Salmo 147
147
Kanta Ay Pangdayaw En Diyos Ay Manakabalin
1 Madaydayaw din Apo!
Mayat ay mankanta si pangidayaw en Diyos tako,
lebbeng na ay idayaw sin kanta din Apo.
2 Itaolin Diyos sin ili da
din naipaaddawi ay Israelita
et kasinan saaden
din siyodad ay Jerusalem.
3 Panragsakena din palalo ay madisdismaya,
ya papigsaena kasin di nemnem da.
4 Din tatalaw et inkeddeng na di kaad-ado da,
nginadanana amin daida.
5 Si Yahweh ay Diyos tako et nangato ya manakabalin sisya,
magay lokod di kinalaing na.
6 Ikalintegana ya ayowanana din napakombaba,
ngem itpig na sin tapok din laway nemnem na.
7 Mankanta ya man-gitara tako
ay man-iyaman sin Diyos tako.
8 Komotana si liboo ed daya,
idawtana si odan din daga,
din logam sin dontog yan pagabayena.
9 Idawtana din animal si kanen da
ya din koyat di gayang mo mankedaw da.
10 Baken say panlaydan din Apo
di napigsa ay kabayo ya natoled ay soldado.
11 Ngem say panlaydana din mangipateg en sisya
ya mantalek sin adi manbalbaliw ay layad na.
12 Dakayo ay man-ili ed Zion ono Jerusalem,
si Yahweh ay Diyos yo di en yo dayawen.
13 Paknegena din liteb di siyodad yo
ya bindisyonana din an-ak yo.
14 Pawadaena di talna sin intiro ay ili yo,
mansobsobray makan ay idawat nan dakayo.
15 Ibaga na din bilina
et maammoan ay dagos sin intiro ay daga.
16 Kaman galey din andap ay iaplag na,
kaman tapok ay isapowak na.
17 Kaman bato di dalalo ay egasena,
magay makaitoled sin teg-in ay pawadaena.
18 Matenaw din andap ya dalalo mo ibilina,
et man-ayos din kinmenteg ay danom mo pandagemena.
19 Inpaammo na din bilina sin ipogaw na ay Israelita.
20 Magay odom ay nasyon ay nangamaganas na,
adi da ammo din linteg na.
Madaydayaw din Apo!