1 Tagaya na ke hugahune? Tagaya kefo yama hisunagenoa Anumaya Kotia kayone hisuna yamaa tagaipina ala huno havatelatesie huta hisuno? 2 Na kea ohutafa huta ohisune. Kefo kava nehuna yana ago ataleta falimainea augafa veane mainone. Falimainaya veamoya kefo yana ohugahae. 3 Yisasi Kalaisiene alino tategeta aigamaeta agaiene falimainageya tima fale-latenaya kea ohavinao? 4 Tamage tima fale-latenaya yamoa Yisasi Kalaisiene aigamaeta agaiene falunageno komufina hevailategeno Nelafaa tokiya hale yamaaleti Kalaisina komufitila alino hetitenea kava huno tagaienena ali hetilateteno haegafa tahaimula tamigeta ali-mainonafe kanaleya huta haegafa auava yapi vaiyesune.

5 Tagaya agaiene aigamaeta agayama humainea kava huta faliteta ania huta agaiene aigamaeta fali-mainefiti hetimainea kava huta hetigahune. 6 Tagaya havimainone kefo yamo tokiya ago fali hano hisiafe nayoma nehavuna atafa lagu tagesa Yisasi Kalaisiene aigamaeno yafaga yosale ago fali-maineanagita tagaya kefo yamo aliya veane nagoene omaisune. 7 Fali-mainesia kanomona kefo yamoa nagoene atafa ohugahie. Hai falimaine. 8 Tagaya Kalaisiene aigamaeta fali-mainesunana ania huta agaiene fali-mainesupitila hetita maigahune huta tagupi havita malenone. 9 Tagaya ago nehavune Yisasi Kalaisia fali-mainefiti ago heti-maineafe nagoene eteno ofaligahie. Fali yamoa tokiyaa omaletafa huno omaleneafe kava yagai oategahie. 10 Nagoke yupa kanoa kefo yamo tokiya hegaseno fali-maineafe nagoene eteno ofaligahie. Haegafa haimu alino Anumaya Kotina haiya kava hisiafe maine. 11 Naa humaineafe tamakaienena ani lamakesa havi havi hutama maiho, “Kalaisi falimainea avamete nagaya ago fali-mainoanagino kefo yamo tokiyamoa nagoene kava huonategahie. Yisasi Kalaisiene aigamaena Anumaya Kotina haisia kava hisue.” hutama hiho.

12 Na yafe kefo yamoa “Ala kavatami mainoe.” huno falisia tamaugafamoa “Age haye hisia kava huo.” huno kava oyagaisie. 13 Kefo kava hisaya yafena tamaiya, tamayana, tamaulaga, kefo yamote aliyafena tamakua oamiho. Mukia Anumaya Kotina agaiage amiho. Tamakaya falimainafiti hetimainaya veane mainagi tamaugafamoa mukia kanale auava yama alisiafe Anumaya Kotina amiho. 14 Tamakaya kahegi kemoa tamaku tamamena aligatisiafe tamametitia nohagi “Anumaya Kotia kayone hulateteno ago aligati-maine.” hutama nehae. Ani yafe kefo yamoa tamakaila “Na kava hiho.” huno ala kavatamia omaitafa huno omaisie.

15 Tagaya naane hugahune? Kahegi kemo akave malesune huta tametitia nohunagi Anumaya Kotia kayone hulatenea yafe havita tametitia nehuta kefo yana kanalelagita hisuno? Ania ohutafa huta ohugahune. 16 Tamakaya ohavinao? Nago kanoma mukia lamaku tamakesa hakitama amitetama agai avaya ali hipoya hutama maisayana ani kanomo aliya veaa maigahae. Kefo yama hu yamo aliya veanema mainutamahena ani kefo yama nehaya anonaa alitetama falitama agola Anumaya Kotienena omaileasinagi tamakaya Anumaya Koti kea akave male yamo aliya veanema mainutamahena ani kema akave malaya anonaa alisageno Anumaya Kotia “Fatago veane mainae.” huno hulamategahie. 17 Tamage nayona tamakaya kefo yamo aliya veane mainageno Anumaya Koti kea huhalagetama havilama hutama ago akave malenae. Naa humainayafe Anumaya Kotina musena huneatone. 18 Kefo yamoma nofi hulamatenea yapitila Anumaya Kotia ago alino kalu helamategetama fatago yamo aliya veane mainae. 19 Kema havi yatamimoa yaufa akavi ohuneafene huna veamogata tagu tagesafiti nehuna kea tamahanepaugi haviho hagotetama tamaiya, tamayana, mukia yatamia “Kefo yamo aliya nafane maiho.” hutama hu-mainayanagi menia tamaiya, tamayana, mukia yatamia fatago hisia yamo aliyate aminutamahena Anumaya Kotina alu aotage veanea maigahae.

20 Hagotetama kefo yamo aliya veanea mainetama fatago kavala ohisaya tamakesa havimainayane. 21 Kefo yamo aliya veane mainetama ani kavala humainayafe anonatamia hana augafa kanale ya alimainae? Menia ani yafena tamakaye hisifa yamaage hanegi anonaa kanale yana oalinae. Ago falitetama Anumaya Kotienena omaisaya yamaage ali falote humainae. 22 Kefo yamoma nofi hulamatenea yapitila menia Anumaya Kotia ago alino kalu helamateteno “Aliya veanimogatama maiho.” huno higetama mainageno ani aliyamo anonaa “Tamakaya alu aotage veanenia agola maige maige hisaya tamahaimula aligahae.” huno humaine. 23 Kefo yamo aliya veamoya anonaamima alisaya yana fali yane. Faligahagi Anumaya Kotia nagola muse yana afaa nelamie. Anumayatimoa Yisasi Kalaisiene ailokaeta mainonafe agola maige maige hisuna tahaimula ago tamine.