34
Nnagageinga o tenua
1 Dimaadua gaa wanga gi Moses 2 nnelekai aanei ang gi digau Israel, “Goodou ma ga ulu adu gi Canaan, di gowaa dela e gowadu ko Au gi goodou, nia hagageinga taalinga godou henua le e hai beenei: 3 Tagageinga di bahi i ngaaga le e daamada mai di Anggowaa go Zin e hana i taalinga tagageinga o Edom. E daamada i dua i di mada ngaaga di Tai Mmade, 4 gaa huli gi baahi ngeia gi di Ala Nnoonua o Akrabbim, ga hanadu hua igolo laa lodo o Zin gi ngaaga adu gi Kadesh-Barnea, ga huli adu beelaa gi baahi dai-ngeia adu gi Hazar-Addar, ga hanadu gi Azmon, 5 di gowaa dela ga huli adu gi di gowaa baba o tagageinga o Egypt, ga haga odi gi muli di Tai go Mediterranean.
6 “Tagageinga di bahi i dai la dela go di Tai go Mediterranean.
7 “Tagageinga di bahi i ngeia le e daudali di laini mai di Tai go Mediterranean gaa hana gi di Gonduu Hor, 8 tugi i golo gaa hana gi di Ala Nnoonua o Hamath. E hanadu hua igolo gi Zedad 9 mo Ziphron, ga haga odi gi muli i Hazar-Enan.
10 “Tagageinga di bahi i dua e daudali hua di laini mai Hazar-Enan e hana gi Shepham. 11 Ga hanadu gi ngaaga gi Harbel* Harbel be go Riblah, i bahi i dua o Ain, gaa hana hua igolo gi nia dama gonduu i bahi i dua tongo tai di Tai o Galilee, 12 ga hanadu labelaa gi ngaaga i taalinga di monowai Jordan, ga haga odi gi muli i di Tai Mmade.
“Aanei go nia hagageinga o nia daalinga e haa o di godou henua.”
13 Moses ga helekai gi digau Israel, “Deenei tenua e hudihudi go goodou e hai mee ginai, go tenua a Dimaadua ne haga ingoo gi nia madawaawa e hiwa mo di baahi. 14 Nia madawaawa Reuben mo Gad mo di baahi i dua di madawaawa Manasseh la guu kae nadau gowaa, ne duwwe gii hai be nadau madahaanau, 15 i bahi i dua Jordan, huudonu mai Jericho.”* Joshua 14.1-5
Nia dagi ala belee duwwe tenua
16 Dimaadua ga helekai gi Moses, 17 “Eleazar, tangada hai mee dabu, mo Joshua, tama daane a Nun, la gi duwwe tenua gi nia daangada. 18 Gaamai labelaa di tagi e dahi mai di madawaawa e dahi e hagamaamaa e duwwe di maa.” 19-28 Aanei nia daane ne hilihili go Dimaadua:
| Nia madawaawa | Nia dagi |
| Judah | Caleb tama daane Jephunneh |
| Simeon | Shelumiel tama daane Ammihud |
| Benjamin | Elidad tama daane Chislon |
| Dan | Bukki tama daane Jogli |
| Manasseh | Hanniel tama daane Ephod |
| Ephraim | Kemuel tama daane Shiphtan |
| Zebulun | Elizaphan tama daane Parnach |
| Issachar | Paltiel tama daane Azzan |
| Asher | Ahihud tama daane Shelomi |
| Naphtali | Pedahel tama daane Ammihud |
29 Aanei nia daane a Dimaadua ne dongo bolo e duwwe nia gowaa ang gi digau Israel i lodo tenua go Canaan.