Salmo 73
73
Din Kinalinteg Diyos Ya Din Pantongpalan Di Lawa Ay Ipogaw
1 Siged tet-ewa di iyat Diyos sin Israelita,
kosto di iyat na sin nalinis di nemnem na.
2 Ngem istay makaan di pammatik ya talek ko
3 gapo kayman si apos ko.
Tan ilaek yan mayat di biyag da,
din natangsit ya lawa di ogali na.
4 Adi da manligligat tan nasalon-at da.
5 Maga abe di lawa ay mapasamak en daida
ay kaman din laklak-amen di gagait da.
6 Isonga ipapaila day kinatangsit ya kedse da
ay kaman kowintas ono mapteng ay inbabado da.
7 Napno di nemnem das lawlawa
ya pag kedse di panggep da.
8 Sis-iyekan da di iib-a da ya mankalkali das lawa.
Begew sin kinatangsit da, egyaten da din gagait da.
9 Mankalkali das maikontra en Diyos ed daya,
ibaabaa da abe din iib-a da isnan daga.
10 Isonga olay din ipogaw Diyos et bigbigen das daida
yan patien da ay dagos din lawa ay ibagbaga da.
11 Dowan da et kanan, “Laton ay adi maammoan
en Diyos ay Kangatoan.”
12 Siya na di kasasaad din mangam-amag si lawa:
magay ligat da yan kankanayon ay bomakbaknang da.
13 Maga ngarud di silbin di nangan-annadak
ta maga koma di bomasolak,
14 tan inag-agew ay mapaligatak,
kankanayon ay madosaak.
15 Mo inbagak dana ay ninemnem ko,
kamanak linipotan din ipogaw mo.
16 Pinadas ko na ay nemnemen,
ngem palalo ay naligat para en sak-en,
17 enggana ay sinenggepak sin Timplo ay panbeeyam.
Asiak naawatan din en da pantongpalan.
18 Di katet-ewa na, kaman mon inpeey daida si manngaotoy ay danan
et inturong mo si en da kadadaelan.
19 Sinkaattikan et madosa da,
kaeegyat di kateyan da.
20 Iitaw di arig da
ay mo bomangon ka yan malinglingan da.
21 Sin timpo ay mansaksakit din nemnem ko,
22 Animal di arig ko
ay adi makaawat en sik-a ay Apo.
23 Ngem olay mo siya di, intakkayam din kannawan ko
et wadaak ay kanayon sin sag-en mo.
24 Itdom di amagek babaen sin bilbilin mo,
et sin omawatam sin tapin di agew yan way dayaw ko.
25 Magay odom si anapek mo adi et sik-a
ed daya ya isnan daga.
26 Olay mo komapoy nan awak ya nemnem ko,
sik-a ay Diyos di mangidawat si bikas ko,
sik-a et anggoy di kapkapoan di masapol ko.
27 Din addawi en sik-a, awni man et mapospos di biyag da.
Siya abe sin manokog en sik-a
ta natken ay diyos di pansilbian da,
Tan dosaem daida et matey da.
28 Ngem mo sak-en pay, Yahweh ay Diyos ko,
malaylaydanak ay mantee sin sag-en mo.
Sik-a di pinilik ay salaknib ko
et dad-atek din am-in ay inam-amag mo.