Salmo 49
49
Pamagbaga Maipanggep Si Kinabaknang Ya Kateyan Di Ipogaw
1 Amin ay ipogaw isnan daga,
dengngen yo nan enak ibaga,
2 olay nangato ono nababa ka,
baknang ono nabiteg ka.
3 Mangidawat si sirib di bomala sin tepek ko,
naoneg di panakaawat ko.
4 Estek ay mannge si esa ay pamagbaga
yan ilawlawag ko di olog na
dowanak toktokaren din arpa.
5 Adiak emegyat sin timpon di ligat ko
mo lomikob din makedse ay kalaban ko.
6 Mantalek da sin kinabaknang da
ya it-it-ek da din sanikwa da.
7 Adi kabaelan di ipogaw ay mangsobot sin awak na,
adi na mabayadan en Diyos din biyag na.
8 Tan din bayad di biyag et palalo ay nangina,
magay omanay si ibayad da
9 ta matago da si eng-enggana
et sin pese yan mailisi da.
10 Ammon di amin ay olay din masirib et matey da
ay kaman din naong-ong ya magay nemnem na.
Daida am-in yan taynan dan kinabaknang da,
et tawiden di aan-ak da.
11 Say beey da si eng-enggana din naiponponan da,
olay pay mo way bokod da ay daga
sin deda ay matmatago da.
12 Adi mailisi di ipogaw sin kateyana
gapo sin kinabaknang na.
Kaman met laeng animal ay matey sisya.
13 Siya nay pantongpalan di mantalek si awak da
ya mapnek sin kinabaknang da:
14 naitoding ay matey da, karneroy kaiarigan da.
Din pese, kaman say mangipaspastol en daida.
Awni et abaken din nalinteg ay ipogaw si daida,
madonot awak da sin kaiponponan da
ay addawi sin maptemapteng ay beey da.
15 Ngem mo sak-en pay, omisalakan si Diyos Apo,
tan sin panakabalin di pese sobotena din biyag ko.
16 Isonga mo waday bomaknang,
adi ka emegyat ono mariribokan,
olay mo din kinabaknang na yan mataptapian.
17 Tan mo matey, maga polos di itakina,
adi na ikoyog sin kaot din kinabaknang na.
18 Olay mo mapnek sin biyag nas nan daga
yan idaydayaw di iib-a na begew sin kabaelana,
19 awni et maitapi met laeng sin aap-o na
et adi na polos maila di pat-a.
20 Din kinabaknang yan magay maamag na
ay mangilisi si ipogaw sin kateyana.
Kaman met laeng animal ay matey sisya.