1 Kola alino halegeya mukia mono note kava vayaene Yuta vayatamaene kahegi kema havilinaya anagaene kanisole vayaene Yisasina haesageno falisia kea huge havige huteya Yisasina nofi kiteteya ala kamani kava kanole, Pailatite avaleya ayapi motenae. 2 Motageno Pailatia Yisasifena mage huno hie “Kagaya Yuta veamogami Sauve kano mainano?” huno havigegeno Yisasia mage hie “Kagaikaa ani kea hai nehane.” huno hie. 3 Higeya mono note kava vayamoya kasagoya kea “Maa kefo kava humainane.” huya hutenae. 4 Huneatageno Pailatia nagoene mage huno hie “Havio mukia kefo yama nehana yana ali falote nehagi kagaya kenonaamia naa higeka nohane?” huno hie. 5 Hianagi Yisasia kenonaa nagola osi ke kanoa ohigeno Pailatina amayo aimaine.

6 Kafuahe kafuahe Anumaya Kotia amaugafama aligatimainea kanahe amakesa haviya imua negiyanagino Pailatia mukia ani imu kisaya kanafina nagoke nofi hutegeno nemaiya kanoa vayayagamoya haesaga huya “Agaya esie.” huya haya kanohe nofipitila “Hai hano hanagi vuo.” huno huneatea kanae. 7 Ani kanafina nago kanomo agia Palapasie kamani vayaene tuma nehaya vayaene maineno tuma haya kanafina vayala tavata nehamaeyaya vayaene mainegeya kina nopi avaleya hutenayane. 8 Hutenayanagiya vayayagamoya Pailatife mage huya me hae “Mukia imuma kina kanafima nehana kavala hulato.” huya hae. 9 Hageno Pailatia mage huno hamavige “Nagaya Yisasifena Yuta veate Sauve kanomofe ‘Hai hano hanagi vuo.’ huna hisugetama musena hugahao?” huno hamavige. 10 Higeya mono note kava vayamoya ma amakesa haviye “Mukia veala Yisasi kegeya nehaviya tagai kea nohaviye.” huteya ani yafe Yisasifena amaipamoa haviya huteteya Pailatite avaleya ageno Pailatia ani yafe agesa nehavino humaine. 11 Havianagi mono note kava vayamoya mukia vayamogami amaipa moyeya mage huya hamapaiye “Mage hutama hiho ‘Palapasina atalesanageno afaa esie.’ hutama hiho.” huya hae. 12 Hageno Pailatia vayayagahena mage huno hamavige “Ania hisuana ma kanomofe tamakaya Yuta vayate Sauve kano maine hutama nehaya kanomofena naa hutesue?” huno hamavige. 13 Hamavigegeya mukia vayamoya ala kefiti mage huya hae “Yafaga yosale nili hetama asaigeno falino.” huya hae. 14 Hageno Pailatia mage huno hamavige “Naa higetama na kea nehae? Hanaa augafa kefo kava humaine?” huno hianagi amakaya eteya aliya alapi ataleya ala kefiti mage huya hae “Yafaga yosale nili hetama asaigeno falino.” huya hae. 15 Hageno Pailatia mukia vayamoya muse hisaya kava hugahue huno Palapasina nofipiti avaleno neataleno Yisasina agata aisifa kayoteti haifu amiteno Yisasina ati vaya amayapi ateteno “Yafaga yosale nili hetama asaigeno falino.” huno hie.

16 Ati vayamoya Yisasina avaleya ala kava kanomo no haupalega umaineya mukia amakaiene nemaiya ati vayafe ke hageya emainae. 17 Emaineya Yisasina akaya ategahe “Ala kano mainane.” huya hisaya yafe ayaaya haesa kena aliya faiteteya avetanafaage nofi aliya mo aigalaki me aigalaki huya tumano kula talo huya Yisasina anute vaitenae. 18 Vaiteteya aepa heya huhaviya hutegahena mage huya hae “Felugae. Yuta vayamogami sauve kanomogae.” huya akaya atae. 19 Neateya anute kayoteti nagoene nagoene huya aikoneliya augafale amavetuna heneateya amaleya ayeya mopale maineya “Ala kano mainane” huya ayevataga vatago humainae. 20 Kigi huneateya haesa kena hateneataleteya agaia kena faiteteya yafaga yosale nili hegahe avaleya umainae.

21 Kategama vayana Saimoniene fotu humainae. Ani kanoa Sailini kumate kanoe. Alekasataene Lufasiganiene neanafae. Ani Saimonia hoyafinagati kate enevigeya ati vayamoya tokiyaage ke huya “Kaiyayeka yafaga yosa melika vuo.” huya hageno molino umaine.

22 Alino vigeya Yisasina avaleya vayaamoya Kologota kumate uvayi hae. Ani kumamo agimoa tagaiti kefina anu ayamufa kumale huya nehae. 23 Ani ati vayamoya “Haesunageno falisiana agata ai yafenagita agatama oaisia tina amisunageno nesie.” huyama hayana anima agata oaisia timo agia mea. Meaene nofi alagamo tiene nagopi ali havigu huteya aliya amiyana Yisasia ani tifena “Aao.” huno onene. 24 Onegeya yafaga yosale nili heya asaimaleteya kenaa fako huya aligahe musufa yama nehaya yokalo lageya amakasaya vayamoya alimainae.

25 Natena naeni (9) kiloki yagemoa anale hai vayi higeya Yisasina yafaga yosalela nilia maleya heteya asaimainae. 26 Asaiteya “Ma kava higeta haune.” huya kaemalenae “Mani kanoa Yuta veate ala Sauve kanoe.” huya kaeya malenae. 27-28 Kaemaleteya Yisasiene tole kanolatana vaya nehamaeana musufa yama nehaa kanolatana nago kanoa Yisasina tamaga kaiyagaa haeya asaimaleya nago kanoa haoga kaiyagaa haeya asaimaleya humainae.

29 Humalenageya katema ute ete huya agasaya vayamoya amakeya kayo aiya “Kefo kano maine.” huya kigi yokalofiti huhaviya huneateya mage huya hae “Oho kagaya ‘Ala mono nona alina lagape aitaletena tagufa (3) kanafi etena kitalegahue.’ huka nehana kano mainane? 30 Menia kagaya yafaga yosa neataleka kagaikaa elavika kaugafa aligatio.” huya hae. 31 Hageya mono note kava vayaene kahegi kema havilinaya anagaene amakaiami vayamoyaene ania huya kamuge hatageya vaineateya mohu mehu huya huhaviya huneateya mage huya hae “Nagoa vea amaugafa aligatimainegi naa higeno agaia augafa ali nokatie. 32 Kalaisiga Isaleli vayate Sauve kanoamimoga yafaga yosa neataleka elavigeta agamano. Agesunana kagaifena havita tagupi maleta tametitia hugahune.” huya huhaviya huneatageno agaienema yafaga yosalema asaimalaya musufa kanolatamoganienena ania huana Yisasina huhaviya hutenae.

33 Yagemoa euno amunokano higeno halemainea yamoa hano higeno mukia kotega tusia hanikino viaamo une kanalega eteno ali halemaine. 34 Une kanalega Yisasia ala kefiti ke huno agaia kefiti mage huno hie “Eli Eli lema sapakatani.” huno hie. Tagaiti kefina mage huno hie “Anumaya Kotinimogae, Anumaya Kotinimogae naa higeka nagaila nenatalane?” huno hie. 35 Higeya nagoa anile hetimaiya veamoya haviteya mage huya hae “Ilaiyafe ke nehigi haviho.” huya hae. 36 Hageno nago kanomoa viaamo hava koyafa kana yana alino atuage nofi alagamo tipi ayeteno alino viaamo kupaga kayote maleno ani hava koyafa kana yana kiteno “Yisasia mayu mayu huno nesie.” huno neamino mage huno hie “Agava maineta agesune Ilaiyaa yafaga yosaletila mevaleno elavisifi agegahune.” huno hie. 37 Higeno Yisasia ala kegefa huteno falimaine.

38 Faligenoa ala mono nopima ala kena ayaaya kenagefama asaimalenaya kenamoa Yisasima falia kana kanoale analeti aepa heno amunopiti hatata hulole hulavino mo talene. 39 Ati vayate kava kanomoa Yisasina aulega hetimaineno Yisasia kema huteno falia yana ageteno mage huno hie “Tamage huno mani kanoa Anumaya Koti nafanelafa maine.” huno hie.

40 Nagoa aneyaga aluale maineya agemainae. Nagoamogami amakia, osi Yemesiene Yosefegani itaanimoa Maliae Salomiagi Magatala kumate Maliaagi huya mainae. 41 Yisasia Kalilima mainea kanafina ani aneyagamoya akave vaiyatete nehuya kavela kaeya neamiyane. Mukia aneyaga Yisasiene Yelusalemu tokaeya umainaya aneyaga aluale hetiya maineya Yisasina agemainae.

42-43 Sapati yupahe haviya talo tala hisaya kanagino yagemoa lavi falegahe higeno Yosefea Alimatia kumate kanoa Yuta kanisolefi nemaiya kanoa evayi hie. Ani kanoa Anumaya Kotima kava yagaisia kanahe muse huno agava nehia kanogino kolia ohuno Pailatite viaamo mage huno havige “Yisasina augafaa aligahe nehue.” huno mo havige. 44 Havigegeno Pailatia “Aupaa ago falimainegeka nehano? Avonio namayo aiye.” huno agesa nehavino nagoa ati vayate kava yagaimainea kanohe ke higeno egeno “Yisasia ago falimaineo?” huno havige. 45 Havigegeno ati vayate kava kanomoa “E, ago falimaine.” huno higeno Pailatia Yosefena mage huno hapaiye “Kanalelagi augafa afaa moligane.” huno hie. 46 Higeno Yosefea viaamo kayo muki ayaaya kena molino viaamo augafa yafaga yosaleti alino maleneno kenaleti augafalela aigalaki kalaki huno haya kiteno alino viaamo hefalegeya kafimalenaya yafakapi Yisasina hevaiteteno avayalema aililesia yafana ayetufeno anile mo aililemalene. 47 Magatala Maliaene Yosefena itaamoa Maliaene maineana hevaitea yafa kaana agemainae.