1 Kanan Diyos, “Pan-ipigsam ay mangibogaw ay mangipaammo sin ipogaw ed Israel sin basbasol da. 2 Innagew ay mandaydayaw dan sak-en ay kaman dadlon tet-ewa ay layden da ay mangammo sin panlaydak. Et kaman da iman nalinteg ay nasyon ay managtongpal sin bilbilin di Diyos da. Tan kanan da en idawtak daida si kosto ay linteg ya malaydan da ay mandayaw en sak-en.”

3 Kanan din ipogaw ay mansalodsod, “Sinoy silbi na ay itpe mi di dagaang mi ya ibaba mi din awak mi? Tan adi ka met laeng ikaskaso mo say amagen mi di.”

Ngem kanan Diyos ay sombat, “Di katet-ewa na, sin agew ay pangit-itpean yo si dagaang yo yan din bokbokod yo ay pansigdan di nemnemnemen yo met laeng. Palpaligaten yo abe din pan-ob-oblaen yo. 4 Sin pangit-itpean yo si dagaang yo yan mabonget kayo sin gagait yo ya man-iibaw kayo ya dowan kayon man-asidespeg. Ay kanan yo en malaydanak ya dengngek din kararag yo sin pangam-amagan yos di? 5 Sin pangit-itpean yo si dagaang yo, manyakog-ong kayo ay kaman logam. Iaplag yo di sako ay pey-an yos dap-o yan say bomaktadan yo. Ay siya di di kosto ay iyat ay mangitpe si dagaang? Ay kanan yo aya en malaydanak isdi ay am-amagen yo?

6 “Siya na di laydek ay amagen di mangitpe si dagaang: Isaldeng yo ay mamalpaligat si iib-a yo ya manosowitik en daida. Wayawayaan yo din mapalpaligat. 7 Ibingayan yo sin kanen yo din mandagaang ya padagosen yo din nabiteg ay magay beey da. Badoan yo din magay bado na yan adi yon ipaidam din badang yo sin aag-i yo.

8 “Mo say amagen yo di, din bindisyon ko et kaman segit sin agsapa ay maneysey-ang en dakayo et maganno ay mapey-an din sogat yo. Kaman mangon-ona ay mangipango en dakayo din kinalinteg yo ya din mankoniniing ay kinadiyos ko di manalaknib abe sin likodan yo. 9 Et mo mankararag kayo yan songbatak. Mo mankedaw kayo si badang, wadaak ay bomadang en dakayo.

“Mo isaldeng yo ay mamalpaligat, mangoy-oyaw ya mankalkali si lawa sin iib-a yo; 10 mo idawtan yo sin kanen yo din mandagaang ya idawtan yo din makasapol sin kasapolan da, awni et pomat-a ay kaman kaagawan din mabolinget ay nanlilikmot en dakayo. 11 Kanayon abe ay ipangpangok dakayo. Sin nakgang ay daga, idawat ko amin ay kasapolan yo ya papigsaek dakayo. Et kaman kayon garden ay masisibogan si obbog ay adi katkatdok. 12 Awni et isaad kasin din poli yo din nabayag ay nabakas ay ili et saaden da din nabakas ay bebbeey. Et dakayo din makwani en nangibangon sin nadadael ay alad ya bebbeey.”

13 Kanan aben Diyos, “Mo ibilang yo ay nasantoan din agew ay pan-ibbayan ya adi yon say anapen din bokbokod yo ay pansigdan sin agew ay sana, mo banolen yo et adi kayon manbiyahi, man-obla ono mankali si magay silbi na sin agew ay sana, 14 mawadan to di ragsak yo ay mansilbi en sak-en. Ipangatok dakayo sin pangilan di ipogaw sin intiro ay lobong. Lak-amen yon to din kinabaknang di daga ay indawat ko en ap-apo yo ay Jacob, tan sak-en si Diyos ay nangibagas na.”