chi xa jun ivánima ibanon riq'uin ri Jesucristo, richin quiri' tok xtuk'alajin,* 1 Jn. 3:2. cukul kac'u'x riq'uin,* 1 Jn. 4:17. y man xa chuvi' q'uix nkujel-e chuvech, tok xtuka. 29 Y si iveteman chi rija' choj* Hch. 22:14. pa ruvi' ronojel, quiri' mismo tivetemaj chi conojel ri quic'uan jun chojmilaj c'aslen, eralc'ua'l chic ri Dios.