Salmo 20
20
Kararag Ta Pangabaken Diyos Din Ari
1 Sapay koma ta patgan Diyos din kararag mo
sin timpon di ligat mo.
Si Diyos ay dinaydayaw Jacob, salaknibana komas sik-a.
2 Manipod ed Zion sin Timplo na,
padatngena koman sik-a din badang na.
3 Sapay koma ta am-in ay datdaton mo yan nemnemena,
malaydan koma sin animal ay mapooan ay idaton mon sisya.
4 Sapay koma ta idawat na din laydelaydem
ya matongpal am-in ay planom.
5 Ibogaw mi di ragsak mi mo mangabak kan to,
ingato mi din bandila tako
ta idaydayaw mi si Diyos Apo.
Sapay koma ta patgana am-in ay kararag mo.
6 Ed wani, ammok ay pangabaken Diyos din ari ay pinili na.
Ed langit ay nasantoan ay kad-ana,
songbatana din kararag di pinili na,
et pangabakena babaen sin panakabalina.
7 Din odom yan mantalek da sin para gobat ay kalisa da,
din odom yan mantalek da sin kabayo da,
ngem datako pay yan mantalek tako
sin panakabalin Yahweh ay Diyos tako.
8 Da doy ay ipogaw et maisokba da,
ngem datako pay, napigsa tako ay pomika.
9 Apo, pangabakem koma din ari
ya patgam koma mo mankararag kami.