Salmo 46
46
Din Manakabalin Ay Diyos Ay Manalaknib En Datako
1 Si Diyos di pankamangan ya mangipabikas en datako.
Kankanayon ay bomadbadang mo waday problema tako.
2 Adi tako ngarud emegyat ay iib-a,
olay mo mayegyeg din nay ay daga
ya din dontog makosokos da
ay emey sin lanad di baybay ay annawa.
3 Olay abe mo napigsa din dalloyon
ya din dontog et pag dan magon-gon.
4 Ngem wada pay di ginawang ay man-ay-ayos
ay mangidawat si ragsak di ipogaw sin siyodad Diyos.
Man-ay-ayos ay emey sin beey Diyos ay Kangatoan
ay siya din Timplo na ay nasantoan.
5 Wada si Diyos sin siyodad ay sana,
et adi nan itolok ay dadaelen da
mo adi et masapsapa ay salaknibana.
6 Magolo din kailiili begew sin egyat da,
ya din aari ay manturturay et maabak da,
tan mankali si Diyos yan kaman kido di kali na,
et kaman matenaw din nay daga si egyat na.
7 Si Diyos ay Ap-apon di Sosoldado et wadan datako,
si Diyos ay dinaydayaw Jacob et say pankamangan tako.
8 Omali kayo et ilaen yo san inam-amag na,
din kaeetnga ay inam-amag Diyos isnan daga.
9 Pasaldengen Diyos din gobgobat isnan lota,
potlongena din gayang ya pana,
din kasay abe yan pooana.
10 “Kosto sa! Isaldeng yo!” kanan di Apo.
“Nemnemen yo ay sak-en di Diyos yo.
Bigbigen di am-in ay ipogaw ay sak-en di kangatoan.
Am-in ay nasyon yan enak iturayan.”
11 Si Diyos ay Ap-apon di Sosoldado et wadan datako,
si Diyos ay dinaydayaw Jacob et pankamangan tako.